மத்திய கிழக்கு பிராந்தியத்தில் நிலவும் போர்ச்சூழல் மற்றும் உலக சந்தையில் மசகு எண்ணெய் விலை அதிகரிப்பு காரணமாக, பாகிஸ்தான் அரசு எரிபொருள் விலைகளை அதிரடியாக உயர்த்தியுள்ளது. ஒரு மாதத்திற்குள் மேற்கொள்ளப்பட்ட இரண்டாவது விலை அதிகரிப்பு இதுவாகும். இதன்படி ஒரு லீற்றர் டீசலின் விலை 54.9% ஆல் அதிகரிக்கப்பட்டு, 520.35 பாகிஸ்தான் ரூபாவாக நிர்ணயிக்கப்பட்டுள்ளது. அத்துடன் ஒரு லீற்றர் பெற்றோலின் விலை 42.7% ஆல் அதிகரிக்கப்பட்டு, 458.40 பாகிஸ்தான் ரூபாவாக நிர்ணயிக்கப்பட்டுள்ளது. ஈரான் - அமெரிக்கா இடையிலான போர் பதற்றத்தினால் சர்வதேச சந்தையில் எரிபொருள் விலைகள் கட்டுப்பாட்டை மீறிச் சென்றுள்ளதாகப் பாகிஸ்தான் பெற்றோலியத்துறை அமைச்சர் அலி பர்வைஸ் மாலிக் தெரிவித்துள்ளார். இந்த விலை உயர்வு தவிர்க்க முடியாதது என்றும் அவர் சுட்டிக்காட்டியுள்ளார். மத்திய கிழக்கு நெருக்கடி ஆரம்பமாவதற்கு முன்னர், பாகிஸ்தானில் பெற்றோல் மற்றும் டீசல் விலைகள் 255 - 265 ரூபாய் என்ற அளவிலேயே காணப்பட்டன. தற்போதைய புதிய திருத்தத்தின்படி, பெட்ரோல் விலை சுமார் 76 சதவீதமும், டீசல் விலை சுமார் 96 சதவீதமும் உயர்ந்துள்ளது. முற்றிலும் இறக்குமதி செய்யப்படும் எரிபொருளையே நம்பியிருக்கும் பாகிஸ்தான் பொருளாதாரத்திற்கு இது பெரும் பின்னடைவை ஏற்படுத்தியுள்ளது. இந்த விலை உயர்வினால் போக்குவரத்துச் செலவுகள் அதிகரித்து, நாட்டில் பணவீக்கம் மேலும் உயரும் என பொருளாதார ஆய்வாளர்கள் எச்சரித்துள்ளனர்.

பாகிஸ்தான் எரிபொருள் விலைகளை அதிரடியாக உயர்த்தியது

பாகிஸ்தான் எரிபொருள் விலைகளை அதிரடியாக உயர்த்தியது

You may also like