வலி வடக்கில் இராணுவக் கட்டுப்பாட்டில் உள்ள காணிகளை விடுவிக்கக் கோரி முன்னெடுக்கப்படும் போராட்டத்தில் கலந்துகொண்டமை தொடர்பில், ஈ.பி.டி.பி. கட்சியின் வேலணை பிரதேச சபை உறுப்பினர் அனுஷியா ஜெயகாந்திடம் பலாலி பொலிஸார் இன்று (21) வாக்குமூலம் பதிவு செய்துள்ளனர். பலாலி மற்றும் மயிலிட்டி பகுதிகளில் இராணுவக் கட்டுப்பாட்டில் உள்ள காணிகளை விடுவிக்குமாறு கோரி, அப்பகுதி மக்கள் தொடர்ச்சியாகப் போராட்டங்களை முன்னெடுத்து வருகின்றனர். இந்தப் போராட்டங்களுக்கு ஈ.பி.டி.பி. கட்சியினரும் ஆதரவு தெரிவித்து வருகின்றனர். இந்நிலையில், கடந்த 16ஆம் திகதி பலாலியில் இடம்பெற்ற போராட்டத்தின்போது பொதுமக்களுக்கு இடையூறு ஏற்படும் வகையில் செயற்பட்டதாகக் குற்றஞ்சாட்டப்பட்டு, அனுஷியா ஜெயகாந்த் உள்ளிட்ட ஐவருக்கு எதிராக பலாலி பொலிஸார் வழக்குப் பதிவு செய்துள்ளனர். இதன் தொடர்ச்சியாக, இன்று பலாலி பொலிஸ் நிலையத்திற்கு அழைக்கப்பட்ட அனுஷியா ஜெயகாந்திடம் பொலிஸார் முறையான வாக்குமூலத்தைப் பெற்றுக்கொண்டனர். விசாரணையின்போது சட்டத்தரணி ஸ்ரனிஸ்லஸ் செலஸ்ரின், ஈ.பி.டி.பி கட்சியின் ஊடகச் செயலாளர் ஸ்ரீகாந் பன்னீர்செல்வம் மற்றும் கட்சியின் வலி வடக்கு நிர்வாகச் செயலாளர் இ. ஜெயபாலசிங்கம் ஆகியோரும் அவருடன் சென்றிருந்தனர். வாக்குமூலம் பதிவு செய்யப்பட்ட பின்னர் பொலிஸ் நிலையத்திலிருந்து வெளியேறிய ஈ.பி.டி.பி உறுப்பினர்கள், மயிலிட்டியில் இடம்பெற்ற மக்கள் போராட்டத்திலும் கலந்துகொண்டனர்.

வலி வடக்கு காணி விடுவிப்பு போராட்டம் - ஈ.பி.டி.பி. உறுப்பினரிடம் வாக்குமூலம்

வலி வடக்கு காணி விடுவிப்பு போராட்டம் - ஈ.பி.டி.பி. உறுப்பினரிடம் வாக்குமூலம்

You may also like