இந்தியாவுக்கான விஜயத்தை மேற்கொண்டுள்ள மக்கள் விடுதலை முன்னணியின் பொதுச் செயலாளர் டில்வின் சில்வா உள்ளிட்ட பிரதிநிதிகள் இன்று (01) பிற்பகல் இந்திய வெளிவிவகார அமைச்சர் கலாநிதி எஸ். ஜெய்சங்கரை சந்தித்து சுமுகமான கலந்துரையாடலில் ஈடுபட்டனர். இதன்போது, கடந்த பெப்ரவரி மாதம் இடம்பெற்ற சந்திப்பை நினைவுகூர்ந்ததுடன், இலங்கைக்கும் இந்தியாவுக்கும் இடையிலான உறவுகள் நல்ல முறையிலும் வலுவானதாகவும் தொடர்ந்து வளர்ச்சியடைந்து வருவது தொடர்பாக விரிவாகக் கலந்துரையாடப்பட்டது. குறிப்பாக, தொழில்நுட்ப வளர்ச்சி ஒரு நாட்டின் அபிவிருத்தியில் ஏற்படுத்தும் தாக்கம் தொடர்பாகவும் கலந்துரையாடப்பட்டது.&nbsp; அத்துடன், அரசியல் கட்சிகள் என்ற வகையில் பொதுமக்கள் மற்றும் இளைஞர்களுடன் நெருக்கமாகச் செயற்பட்டு தொடர்ச்சியான தொடர்பைப் பேணுவதன் அவசியம் குறித்தும், மக்கள் எதிர்கொள்ளும் பிரச்சினைகளை அடையாளம் கண்டு அவற்றுக்கு விரைவாகத் தீர்வுகளை வழங்குவதன் தேவைகள் குறித்தும் கருத்துகள் பரிமாறிக் கொள்ளப்பட்டன. இந்த நோக்கங்களை அடைவதற்காக இலங்கைக்கும் இந்தியாவுக்கும் இடையிலும், இரு நாடுகளின் அரசியல் கட்சிகளுக்கு இடையிலும் அனுபவங்களையும் அறிவையும் பரிமாறிக் கொள்வதன் முக்கியத்துவம் குறித்தும் கவனம் செலுத்தப்பட்டது. குறிப்பாக, இந்தியப் பிரதமர் நரேந்திர மோடி மற்றும் இலங்கை ஜனாதிபதி அநுர குமார திசாநாயக்க ஆகியோர் மக்களுடன் நெருக்கமாகச் செயற்படுவதற்காக முன்னெடுத்து வரும் நடவடிக்கைகள் மற்றும் அது தொடர்பாக செலுத்தி வரும் கவனம் குறித்தும் இதன்போது கருத்துகள் பரிமாறிக் கொள்ளப்பட்டன. மேலும், உலகளாவிய ரீதியில் அதிகரித்து வரும் நெருக்கடியான சூழ்நிலைகளுக்கு மத்தியில் இரு நாடுகளும் எதிர்கொள்ளும் சவால்கள் மற்றும் எதிர்காலத்தில் முன்னெடுக்கக்கூடிய பொதுவான நடவடிக்கைகள் குறித்தும் இந்தச் சந்திப்பில் கலந்துரையாடப்பட்டது. அத்துடன், இலங்கையில் இந்திய முதலீடுகளுக்குக் காணப்படும் வாய்ப்புகள் மற்றும் இரு நாடுகளுக்கும் இடையிலான கலாசார உறவுகளை மேலும் வலுப்படுத்துவது தொடர்பாகவும் கவனம் செலுத்தப்பட்டது.

ம.வி.முன்னணியின் பிரதிநிதிகள் இந்திய வெளிவிவகார அமைச்சருடன் சந்திப்பு

ம.வி.முன்னணியின் பிரதிநிதிகள் இந்திய வெளிவிவகார அமைச்சருடன் சந்திப்பு

You may also like