மலையகத் தமிழ் மக்களை இழிவுபடுத்தும் வகையில் சமூக வலைத்தளத்தில் கருத்து வெளியிட்டதாக கூறப்படும் தேசிய பாடசாலை ஆசிரியருக்கு எதிராக காவல்துறையில் முறைப்பாடு செய்துள்ளதாக இலங்கை தொழிலாளர் காங்கிரஸின் பொதுச்செயலாளரும் பாராளுமன்ற உறுப்பினருமான ஜீவன் தொண்டமான் தெரிவித்துள்ளார். இன்று (08) பாராளுமன்றத்தில் உரையாற்றிய அவர், பிறப்பு, சமூகப் பின்னணி, தொழில் அல்லது இன அடையாளத்தின் அடிப்படையில் எந்தவொரு சமூகத்தையும் இழிவுபடுத்துவதற்கு எவருக்கும் உரிமையில்லை எனக் குறிப்பிட்டார். குறிப்பாக, மலையக மக்களை ‘கள்ளத்தோணி’, ‘தேயிலை பறிக்க வந்தவர்கள்’ உள்ளிட்ட வார்த்தைகளால் அவமதிப்பது ஏற்றுக்கொள்ள முடியாதது எனத் தெரிவித்த அவர், மலையக மக்களின் வரலாறு மற்றும் நாட்டின் பொருளாதாரத்திற்கு அவர்கள் ஆற்றிய பங்களிப்பை சுட்டிக்காட்டினார். மலையக மக்களின் முன்னோர்கள் இந்தியாவின் பல பகுதிகளில் இருந்து தொழிலாளர்களாக இலங்கைக்கு அழைத்து வரப்பட்டு, மலைநாட்டின் தேயிலைத் தோட்டங்களை உருவாக்குவதிலும் நாட்டின் பொருளாதார வளர்ச்சியிலும் குறிப்பிடத்தக்க பங்களிப்பை வழங்கியதாகவும் அவர் தெரிவித்தார். அதேவேளை, லவர்ஸ்லீப் மற்றும் பீட்ரோ தோட்டப் பகுதிகளில் இடம்பெற்ற சம்பவங்களிலும் மலையக மக்களை இழிவுபடுத்தும் சொற்கள் பயன்படுத்தப்பட்டுள்ளதாகக் குறிப்பிட்ட ஜீவன் தொண்டமான், இவ்வாறான சம்பவங்கள் தொடர்பில் உரிய சட்ட நடவடிக்கை எடுக்கப்பட வேண்டும் எனக் கோரினார். இது ஆளும் கட்சிக்கும் எதிர்க்கட்சிக்கும் இடையிலான அரசியல் பிரச்சினை அல்ல எனத் தெரிவித்த அவர், இது மனித உரிமை மற்றும் அடிப்படை மனித மரியாதை தொடர்பான விடயம் எனவும் குறிப்பிட்டார். மேலும், பெருந்தோட்டத் தொழிலாளர்களின் சம்பளப் பிரச்சினைக்கு சட்டப்பூர்வ தீர்வு வழங்குவதுடன், சம்பள அதிகரிப்பு தொடர்பான வர்த்தமானி அறிவித்தலை வெளியிட அரசாங்கம் நடவடிக்கை எடுக்க வேண்டும் எனவும் அவர் வலியுறுத்தினார். இந்த நாட்டில் வாழும் ஒவ்வொரு இலங்கையருக்கும் சமமான மரியாதையும் உரிமையும் கிடைக்க வேண்டும் என்பதே தமது நிலைப்பாடு என ஜீவன் தொண்டமான் தெரிவித்தார். <iframe class="ql-video" frameborder="0" allowfullscreen="true" src="https://www.youtube.com/embed/xhGK8Q_AruU?showinfo=0"></iframe>

மலையக மக்களுக்கு சம உரிமையும் மரியாதையும் கிடைக்க வேண்டும் - ஜீவன் எம்.பி.

மலையக மக்களுக்கு சம உரிமையும் மரியாதையும் கிடைக்க வேண்டும் - ஜீவன் எம்.பி.

You may also like