இன்ஃபுளுவென்சா (Influenza) எனப்படுவது இருமல் மற்றும் தும்மல் மூலம் பரவக்கூடிய ஒரு பொதுவான வைரஸ் தொற்றுநோயாகும். இந்நோய் ஃபுளு என்ற வைரஸால் ஏற்படுகிறது. இதன் தாக்கம் எப்போது வேண்டுமானாலும் ஏற்படலாம். பெரும்பாலும் குளிர்காலத்திலேயே இதன் தாக்கம் அதிகமாக இருக்கும். இதை பருவகாலக் காய்ச்சல் என்றும் அழைக்கின்றனர்.&nbsp; மூச்சுக்குழாயைப் பாதிக்கும் ஆர்.என்.ஏ.வைரஸ் மூலம் இந்நோய் உண்டாகிறது. சளி போன்ற மூச்சு, மேற்சுவடு தொற்றை ஒப்பிடும்போது இன்ஃபுளுவென்ஸா தொற்று 0.1 சதவீத இறப்பைக்கொண்ட கடும் நோயை ஏற்படுத்தும். பெரும்பாலும் ஒரு வாரம் அல்லது பத்து நாட்களில் இன்ஃபுளுவென்சா நோய் குணமாகிவிடும். உலகம் முழுவதும் பாதிக்கும் ஒரு கொள்ளை நோயாக இந்நோய் அடிக்கடி வருவதில்லை. 20ஆம் நூற்றாண்டில் மூன்று முறை இன்ஃபுளுவென்சா நோய்த்தாக்கம் நிகழ்ந்திருக்கிறது. 1918ஆம் ஆண்டு ஏற்பட்ட எசுப்பானிய இன்ஃபுளுவென்சா காய்ச்சலால் ஏறக்குறைய 50 மில்லியன் இறப்புகளும் 1957ஆம் ஆண்டு ஏற்பட்ட ஆசிய இன்ஃபுளுவென்சா காய்ச்சலால் சுமார் 2 மில்லியன் இறப்புகளும் 1968இல் ஏற்பட்ட இன்ஃபுளுவென்சா காய்ச்சலால் சுமார் ஒரு மில்லியன் இறப்புகளும் நிகழ்ந்துள்ளன. ஃபுளு தொற்றை ஏற்படுத்தும் இன்ஃபுளுவென்சா வைரஸில் மூன்று வகை உள்ளன. இன்ஃபுளுவென்சா ஏ, பி மற்றும் சி, ஏ மற்றும் பி வகை வைரஸ்கள் மக்களைத் தாக்குகின்றன. இவை சுவாசக்குழாயின் கடுமையான தொற்றுக்குக் காரணமாகின்றது. இதில் சி வகை வைரஸ் இறப்பு வீதத்தை அதிகரிக்கும்&nbsp;நிலைமைக்கு வழிவகுக்கிறது. பொதுவாக வைரஸ்கள் காற்று அல்லது இருமல் வழியாகப் பரவுகின்றன. இப்பரவல் ஒப்பீட்டளவில் பெரும்பாலும் குறுகிய தொலைவில் உள்ளவர்களிடத்திலேயே நிகழ்கின்றது.&nbsp; வைரஸ் மூலம் பாதிக்கப்பட்ட அசுத்தமான சூழல்களைத் தொடுவதன் மூலமும் வாய் அல்லது கண்களைத் தொடுவதன் மூலமும் பரவுகிறது. முன் அறிகுறிகள் தோன்றுவதற்கு முன்பும் பின்னரும் ஒரு நபர் மற்றவர்களுக்குத் தொற்றுநோயைப் பரப்புபவராக இருக்கின்றார். இன்ஃபுளுவென்சா வைரஸால் பாதிக்கப்பட்ட நபர் தும்முதல், இருமுதல் மற்றும் பேசுதல் போன்ற செயற்பாடுகளைச் செய்வதன் மூலமும் வைரஸ் தொற்று பரவியுள்ள இடங்களைத் தொடுவதன் மூலமும் இந்நோய் பரவுகின்றது. இப்பாதிப்புக்குள்ளான நபர் இந்நோயின் முதல் அறிகுறிகள் தெரிவதற்கு முதல் ஐந்து நாட்களுக்கு முன்பே இந்நோயைப் பரப்பும் தன்மை உடையவராக இருக்கின்றார். இன்ஃபுளுவென்சா காய்ச்சல் தோன்றுவதற்கான அறிகுறிகள், வைரஸ் தொற்று ஏற்பட்ட ஒன்று அல்லது இரண்டு நாட்களிலேயே மிதமானது முதல் கடுமையானதாகவும் இருக்கும். குறைந்தது ஒரு வாரத்துக்கு இவ்வறிகுறிகளுடன் இந்நோயின் தாக்கம் இருக்கும். பொதுவாக, உடல் சில்லிட்டும் குளிர்ச்சியான உணர்வும் தோன்றலாம். ஆனால், பெரும்பாலும் காய்ச்சலே தோன்றுகிறது. உடல் வெப்பநிலை 38 முதல் 39 பாகை செல்சியஸ் அளவுக்கு அல்லது 100 முதல் 103 பாகை பரனைட் வெப்பநிலை அளவுக்கு சூடாக இருக்கும். பலருக்கு அதிக காய்ச்சல் உண்டாகி படுக்கையிலேயே வீழ்ந்து கிடக்கும் நிலை ஏற்படுகிறது. உடல் முழுவதும் குறிப்பாக, முதுகிலும், கால்களிலும் வலி இருக்கும். இன்ஃபுளுவென்சா தொற்றுள்ள நபர்களில் ஏறக்குறைய 33 சதவீதமான நபர்களுக்கு எந்தவிதமான அறிகுறிகளும் காணப்படுவதில்லை. அதிக காய்ச்சல், இருமல், மூக்கடைப்பு, தும்மல், மூக்கில் நீர்வடிதல், புலன்கள் சிவத்தல், கண்களில் நீர் வடிதல், தொண்டை வலி, தசை வலி, தலைவலி, உடல் வலி, உடல் இணைப்புகளில் வலி, உடற்சோர்வு, களைப்பு, பசியின்மை, வாந்தி, இரத்தப்போக்கு போன்றவை இந்நோயின் பொதுவான அறிகுறிகளாகும். வைரஸ் நிமோனியா, இரண்டாம் நிலை பக்றீரியா, நிமோனியா, சளி போன்ற நோய்த்தாக்கங்கள் மற்றும் ஆஸ்துமா அல்லது இதயச் செயலிழப்பு போன்றன இன்ஃபுளுவென்சா காய்ச்சலின் அறிகுறிகளாகும். சில நேரங்களில் வைரஸ் காய்ச்சல் அல்லது 24 மணிநேர காய்ச்சல் எனத் தவறாக பரிந்துரைத்து விடும் அபாயமும் உள்ளது. குழந்தைகளிடத்தில் குமட்டல் மற்றும் வாந்தியெடுத்தல், வயிற்றுப்போக்குடன் வயிற்றுவலி ஏற்படல் போன்ற அறிகுறிகள் காணப்படும். ஆனால், இந்த அறிகுறிகள் பெரியவர்களிடத்தில் பொதுவாக இருப்பதில்லை. குறிப்பாக, பெரியவர்களுக்கு தொடர்பற்ற இரைப்பைக் குடல் அழற்சி, குமட்டல் மற்றும் வாந்தியெடுத்தல் போன்ற அறிகுறிகள் காணப்படும். குறிப்பாக, 60 வயதுக்கு மேற்பட்டவர்களிடத்தில் இம்மூன்று அறிகுறிகளுக்குமான காய்ச்சல் உணர்திறன் குறைவாகவே இருக்கும். தொண்டைச் சளி அல்லது மூக்கு பரிசோதனையின் மூலம் நோய்த் தொற்றுப் பாதிப்பு உறுதிப்படுத்தப்படுகிறது. இதற்காக பல்வேறு வகையான துரிதச் சோதனைகள் வைத்தியசாலைகளில் உள்ளன. இத்தகைய சோதனைகளில் எதிர்மறை முடிவுகள் கிடைத்தாலும் கூட இந்நோய்த் தொற்று இருப்பதற்கான வாய்ப்புகளும் இருகின்றன. அடிக்கடி கை கழுவுவதன் மூலம் இந்நோய்த்தொற்று ஆபத்து குறைகின்றது. ஏனெனில், வைரஸ் கிருமி சவர்க்காரம் மூலம் செயலிழக்கப்படுகிறது. முகக்கவசத்தை அணிவதன் மூலமும் பாதுகாப்பைப் பெற்றுக்கொள்ளலாம். இன்ஃபுளுவென்சா காய்ச்சலுக்கு எதிரான தடுப்பூசிகளை வருடாந்தம் போடுவதை உலக சுகாதார அமைப்பு பரிந்துரைக்கிறது. இத்தடுப்பூசி மூன்று அல்லது நான்கு வகையான இன்ஃபுளுவென்சா காய்ச்சல்களுக்கு எதிராகச் செயற்படுகிறது. ஒரு வருடத்துக்குப் போடப்படும் இன்ஃபுளுவென்சா தடுப்பூசி அடுத்த வருடத்தில் பயனுள்ளதாக இருக்காது. ஏனென்றால், வைரஸ்கள் விரைவாக உருவாகின்றன. நியூராமினிடேசு தடுப்பு மருந்து, ஒசெல்டாமிவிர் போன்ற வைரஸ் எதிர்ப்பு மருந்துகள் இன்ஃபுளுவென்சாவுக்கான சிகிச்சையில் பயன்படுத்தப்படுகின்றன.தொற்று இல்லையெனில் ஆரோக்கியமானவர்களுக்கு இத்தடுப்பூசியால் எந்தப் பாதிப்பும் ஏற்படாது என்று சுகாதாரத் தரப்பினர் பரிந்துரைக்கின்றனர். இதைத்தவிர, வேறு நோய் உள்ளவர்களுக்கு இத்தடுப்பூசியால் எந்தப் பயனுமில்லை என்றும் தெரிவிக்கின்றனர்.உலகெங்கும் இக்காய்ச்சல் பரவுவதால் வருடமொன்றுக்கு சுமார் மூன்று முதல் ஐந்து மில்லியன் மக்கள் கடுமையான காய்ச்சலால் பாதிக்கப்படுகின்ற அதேவேளை, சுமார் 2,50,000 முதல் 5,00,000 மரணங்கள் சம்பவிக்கின்றன. உலகில் வடக்கு மற்றும் தெற்குப் பகுதிகளில் பிரதானமாக குளிர்காலத்திலும் நிலநடுக்கோட்டைச் சுற்றியுள்ள பகுதிகளில் ஆண்டு முழுவதும் எந்தக் காலத்திலும் இக்காய்ச்சல் ஏற்படக்கூடும். மரணம் பெரும்பாலும் இளம் பருவத்தினருக்கும் வயதானவர்களுக்கும் பிற நோயால் பாதிக்கப்பட்டவர்களுக்கும் மட்டுமே ஏற்படுகிறது. குறிப்பாக, 5 வயதுக்குட்பட்ட குழந்தைகள், 65 வயதைக் கடந்த பெரியவர்கள் இப்பாதிப்புக்குள்ளாகிவருவதாக சிறுவர் நோயியல் விஷேட வைத்தியர் தீபால் பெரேரா தெரிவித்துள்ளார். கர்ப்பிணித்தாய்மார்கள், குறைந்த நோயெதிர்ப்புச் சக்தியுடையவர்கள், சுகாதார நிலையங்களில் பணியாற்றுபவர்கள் மற்றும் நாட்பட்ட சுவாசநோய் உடையவர்களுக்கு இந்நோய்த்தொற்று ஏற்படும் அபாயம் அதிகமுள்ளதாக சுகாதாரப் பிரிவினர் தெரிவிக்கின்றனர். இந்நோய் குழந்தைகளிடையே எளிதில் பரவக்கூடும் என்பதால், குழந்தைகள் மற்றும் பெரியவர்கள் அடிக்கடி கைகளைத் தவறாமல் கழுவுமாறும் குறிப்பாக, வகுப்பறைகள், பாலர் பாடசாலைகள், வைத்தியசாலைகள் மற்றும் பொது போக்குவரத்துச் சேவைகளைப் பயன்படுத்தும்போது முகக்கவசம் அணியுமாறும் வலியுறுத்தப்பட்டுள்ளனர். இந்த வைரஸால் பாதிக்கப்பட்டவர்கள் அதிகளவிலான இயற்கை பானங்கள் அருந்துவதுடன், வைத்தியர்களால் பரிந்துரைக்கப்பட்ட மருந்துகளை உட்கொண்டு ஓய்வெடுக்க வேண்டும். சுவாசப் பிரச்சினைகளால் பாதிக்கப்பட்டவர்கள் அல்லது கடுமையாக நோய் வாய்ப்பட்டவர்கள் மருத்துவ சிகிச்சை பெறவேண்டுமென விசேட பொது வைத்திய நிபுணர்கள் வலியுறுத்தியுள்ளனர். வீட்டில் ஓய்வெடுப்பதுடன், நீர்ச்சத்து குறையாமலிருக்க அதிகளவு நீர் அருந்துதல் வேண்டும். இந்நோய்த்தாக்கத்துக்கு குழந்தை பாதிக்கப்பட்டிருந்தால் குழந்தையின் உடலிலுள்ள நீர்ச்சத்து குறையாமலிருக்க அதிகமாக தாய்ப்பால் கொடுப்பது மி௧ முக்கியமாகும். மட்டு. துஷாரா

இன்ஃபுளுவென்சா (Influenza)

இன்ஃபுளுவென்சா (Influenza)

You may also like