டிட்வா சூறாவளி அனர்த்தத்தினால் வீடுகள் சேதமடைந்த மற்றும் மண்சரிவு அபாயமுள்ள பகுதிகளில் வசிக்கும் தோட்டத் தொழிலாளர் குடும்பங்களுக்காக புதிய வீட்டுத்திட்டமொன்றை நடைமுறைப்படுத்த அமைச்சரவை அங்கீகாரம் வழங்கியுள்ளதாக அமைச்சர் விஜித ஹேரத் தெரிவித்துள்ளார். அமைச்சரவை தீர்மானங்களை அறிவிக்கும் செய்தியாளர் சந்திப்பில் கலந்து கொண்டு உரையாற்றிய போதே அவர் இதனை குறிப்பிட்டுள்ளார். தகுதியுள்ள ஒவ்வொரு தொழிலாளர் குடும்பத்திற்கும் 650 சதுர அடி பரப்பளவிலான வீடொன்றை அமைப்பதற்காக, அரசாங்கத்தினால் கட்டங் கட்டமாக 05 மில்லியன் ரூபாய் நிதி வழங்கப்படும். குறித்த தொழிலாளி வசிக்கும் தோட்டத்திலேயே பாதுகாப்பான இடத்தில் 10 பேர்ச்சர்ஸ் காணித்துண்டு அந்தந்த தோட்டக் கம்பனிகளால் வழங்கப்பட வேண்டும். தொழிலாளரின் சேவை தொடர்ந்தும் தேவையில்லை என தோட்ட நிறுவனங்கள் தீர்மானிக்கும் பட்சத்தில், தொழிலாளரிடமுள்ள காணியில் அல்லது வழங்கப்படுகின்ற 05 மில்லியன் ரூபாய் நிதியைப் பயன்படுத்தி காணியொன்றைக் கொள்வனவு செய்து வீட்டை அமைப்பதற்கு வசதியளிக்கப்படும். ஏற்பட்ட வெள்ளப்பெருக்கு, மண்சரிவு போன்ற அனர்த்தங்களால் வீடுகள் முழுமையாகச் சேதமடைந்திருத்தல், மண்சரிவு அபாய வலயத்தில் அமைந்திருத்தல் அல்லது பகுதியளவில் சேதமடைந்து இனி பயன்படுத்த முடியாது என உறுதிப்படுத்தப்பட்டிருத்தல் வேண்டும். பாதுகாப்பு அமைச்சு வெளியிட்டுள்ள வழிகாட்டல்கள் மற்றும் வீட்டுத் திட்ட வரைபடங்களுக்கு அமையவே இந்த வீடுகள் அமைக்கப்பட வேண்டும். பெருந்தோட்ட மற்றும் சமுதாய உட்கட்டமைப்பு வசதிகள் அமைச்சருடன் இணைந்து ஜனாதிபதி சமர்ப்பித்த இந்த யோசனைக்கு அமைச்சரவை தனது உடன்பாட்டைத் தெரிவித்துள்ளதாக அமைச்சர் விஜித ஹேரத் தெரிவித்துள்ளார்.

தோட்டத் தொழிலாளர் குடும்பங்களுக்காக புதிய வீட்டுத்திட்டம் - அமைச்சரவை அனுமதி

தோட்டத் தொழிலாளர் குடும்பங்களுக்காக புதிய வீட்டுத்திட்டம் - அமைச்சரவை அனுமதி

You may also like