முன்னாள் ஜனாதிபதி கோட்டாபய ராஜபக்ஷவுக்கு எதிராக ஈஸ்டர் ஞாயிறு தின பயங்கரவாதத் தாக்குதல் தொடர்பில் முன்னெடுக்கப்படும் விசாரணைகள் வலுவான கட்டத்தை எட்டியுள்ளதாக சட்டமா அதிபர் திணைக்களத்தின் மேலதிக சொலிசிட்டர் ஜெனரல் திலீப பீரிஸ் தெரிவித்துள்ளார். மருத்துவ சிகிச்சைக்காக வெளிநாடு செல்ல அனுமதி கோரி கோட்டாபய ராஜபக்ஷ தாக்கல் செய்த கோரிக்கை தொடர்பில், கோட்டை நீதவான் நீதிமன்றத்தில் இன்று (21) நடைபெற்ற வழக்கு விசாரணையின்போதே அவர் இதனைத் தெரிவித்துள்ளார். எனினும், மனிதாபிமான அடிப்படையில் மருத்துவ சிகிச்சைக்காக அவர் வெளிநாடு செல்ல அனுமதிக்க முடியும் என்றும் மேலதிக சொலிசிட்டர் ஜெனரல் குறிப்பிட்டுள்ளார். ஈஸ்டர் ஞாயிறு தின பயங்கரவாதத் தாக்குதல் தொடர்பான விசாரணைகளைத் திசைதிருப்பியதாகக் கூறப்படும் குற்றச்சாட்டில், அரச புலனாய்வுச் சேவையின் முன்னாள் பணிப்பாளரும் ஓய்வுபெற்ற மேஜர் ஜெனரலுமான சுரேஷ் சலே உள்ளிட்ட மூவருக்கு எதிரான வழக்கு இன்று மீண்டும் விசாரணைக்கு எடுத்துக்கொள்ளப்பட்டது. இதன்போது, குறித்த வழக்கில் முன்னாள் ஜனாதிபதி ஒருவர் சந்தேகநபராகப் பெயரிடப்படாத நிலையில், அவருக்கு எதிரான விசாரணைகளின் தற்போதைய நிலைமை குறித்து கோட்டை நீதவான் பசன் அமரசேன கேள்வி எழுப்பினார். அதற்குப் பதிலளித்த மேலதிக சொலிசிட்டர் ஜெனரல் திலீப பீரிஸ், முன்னாள் ஜனாதிபதி கோட்டாபய ராஜபக்ஷவுக்கு எதிரான விசாரணைகள் தற்போது வலுவான நிலையில் இருப்பதாகத் தெரிவித்தார். சிங்கப்பூரிலுள்ள மவுண்ட் எலிசபெத் மருத்துவமனையில் மேற்கொள்ளப்பட்ட இதய அறுவைச் சிகிச்சைக்குப் பின்னரான மருத்துவப் பரிசோதனைகள் மற்றும் சிகிச்சைகளுக்காக, நவம்பர் மாத நடுப்பகுதி வரை இரண்டு வார காலத்திற்கு வெளிநாடு செல்ல அனுமதிக்குமாறு கோட்டாபய ராஜபக்ஷ கோரியுள்ளதாகவும் அவர் நீதிமன்றத்தில் தெரிவித்தார். ஏனைய சந்தேகநபர்கள் தொடர்பில் மேலும் விசாரணைகள் முன்னெடுக்கப்பட வேண்டியுள்ளதுடன், முன்னாள் ஜனாதிபதி தாக்கல் செய்த வழக்கொன்று மேன்முறையீட்டு நீதிமன்றத்தில் நிலுவையில் இருப்பதாலும் அவர் இதுவரை சந்தேகநபராகப் பெயரிடப்படவில்லை என்றும் மேலதிக சொலிசிட்டர் ஜெனரல் விளக்கமளித்தார். சுரேஷ் சலே தொடர்பான விசாரணைகள் தீவிரம் ஈஸ்டர் தாக்குதல் தொடர்பான விசாரணைகளைத் திசைதிருப்பியதாகக் கூறப்படும் குற்றச்சாட்டில், சுரேஷ் சலே உள்ளிட்ட மூவருக்கு எதிரான வழக்கின் விசாரணையின்போது, குற்றப் புலனாய்வுத் திணைக்களத்தின் தடுப்புக் காவலில் உள்ள சுரேஷ் சலேவின் நிலைமை குறித்தும் நீதவான் விசாரித்தார். சுரேஷ் சலேவை அண்மையில் நேரில் பார்வையிட்டபோது, குற்றப் புலனாய்வுத் திணைக்கள அதிகாரிகள் தன்னை நன்றாக நடத்துவதாக அவர் தெரிவித்ததாக நீதவான் குறிப்பிட்டார். அவர் கோரிய உணவு வகைகள் வழங்கப்பட்டனவா என்றும் அதிகாரிகளிடம் கேள்வி எழுப்பினார். அவரது கோரிக்கைகள் நிறைவேற்றப்பட்டதாக அதிகாரிகள் பதிலளித்தனர். சுரேஷ் சலே சார்பில் ஆஜரான சட்டத்தரணி அசித் சிறிவர்தன, தனது கட்சிக்காரரை வெலிசறை சிறைச்சாலைக்கு மாற்றுவதற்குப் பதிலாக குற்றப் புலனாய்வுத் திணைக்களத்திலேயே வைத்திருப்பது சிறந்தது எனத் தெரிவித்தார். மேலும், சுரேஷ் சலேவை மருத்துவமனையில் அனுமதித்து சிகிச்சை அளிப்பதற்குத் துரிதமாக நடவடிக்கை எடுத்த மேலதிக சொலிசிட்டர் ஜெனரலுக்கும் அவர் நன்றி தெரிவித்தார். சாரா ஜஸ்மின் தொடர்பில் புதிய தகவல் சுரேஷ் சலே தொடர்பான மேலதிக விசாரணைகள் குறித்து நீதிமன்றத்தில் அறிக்கையொன்றைச் சமர்ப்பித்த மேலதிக சொலிசிட்டர் ஜெனரல் திலீப பீரிஸ், கடந்த வாரம் முக்கிய சாட்சிகள் சிலரிடம் வாக்குமூலங்கள் பெறப்பட்டதாகத் தெரிவித்தார். அவர்களில், இராணுவப் புலனாய்வுப் பிரிவுக்குத் தகவல்களை வழங்கிய மைக்கேல் சேவியர் வில்வரசிங்கம் அல்லது ராஜன் என அழைக்கப்படும் நபரும் ஒருவர் என அவர் குறிப்பிட்டார். ஈஸ்டர் தாக்குதலுக்கு முன்னர், இன்சாப் அஹமட் என்பவரின் மாமனாரான அலாவுதீன் என்ற வர்த்தகரின் நண்பரான தீபன் என்பவரின் வீட்டில் இடம்பெற்றதாகக் கூறப்படும் சந்தேகத்திற்கிடமான சந்திப்பு குறித்து விசாரிப்பதற்காக ராஜன் அனுப்பப்பட்டதாக நீதிமன்றத்தில் தெரிவிக்கப்பட்டது. அந்த வீட்டில் கறுப்பு புர்கா அணிந்த பெண்ணொருவரும் மற்றொரு ஆணும் இருந்ததாகவும், அவர்கள் மட்டக்களப்பு பிரதேசத்துக்குரிய தமிழில் உரையாடியதாகவும் மேலதிக சொலிசிட்டர் ஜெனரல் தெரிவித்தார். பின்னர் தொலைக்காட்சி செய்திகளைப் பார்த்தபோது, அன்றைய தினம் தான் கண்ட பெண் சாரா ஜஸ்மின் என ராஜன் அடையாளம் கண்டதாகவும் அவர் குறிப்பிட்டார். இந்தத் தகவலை ராஜன், இராணுவக் கோப்ரல் சுரங்கவிடம் தெரிவித்தபோது, அதனைப் பெரிதுபடுத்த வேண்டாம் என்றும் அமைதியாக இருக்குமாறும் கூறப்பட்டதாக நீதிமன்றத்தில் தெரிவிக்கப்பட்டது. இந்தத் தகவல்கள் வெளிப்படாமல் தடுக்கப்பட்டமை சுரேஷ் சலேவின் அறிவுறுத்தலின் பேரில் இடம்பெற்றதாக விசாரணைக் குழு தரப்பில் குற்றஞ்சாட்டப்பட்டது. இவை விசாரணை தரப்பினால் முன்வைக்கப்பட்ட குற்றச்சாட்டுகள் என்பதுடன், அவை நீதிமன்றத்தில் நிரூபிக்கப்பட்ட குற்றங்களாகக் கருதப்பட முடியாது. கருணா அம்மானுக்குப் போலி கடவுச்சீட்டு தயாரித்ததாகக் குற்றச்சாட்டு முன்னாள் விடுதலைப் புலிகள் அமைப்பின் உறுப்பினரான கருணா அம்மானுக்கு போலியான இராஜதந்திரக் கடவுச்சீட்டு ஒன்றைத் தயாரித்து பிரித்தானியாவுக்கு அனுப்பியதாக சுரேஷ் சலே மீது குற்றச்சாட்டு முன்வைக்கப்பட்டுள்ளதாகவும் மேலதிக சொலிசிட்டர் ஜெனரல் தெரிவித்தார். குறித்த கடவுச்சீட்டை சுரேஷ் சலே மற்றும் அன்சார் என அழைக்கப்படும் நபர் தயாரித்துக் கொடுத்ததாக கருணா அம்மான் தெரிவித்துள்ளதாகவும் நீதிமன்றத்தில் குறிப்பிடப்பட்டது. கோக்கில துஷ்மந்த என்ற நபரின் பெயரில் அந்தக் கடவுச்சீட்டு தயாரிக்கப்பட்டதாகக் கூறப்பட்டாலும், அவ்வாறான நபர் ஒருவர் உண்மையில் இருந்ததாகத் தெரியவில்லை என்றும் தெரிவிக்கப்பட்டது. இந்த விவகாரம் தொடர்பில் வெளிவிவகார அமைச்சின் ஊடாக மேலதிக விசாரணைகளை முன்னெடுக்கத் திட்டமிட்டுள்ளதாகவும் மேலதிக சொலிசிட்டர் ஜெனரல் கூறினார். சுரேஷ் சலேவிடம் பல கடவுச்சீட்டுகள் இருந்ததாகக் கூறப்படும் குற்றச்சாட்டுக்கு அவரது சட்டத்தரணி மறுப்புத் தெரிவித்தார். கடவுச்சீட்டு இலக்கங்கள் மற்றும் அவை பெறப்பட்ட விதம் தொடர்பான தெளிவான விபரங்கள் முன்வைக்கப்பட வேண்டும் என்றும் அவர் வலியுறுத்தினார். கருணா அம்மானுக்குக் கடவுச்சீட்டு தயாரிக்கப்பட்டதாகக் கூறப்படும் காலப்பகுதியில் தனது கட்சிக்காரர் பிரான்ஸில் இருந்ததாகவும், அங்கிருந்துகொண்டு இலங்கையில் கடவுச்சீட்டு தயாரிப்பது எவ்வாறு சாத்தியம் என்றும் அவர் கேள்வி எழுப்பினார். இந்தக் குற்றச்சாட்டுகள் தொடர்பான மேலதிக விசாரணைகள் தொடர்ந்து முன்னெடுக்கப்படவுள்ளன. சிறைச்சாலையிலுள்ள மூவரிடம் வாக்குமூலம் பெற அனுமதி கோரல் ஈஸ்டர் தாக்குதல் தொடர்பான பிரதான வழக்கில் குற்றவாளிகளாகத் தீர்ப்பளிக்கப்பட்ட மூவரிடம் சிறைச்சாலையில் வைத்து வாக்குமூலம் பெறுவதற்கு அனுமதி வழங்குமாறும் மேலதிக சொலிசிட்டர் ஜெனரல் நீதிமன்றத்திடம் கோரினார். மில்ஹான், ரிஸ்கான் மற்றும் செய்னுல் ஆப்தீன் ஆகியோரிடம் வாக்குமூலம் பெறுவதற்கு அனுமதி கோரப்பட்டது. பிரதான வழக்கில் குற்றவாளிகளாகத் தீர்ப்பளிக்கப்பட்டிருந்தபோதிலும், உண்மையில் தாக்குதலுடன் தொடர்புடைய சிலர் வெளியில் இருப்பதாக அந்த மூவரும் நீதிபதிகள் குழுவின் முன்னிலையில் தெரிவித்ததாக மேலதிக சொலிசிட்டர் ஜெனரல் கூறினார். இந்தக் கூற்றுகள் தொடர்பில் மேலதிக விசாரணைகள் மேற்கொள்ளப்பட வேண்டியுள்ளதாகவும் அவர் தெரிவித்தார். இதற்கிடையில், சுரேஷ் சலே சார்பில் ஆஜரான ஜனாதிபதி சட்டத்தரணி ஷவீந்திர பெர்னாண்டோ, வழக்கில் வெறுமனே வாக்குமூலங்கள் மட்டுமே முன்வைக்கப்படுவதாகவும், தனது கட்சிக்காரருக்கு எதிரான குற்றச்சாட்டுகளை நிரூபிக்கும் ஆதாரங்கள் முன்வைக்கப்படவில்லை என்றும் வாதிட்டார். நவம்பர் 25ஆம் திகதி மீண்டும் வழக்கு இரு தரப்பினரதும் சமர்ப்பணங்களைக் கருத்திற்கொண்ட கோட்டை நீதவான் பசன் அமரசேன, விசாரணை தரப்பினால் முன்வைக்கப்பட்ட கோரிக்கைகளுக்கு அனுமதி வழங்கினார். விசாரணைகளின் முன்னேற்றம் தொடர்பான அறிக்கையைச் சமர்ப்பிப்பதற்காக வழக்கை எதிர்வரும் நவம்பர் 25ஆம் திகதி மீண்டும் விசாரணைக்கு எடுத்துக்கொள்ளுமாறு நீதவான் உத்தரவிட்டார்.

கோட்டாவுக்கு எதிரான விசாரணைகள் தீவிரம் - நீதிமன்றத்தில் அறிவித்தார் சட்டமா அதிபர்

கோட்டாவுக்கு எதிரான விசாரணைகள் தீவிரம் - நீதிமன்றத்தில் அறிவித்தார் சட்டமா அதிபர்

You may also like