மேற்கு–மத்திய மற்றும் அதனை ஒட்டிய வடமேற்கு வங்காள விரிகுடாவில் நிலவும் ஆழ்ந்த காற்றழுத்த தாழ்வு மண்டலம், இன்று இரவு இந்தியாவின் வடக்கு ஆந்திரப் பிரதேசம் மற்றும் தெற்கு ஒடிசா கடற்கரைப் பகுதிகளைக் கடக்கக்கூடும் என வானிலை ஆய்வு மையம் தெரிவித்துள்ளது. இந்தக் காற்றழுத்த தாழ்வு மண்டலத்தால் இலங்கைக்கு நேரடி பாதிப்பு ஏற்படாது என தெரிவிக்கப்பட்டுள்ள போதிலும், அதன் நகர்வினால் ஏற்படும் காற்று வீச்சு காரணமாக நாட்டின் தென்மேற்கு பகுதிகளில் நிலவும் மழையுடனான காலநிலை தொடரும் என எதிர்பார்க்கப்படுகிறது. மேல், சபரகமுவ, மத்திய மற்றும் வடமேற்கு மாகாணங்களிலும், காலி மற்றும் மாத்தறை மாவட்டங்களிலும் அவ்வப்போது மழை அல்லது இடியுடன் கூடிய மழை பெய்யக்கூடும். சில பகுதிகளில் 100 மில்லிமீற்றருக்கும் அதிகமான பலத்த மழை பெய்யக்கூடும் எனவும் வானிலை ஆய்வு மையம் தெரிவித்துள்ளது. வடமத்திய மாகாணம் மற்றும் மன்னார் மாவட்டத்தில் ஆங்காங்கே மழை பெய்யக்கூடும் எனவும் தெரிவிக்கப்பட்டுள்ளது. இதேவேளை, மத்திய மலைநாட்டின் மேற்கு சரிவுகள், வடமத்திய மற்றும் வடமேற்கு மாகாணங்கள், திருகோணமலை, அம்பாந்தோட்டை மற்றும் மாத்தளை மாவட்டங்களில் அவ்வப்போது மணிக்கு 40–50 கிலோமீற்றர் வேகத்தில் பலத்த காற்று வீசக்கூடும். இடியுடன் கூடிய மழையின் போது ஏற்படக்கூடிய தற்காலிக பலத்த காற்று மற்றும் மின்னல் தாக்கங்களிலிருந்து பாதுகாப்பாக இருக்க பொதுமக்கள் போதிய முன்னெச்சரிக்கை நடவடிக்கைகளை மேற்கொள்ளுமாறும் அறிவுறுத்தப்பட்டுள்ளது.

தென்மேற்கு பகுதிகளில் தொடரும் மழை – பலத்த காற்றுக்கும் எச்சரிக்கை

தென்மேற்கு பகுதிகளில் தொடரும் மழை – பலத்த காற்றுக்கும் எச்சரிக்கை

You may also like