மலையக மக்களின் பிரச்சினைகளுக்கு தீர்வு காண்பதில் கவனம் செலுத்தாமல் இலங்கைத் தொழிலாளர் காங்கிரஸை விமர்சிப்பதிலேயே நேரத்தை செலவிட வேண்டாம் என இ.தொ.கா. பொதுச்செயலாளரும் நுவரெலியா மாவட்ட பாராளுமன்ற உறுப்பினருமான ஜீவன் தொண்டமான் ஆளுங்கட்சியினரிடம் தெரிவித்துள்ளார். அக்கரப்பத்தனை மற்றும் டயகம பகுதிகளில் பல வருடங்களாக மக்கள் விவசாய நடவடிக்கைகளில் ஈடுபட்டு வந்த காணிகளை மீளப் பெறுவதற்கான அறிவித்தல் வெளியாகியுள்ளதாகத் தெரிவித்த அவர், நீண்டகாலமாக மக்கள் பயன்படுத்தி வரும் காணிகளை மீளப் பெறுவது ஏற்றுக்கொள்ள முடியாதது எனவும் குறிப்பிட்டார். குறித்த காணிகள் ஒப்பந்த அடிப்படையில் விவசாய நடவடிக்கைகளுக்காக மக்களுக்கு வழங்கப்பட்டிருந்த நிலையில், அந்த ஒப்பந்தங்களை இரத்துச் செய்யுமாறு அரசாங்கம் அறிவுறுத்தியுள்ளதாக நிர்வாகத் தரப்பில் தெரிவிக்கப்படுவதாகவும் அவர் கூறினார். இந்த விடயத்தில் அரசாங்கம் உடனடியாக தலையிட்டு, மக்களின் காணி உரிமையையும் வாழ்வாதாரத்தையும் பாதுகாக்க நடவடிக்கை எடுக்க வேண்டும் எனவும் ஜீவன் தொண்டமான் வலியுறுத்தினார். பாராளுமன்றத்தில் இன்று உரையாற்றியபோதே அவர் இவ்வாறு தெரிவித்தார். மக்கள் எதிர்நோக்கும் பிரச்சினைகள் தொடர்பில் பாராளுமன்றத்தில் கேள்வி எழுப்பும்போது, “இவ்வளவு காலம் நீங்கள் என்ன செய்தீர்கள்?” என ஆளுங்கட்சியைச் சேர்ந்த நுவரெலியா மாவட்ட பாராளுமன்ற உறுப்பினர் ஒருவர் தொடர்ச்சியாக கேள்வி எழுப்பி வருவதாகவும் அவர் கூறியுள்ளார். இலங்கைத் தொழிலாளர் காங்கிரஸ் மலையக மக்களின் உரிமைகள் மற்றும் நலன்களுக்காக நீண்டகாலமாகப் போராடி வந்துள்ளதாகவும், இ.தொ.கா. என்ன செய்துள்ளது என்பதை அறிந்துகொள்ள மலையக மக்களிடம் நேரடியாகக் கேட்டுப் பார்க்குமாறும் அவர் குறிப்பிட்டார். அத்துடன், தற்போது அரசாங்க அதிகாரத்தையும் பொறுப்பையும் பெற்றுள்ளவர்கள் கடந்த காலத்தை விமர்சிப்பதை விட, தமக்கு வழங்கப்பட்டுள்ள அதிகாரத்தைப் பயன்படுத்தி மலையக மக்களுக்கு சேவையாற்ற வேண்டும் எனவும் அவர் தெரிவித்தார். “நாம் தற்போது ஆளுங்கட்சியில் இல்லை; எதிர்க்கட்சியிலேயே இருக்கின்றோம் என்பதை முதலில் நினைவில் கொள்ளுங்கள்” எனவும் ஜீவன் தொண்டமான் கூறினார். கடந்த இரண்டு வருடங்களில் எத்தனை வீடுகள் கட்டப்பட்டுள்ளன, எத்தனை காணி உறுதிப் பத்திரங்கள் வழங்கப்பட்டுள்ளன, எத்தனை வீதிகள் புனரமைக்கப்பட்டுள்ளன என்பதற்கு ஆளுங்கட்சியினர் பதிலளிக்க வேண்டும் எனவும் அவர் கேள்வி எழுப்பினார். பொகவந்தலாவ பிரதான வீதியை இறுதியாக புனரமைத்தது தானே எனத் தெரிவித்த ஜீவன் தொண்டமான், கடந்த காலத்தில் யார் என்ன செய்தார்கள் என்பதை விமர்சிப்பதைவிட, தற்போது மக்களுக்கு என்ன செய்துள்ளீர்கள் என்பதற்கு பதிலளிப்பதே முக்கியமானது எனவும் வலியுறுத்தினார்.

இ.தொ.கா.வை விமர்சிக்காமல் மலையக மக்களுக்கு சேவையாற்றுங்கள் – ஜீவன் எம்.பி.

இ.தொ.கா.வை விமர்சிக்காமல் மலையக மக்களுக்கு சேவையாற்றுங்கள் – ஜீவன் எம்.பி.

You may also like