நாட்டின் பல பகுதிகளில் நாளை (14) பகல் நேரத்தில் வெப்பத்தின் தாக்கம் அதிகரிக்கக்கூடும் என வளிமண்டலவியல் திணைக்களம் 'அம்பர்' எச்சரிக்கையை விடுத்துள்ளது. இந்த எச்சரிக்கையானது, இயற்கை அனர்த்தங்கள் குறித்த முன்னெச்சரிக்கை மையத்தால் இன்று (13) மாலை 4.00 மணிக்கு வெளியிடப்பட்டதுடன், இது நாளை மாலை 4.00 மணி வரை நடைமுறையில் இருக்கும் என தெரிவிக்கப்பட்டுள்ளது. வடமத்திய மற்றும் கிழக்கு மாகாணங்கள் மற்றும் யாழ்ப்பாணம், கிளிநொச்சி, முல்லைத்தீவு, வவுனியா, மொனராகலை மற்றும் அம்பாந்தோட்டை ஆகிய மாவட்டங்களில் வசிப்பவர்களுக்கு இந்த எச்சரிக்கை விடுக்கப்பட்டுள்ளது. வளிமண்டலவியல் திணைக்களத்தின் தகவலின்படி, பகல் நேரத்தில் சில பகுதிகளில் 'வெப்பச் சுட்டெண்' அதாவது மனித உடல் உணரும் வெப்பநிலை எச்சரிக்கை நிலையை எட்டும் என்று எதிர்பார்க்கப்படுகிறது. வெப்பத்தின் தாக்கத்தைக் குறைக்கத் தேவையான முன்னெச்சரிக்கை நடவடிக்கைகளை மேற்கொள்ளுமாறு பொதுமக்களிடம் திணைக்களம் கேட்டுக்கொண்டுள்ளது. வெளியிடங்களில் பணிபுரிபவர்கள் போதுமான அளவு நீர் அருந்துமாறும், நிழலான இடங்களில் அடிக்கடி ஓய்வு எடுக்குமாறும் அறிவுறுத்தப்பட்டுள்ளனர். முதியவர்கள் மற்றும் நோயாளிகள் குறித்துக் கவனித்துக்கொள்ளுமாறு பொதுமக்களுக்கு அறிவுறுத்தப்பட்டுள்ளதுடன், வாகனங்களுக்குள் குழந்தைகளைத் தனியாக விட்டுச் செல்ல வேண்டாம் என்று வாகன ஓட்டிகள் எச்சரிக்கப்பட்டுள்ளனர். வெப்பத்தின் தாக்கத்தைக் குறைக்க, மெல்லிய மற்றும் வெள்ளை அல்லது வெளிர் நிறத்திலான ஆடைகளை அணியுமாறும் வளிமண்டலவியல் திணைக்களம் பரிந்துரைத்துள்ளது.

வெப்பமான வானிலை குறித்து 'அம்பர்' எச்சரிக்கை!

வெப்பமான வானிலை குறித்து 'அம்பர்' எச்சரிக்கை!

You may also like