'காவந்திஸ்ஸ' யானை உயிரிழந்த சம்பவம் தொடர்பில் முழுமையான விசாரணைகளை மேற்கொள்வதற்காக ஜனாதிபதி அநுர குமார திஸாநாயக்க விசேட நிபுணர் குழுவொன்றை நியமித்துள்ளார். கடந்த ஒக்டோபர் 16ஆம் திகதி அல்லது அதனை அண்மித்த நாட்களில் இடம்பெற்ற இந்தச் சம்பவத்தின் சூழ்நிலைகள், உடனடி மற்றும் அடிப்படைக் காரணங்கள் குறித்து விசாரணை நடத்துவதுடன், யானைக்கு சிகிச்சை வழங்கப்பட்டபோது ஏதேனும் குறைபாடுகள் அல்லது கவனக்குறைவு ஏற்பட்டுள்ளதா என்பதையும் கண்டறிவது இக்குழுவின் முக்கிய பணிகளாகும். ஜனாதிபதி ஊடகப் பிரிவு வெளியிட்டுள்ள அறிக்கையின்படி, முன்னாள் அமைச்சின் செயலாளர் ஏ.எச். சரத் விஜயசிங்க தலைமையில் இந்தக் குழு அமைக்கப்பட்டுள்ளது. பேராசிரியர் டி. சமிந்த பெர்னாண்டோ, பேராசிரியர் ஏ.ஜி. அனில் புஷ்பகுமார, பேராசிரியர் யு.கே. கலிங்க பத்மலால், கலாநிதி ஜகத் குணவர்தன மற்றும் சட்டத்தரணி சரக்க ஜயரத்ன ஆகியோர் குழுவின் உறுப்பினர்களாக நியமிக்கப்பட்டுள்ளனர். ஜனாதிபதியின் மேலதிக செயலாளர் டபிள்யூ.டபிள்யூ. ஹாரிசன் குழுவின் ஒருங்கிணைப்பாளராகச் செயல்படுவார். மேலும், வன யானைகளின் நலனை உறுதிப்படுத்துவதற்கான நிலையான செயல்பாட்டு நடைமுறைகளை (SOPs) உருவாக்குவதும், யானைகளைப் பாதுகாப்பதற்கான தேசியத் திட்டம் தொடர்பான பரிந்துரைகளை முன்வைப்பதும் இக்குழுவிடம் ஒப்படைக்கப்பட்டுள்ளன. தமது பணிகளை முன்னெடுப்பதற்காக உள்நாட்டு மற்றும் சர்வதேச நிபுணர்களின் உதவியைப் பெற்றுக்கொள்ளவும் குழுவிற்கு அதிகாரம் வழங்கப்பட்டுள்ளது. 'காவந்திஸ்ஸ' யானையின் மரணம் தொடர்பான இறுதி விசாரணை அறிக்கை, வன யானைகளின் நலனுக்கான நிலையான செயல்பாட்டு நடைமுறைகளின் வரைவு மற்றும் யானைகளைப் பாதுகாப்பதற்கான தேசியத் திட்டம் தொடர்பான பரிந்துரைகள் அடங்கிய முழுமையான அறிக்கையை 30 நாட்களுக்குள் ஜனாதிபதியிடம் சமர்ப்பிக்க வேண்டும் என அறிவிக்கப்பட்டுள்ளது.

'காவந்திஸ்ஸ' யானையின் மரணம் - ஜனாதிபதியால் விசேட நிபுணர் குழு நியமனம்!

'காவந்திஸ்ஸ' யானையின் மரணம் - ஜனாதிபதியால் விசேட நிபுணர் குழு நியமனம்!

You may also like