தம்புள்ளை மற்றும் சீகிரியா சுற்றுலா வலயத்திற்கு வருகை தரும் சுற்றுலாப் பயணிகளுக்குப் புதியதோர் அனுபவத்தை வழங்கும் நோக்கில், "Dambulla Bustaurant" எனும் புதிய பேருந்து சேவை நேற்று (15) தம்புள்ளை பெல்வெஹெர பகுதியில் ஆரம்பித்து வைக்கப்பட்டது. உணவக வசதிகளை அனுபவித்தவாறே தம்புள்ளை மற்றும் சீகிரியா பகுதிகளில் சுற்றுலா மேற்கொள்வதற்கான வாய்ப்பு இதன் மூலம் சுற்றுலாப் பயணிகளுக்கு வழங்கப்பட்டுள்ளது. இந்தப் பேருந்து பெல்வெஹெர பகுதியில் பயணத்தை ஆரம்பித்து திகம்பதஹ, கிம்புஸ்ஸ, சீகிரியா மற்றும் இநாமலுவ ஊடாக மீண்டும் பெல்வெஹெரவை வந்தடையும் வகையில் திட்டமிடப்பட்டுள்ளது. சுற்றுலாத் துறையை மேம்படுத்துவதற்காக உலகின் பல நாடுகள் இவ்வாறான எண்ணக்கருவைப் பயன்படுத்துகின்றன. மத்திய மாகாண சுற்றுலாத் திணைக்களத்தின் வழிகாட்டலின் கீழ் இந்த வேலைத்திட்டம் அறிமுகப்படுத்தப்பட்டுள்ளது. மத்திய மாகாண ஆளுநர் பேராசிரியர் எஸ்.பி.எஸ். அபயகோன் மற்றும் புத்தசாசன மற்றும் மத விவகார பிரதி அமைச்சர் கமகெதர திஸாநாயக்க ஆகியோரின் தலைமையில் இதன் ஆரம்ப விழா நடைபெற்றது. இதன்போது கருத்துத் தெரிவித்த மத்திய மாகாண ஆளுநர், கடந்த ஆண்டு 3 மில்லியன் சுற்றுலாப் பயணிகளின் வருகையை எதிர்பார்த்த போதிலும், 'டிட்வா' சூறாவளி காரணமாக ஏற்பட்ட அனர்த்த நிலைமையினால் அவ்வெண்ணிக்கை 2.5 மில்லியனாகக் குறைந்ததாகக் குறிப்பிட்டார்.&nbsp; எவ்வாறாயினும், இவ்வருடத்தின் கடந்த 12 நாட்களில் மாத்திரம் ஒரு இலட்சம் சுற்றுலாப் பயணிகள் நாட்டிற்கு வருகை தந்துள்ளதாகவும், அதனால் கடந்த ஆண்டு எதிர்பார்த்த இலக்கை இவ்வருடம் அடைய முடியும் எனவும் அவர் நம்பிக்கை வெளியிட்டுள்ளார். தற்போதுள்ள சுற்றுலா மையங்களை மேம்படுத்துவதுடன், புதிய சுற்றுலா மையங்களை அறிமுகப்படுத்தும் பணிகள் மத்திய மாகாணத்தில் முன்னெடுக்கப்பட்டு வருகின்றன. கண்டி நகரின் இரவு நேரச் சந்தை மற்றும் மகாவலி ஆற்றில் சாகச நீர் விளையாட்டுகளை ஆரம்பிப்பது போன்ற புதிய திட்டங்கள் குறித்தும் அவர் இதன்போது விளக்கமளித்தார். இவ்வாறான "Bustaurant" வேலைத்திட்டம் இலங்கையில் நடைமுறைப்படுத்தப்படுவது இதுவே முதல் முறை என்றும் அவர் தெரிவித்துள்ளார். இந்நிகழ்வில் மாத்தளை மாவட்ட பாராளுமன்ற உறுப்பினர் சுனில் பியன்வில, தம்புள்ளை மாநகர முதல்வர் வசந்த ராஜமந்திரி, தம்புள்ளை பிரதேச சபையின் டபிள்யூ. எம். திலகரத்ன, மத்திய மாகாண சுற்றுலாப் பணிப்பாளர் சதமாலி ஹேவகே, தம்புள்ளை பிரதேச செயலாளர் என். எம். உபேக்ஷா குமாரி உள்ளிட்ட பலர் கலந்துகொண்டனர். ( எம்.ஏ.அமீனுல்லா)

தம்புள்ளை பெல்வெஹெர பகுதியில் புதிய பேருந்து சேவை ஆரம்பம்

தம்புள்ளை பெல்வெஹெர பகுதியில் புதிய பேருந்து சேவை ஆரம்பம்

You may also like