நாமல் ராஜபக்ஷ தலைமையில் புதிய அரசியல் கலாச்சாரத்தை உருவாக்க மட்டக்களப்பு மாவட்ட மக்கள் தம்முடன் இணைந்து பயணிக்க வேண்டும் என ஸ்ரீலங்கா பொதுஜன பெரமுனவின் மட்டக்களப்பு மாவட்ட அமைப்பாளர் சுரேஸ் குமார் ஜெய்ஸ்மன் அழைப்பு விடுத்துள்ளார். மட்டக்களப்பில் நேற்று (08) இடம்பெற்ற ஊடகவியலாளர் சந்திப்பில், மாவட்ட அமைப்பாளர் பதவியை ஏற்றுக்கொண்டதன் பின்னர் அவர் இதனைத் தெரிவித்துள்ளார். ஸ்ரீலங்கா பொதுஜன பெரமுனவின் தேசிய அமைப்பாளரும் பாராளுமன்ற உறுப்பினருமான நாமல் ராஜபக்ஷவிடமிருந்து தாம் இந்த நியமனத்தைப் பெற்றுக்கொண்டதாகவும், முன்னாள் ஜனாதிபதி மகிந்த ராஜபக்ஷ, பசில் ராஜபக்ஷ உள்ளிட்ட கட்சியின் உயர்மட்ட உறுப்பினர்களின் ஆசீர்வாதத்துடன் இந்தப் பொறுப்பை ஏற்றுக்கொண்டதில் மகிழ்ச்சியடைவதாகவும் அவர் குறிப்பிட்டுள்ளார். மாவட்ட அமைப்பாளர் பதவி அதிகாரமிக்க பதவியாக அல்லாமல், மக்களுக்கான பொறுப்பாகவே தாம் கருதுவதாகத் தெரிவித்த அவர், மட்டக்களப்பு மாவட்டத்தில் பல்வேறு இன, மத மற்றும் சமூகங்களைச் சேர்ந்த மக்கள் வாழ்வதால் அனைவரையும் ஒன்றிணைக்கும் அரசியல் அணுகுமுறையுடன் செயற்படவுள்ளதாகக் கூறியுள்ளார். இளைஞர்களுக்கு தொழில்நுட்பத்தின் ஊடாக உலகளாவிய தொழில் வாய்ப்புகளை ஏற்படுத்துதல், மீனவர்கள் மற்றும் விவசாயிகளின் பிரச்சினைகளுக்கு நிரந்தரத் தீர்வுகளைப் பெற்றுக்கொடுத்தல், கல்வி, அடிப்படை வசதிகள் மற்றும் உட்கட்டமைப்பு அபிவிருத்திகளை முன்னெடுத்தல் ஆகியவற்றுக்கு முன்னுரிமை வழங்கப்படும் எனவும் அவர் தெரிவித்துள்ளார். மேலும், கிராமம் கிராமமாகச் சென்று மக்களின் பிரச்சினைகள், ஆலோசனைகள் மற்றும் விமர்சனங்களை கேட்டறிந்து, உரிய தரப்பினருடன் தொடர்புகொண்டு தீர்வுகளைப் பெற்றுக்கொடுப்பதற்காக இந்தப் பொறுப்பை ஏற்றுக்கொண்டதாகவும் தெரிவித்துள்ளார். கட்சியின் அடிமட்ட அமைப்பை வலுப்படுத்துவதுடன், இளைஞர்கள் மற்றும் பொதுமக்களின் பங்களிப்பை அதிகரிக்க நடவடிக்கை எடுக்கப்படும் எனவும், தம்மை விமர்சிப்பவர்களின் கருத்துகளுக்கும் மதிப்பளிப்பதாகவும் அவர் குறிப்பிட்டுள்ளார். அரசியலில் கருத்து வேறுபாடுகள் இருக்கலாம் என்றாலும், அவை எந்தவொரு சமூகத்தையும் பாதிக்காத வகையில் அமைய வேண்டும் எனக் கூறிய அவர், வார்த்தைகளால் மாத்திரமன்றி செயற்பாடுகளின் ஊடாக மக்களுக்கு சேவை செய்வதே தமது அரசியல் பயணத்தின் நோக்கம் எனத் தெரிவித்துள்ளார். இதனிடையே, உயிர்த்த ஞாயிறு தாக்குதல் தொடர்பான விசாரணைகள் நீதிமன்றத்தில் இடம்பெற்று வருவதால், ஊடகங்களில் கருத்துகளை வெளியிடுவதைவிட நீதிமன்றமே யார் குற்றவாளி என்பதைத் தீர்மானிக்கும் எனவும் சுரேஸ் குமார் ஜெய்ஸ்மன் தெரிவித்துள்ளார். (கனகராஜா சரவணன்)

மட்டக்களப்பில் புதிய அரசியல் கலாச்சாரத்தை உருவாக்க அழைப்பு

மட்டக்களப்பில் புதிய அரசியல் கலாச்சாரத்தை உருவாக்க அழைப்பு

You may also like