சிறைச்சாலை நிலையியற் கட்டளைகளில் அண்மையில் மேற்கொள்ளப்பட்ட திருத்தங்களின் அடிப்படையில், சிறைத்தண்டனை விதிக்கப்பட்டுள்ள கலகொட அத்தே ஞானசார தேரரின் காவி உடை அகற்றப்பட்டதால் ஏற்பட்டுள்ள பிரச்சினைக்குத் தீர்வு காண முடியுமா என்பது தொடர்பில் சிறைச்சாலைகள் ஆணையாளர் நாயகத்திடம் கேட்டறிந்து, நவம்பர் 18ஆம் திகதி நீதிமன்றத்துக்கு அறிவிக்குமாறு மேன்முறையீட்டு நீதிமன்றம் நேற்று சட்டமா அதிபருக்கு உத்தரவிட்டது. நீதிமன்ற அவமதிப்புக் குற்றச்சாட்டில் சிறைத்தண்டனை விதிக்கப்பட்ட பின்னர், ஞானசார தேரரின் காவி உடையை அகற்றுவதற்குச் சிறைச்சாலை அதிகாரிகள் எடுத்த தீர்மானத்தை வலுவிழக்கச் செய்யும் உத்தரவைப் பிறப்பிக்குமாறு கோரி தாக்கல் செய்யப்பட்ட மனுக்கள் நேற்று விசாரணைக்கு எடுத்துக்கொள்ளப்பட்டன. இதன்போதே பிரதிவாதிகள் சார்பில் முன்னிலையான பிரதி சொலிசிட்டர் ஜெனரல் மனோஹர ஜயசிங்கவுக்கு நீதிமன்றம் இந்த உத்தரவைப் பிறப்பித்தது. ஞானசார தேரரின் காவி உடை அகற்றப்பட்டதைச் சவாலுக்குட்படுத்தி, தீனியாவல பாலித தேரர், பேராசிரியர் இந்துராகாரே தம்மரதன தேரர், உலப்பனே சுமங்கல தேரர், அகலகட சிறிசுமன தேரர் உள்ளிட்ட பிக்குகள் குழுவினரால் இந்த மனுக்கள் தாக்கல் செய்யப்பட்டிருந்தன. அமல் ரணராஜா, மஹேன் கோபல்லவ, பிரியந்த பெர்னாண்டோ ஆகிய நீதியரசர்கள் அடங்கிய அமர்வு முன்னிலையில் மனுக்கள் எடுத்துக்கொள்ளப்பட்டன. இதன்போது பிக்குகள் சிலர் சார்பில் முன்னிலையான ஜனாதிபதி சட்டத்தரணி மனோஹர டி சில்வா, சிறைச்சாலை நிலையியற் கட்டளை 356இல் மேற்கொள்ளப்பட்ட திருத்தம் தொடர்பில் நீதிமன்றத்தில் விளக்கமளித்தார். பிக்கு ஒருவர் நீதிமன்றத்தால் குற்றவாளியாகக் காணப்பட்டு சிறைத்தண்டனை விதிக்கப்பட்டால், அது தொடர்பில் அவர் சார்ந்துள்ள நிக்காயவுக்கு அறிவிக்கப்பட வேண்டும் என்றும் சம்பந்தப்பட்ட பிக்கு தொடர்பில் அந்த நிக்காய நடவடிக்கை எதனையும் எடுக்காவிட்டால், சிறைச்சாலைகள் ஆணையாளர் நாயகம் அது தொடர்பில் செயற்பட முடியும் என்றும் அந்தத் திருத்தத்தில் குறிப்பிடப்பட்டுள்ளதாக அவர் தெரிவித்தார். எனினும், சிறைச்சாலை நிலையியற் கட்டளைகளில் திருத்தங்கள் மேற்கொள்ளப்பட்டபோதும் அவை தொடர்பில் மதகுருமாருக்கு அறிவித்து அவர்களது கருத்துகளைப் பெறுவதற்கு நடவடிக்கை எடுக்கப்படவில்லை எனவும் அவர் குற்றஞ்சாட்டினார். மற்றுமொரு பிக்குகள் குழுவின் சார்பில் முன்னிலையான ஜனாதிபதி சட்டத்தரணி உதித இஹலஹேவா, நீதிமன்றத்தால் சிறைத்தண்டனை விதிக்கப்பட்ட மத்தியூ பீரிஸ் பாதிரியார், தனது மதகுரு உடையுடனேயே நீதிமன்றங்களில் முன்னிலைப்படுத்தப் பட்டிருந்ததாகச் சுட்டிக்காட்டினார். முன்னாள் பிரதிப் பொலிஸ்மா அதிபர் வாஸ் குணவர்தனவுக்கு மரண தண்டனை விதிக்கப்பட்ட பின்னரும் அவர் வழக்கமாக அணியும் உடையுடனேயே நீதிமன்றத்தில் முன்னிலைப்படுத்தப்பட்டதாகவும் அவர் தெரிவித்தார். இதையடுத்து, அண்மைய திருத்தங்களின் கீழ் ஞானசார தேரரின் காவி உடை தொடர்பான பிரச்சினைக்குத் தீர்வு காண முடியுமா என்பதைச் சிறைச்சாலைகள் ஆணையாளர் நாயகத்திடம் கேட்டறிந்து அறிவிக்குமாறு நீதியரசர்கள் அமர்வு, பிரதி சொலிசிட்டர் ஜெனரல் மனோஹர ஜயசிங்கவுக்கு உத்தரவிட்டது. மனுக்களை எதிர்வரும் நவம்பர் 18ஆம் திகதி மீண்டும் விசாரணைக்கு எடுத்துக்கொள்ளவும் மேன்முறையீட்டு நீதிமன்றம் உத்தரவிட்டது.

ஞானசார தேரர் காவி உடை விவகாரம்: நவம்பர் 18இல் அறிவிக்க உத்தரவு!

ஞானசார தேரர் காவி உடை விவகாரம்: நவம்பர் 18இல் அறிவிக்க உத்தரவு!

You may also like