உயிர்த்த ஞாயிறு தினத் தாக்குதல் சம்பவத்தில் பாதிக்கப்பட்டவர்களுக்கு நீதியை நிலைநாட்ட வேண்டுமெனில், தான் அறிந்த மற்றும் தன்னிடமுள்ள தகவல்களை வெளிப்படுத்தி குற்றவியல் விசாரணைத் திணைக்களத்தின் விசாரணைகளுக்கு ஒத்துழைப்பு வழங்குவதே அரச புலனாய்வுப் பிரிவின் முன்னாள் பிரதானி சுரேஷ் சலே செய்யவேண்டிய ஒரே விடயமென்று அமைச்சரவைப் பேச்சாளர் நளிந்த ஜயதிஸ்ஸ தெரிவித்தார். அரசாங்கத் தகவல் திணைக்களத்தில் நேற்று (16) இடம்பெற்ற அமைச்சரவை முடிவுகளை அறிவிக்கும் வாராந்த செய்தியாளர் மாநாட்டிலேயே இதனைக் குறிப்பிட்டார். அவர் மேலும் கூறியதாவது, சரேஷ் சலே பாதுகாப்புப் பிரிவில் சிறைப்படுத்தப்படவில்லை. தேசிய வைத்தியசாலையில் பாதுகாப்பு மட்டத்தில் சாதாரணமாக நோயாளர் ஒருவரை பராமரிப்பது போன்று வைத்து சிகிச்சைகளை வழங்கி வருகிறோம். தேசிய வைத்தியசாலையில் அவருக்கு தேவையான பாதுகாப்பை பெற்றுக்கொடுத்துள்ளதாக பாதுகாப்பு அதிகாரிகள் அறிவித்திருக்கிறார்கள். சுரேஷ் சலே இடைக்கிடை தனக்கு சிகிச்சைகள் கோரியபோது, எந்தவொரு தாமதமுமின்றி அதனை பெற்றுக்கொடுக்கப்பட்டுள்ளது. உறவுகளை சந்திக்கவும் வாய்ப்பளிக்கப்பட்டுள்ளது. தற்போதும் அவருக்கு வைத்தியசாலையில் உறவுகளை சந்திக்கவும் உறவினர்களால் உணவு பெற்றுக்கொடுக்கவும் அனுமதியளிக்கப்பட்டுள்ளது. இவ்வாறு அவர் கோரும் வசதிகள் பெற்றுக்கொடுக்கப் படுகின்றன. நான் அறிந்த வகையில் அவருக்கென விசேட அறையொன்று நிர்மாணிக்கப்பட வில்லை. இதற்கு முன்னர் தடுப்புக்காவலில் வைக்கப்பட்டிருந்தவர்களை தடுப்புக்காவலில் வைத்திருந்த விதத்தில் அதே இடத்திலேயே அவரும் சிகிச்சைப் பெற்று வருகிறார். இதற்கு முன்னர் இருந்தவர்கள் இவ்வாறு குற்றச்சாட்டு முன்வைத்ததாக நான் அறியவில்லை. சலேவுக்காக புதிதாக அறை எதுவும் நிர்மாணிக்கப்படவில்லை. சாதாரண விதத்திலேயே அவரும் பராமரிக்கப்படுகிறார். இதற்கு முன்னர் இருந்த அரசாங்கங்கள் தடுப்புக்காவலிலுள்ளவர்களுக்கு பின்பற்றிய அதே நடைமுறைகளின் அடிப்படையிலேயே அவரும் பராமரிக்கப்பட்டு வருகிறார். அவருக்கு தேவையான போஷணைகள் வழங்கப்பட்டு வருகின்றன. சாதாரணமாக நோயாளர்கள் வைத்தியசாலையில் சிகிச்சைக்காக அனுமதிக்கப்பட்டதன் பின்னர், உணவின்றி இருப்பார்களாக இருந்தால் மருந்து மற்றும் வேறு போஷாக்கு பொருட்களை வேறு வழிகளில் பெற்றுக்கொடுக்கும்போது ஒருசிலருக்கு அதுபோன்று உடல்நிலை குறைபாடுகள் ஏற்படுவதற்கான வாய்ப்புகள் இருக்கின்றன. அது அவ்வளவு பெரிய விடயமல்ல. அதற்கு ஐ.வி. என்டிபயோடிக்ஸ் வழங்கப்படும். சிறிய சிகிச்சைகள் செய்ய வேண்டிய தேவையேற்பட்டால் அதனையும் செய்வோம். எது எவ்வாறாக இருந்தாலும் அவருக்கான போஷணைகள் பெற்றுக்கொடுக்கப்பட்டு வருகின்றன. சில சந்தர்ப்பங்களில் உயிர்த்த ஞாயிறு தினத் தாக்குதலை அரசியல் கொலையென்று விளக்கம் கொடுத்து, சலேவை அரசியல் கைதி என்று எதிர்க்கட்சிகள் விமர்சிக்கலாம். இதற்காக குழப்பமடைய வேண்டியதில்லை. குழப்பமடைவதாலேயே சிக்கல் ஏற்படுகிறது. விசாரணைகளுக்கு இடையூறு ஏற்படாது. சுரேஷ் சலே யாரையும் காட்டிக்கொடுக்காமல் வாயை திறக்காமல் இருப்பதாக சரத் வீரசேகர கூறியுள்ளார். அவ்வாறான கருத்துகளினால் இதுதொடர்பிலுள்ள தொடர்புகள் குறித்து மக்களுக்கு சில புரிதல்கள் ஏற்படுகின்றன. எப்படியிருந்தாலும், புலனாய்வு அதிகாரி என்ற அடிப்படையிலும் இராணுவ அதிகாரி என்ற அடிப்படையிலும் உயிர்த்த ஞாயிறு தினத் தாக்குதல் சம்பவம் தொடர்பில் தான் அறிந்த விடயங்களை வெளியிடுவதே சுரேஷ் சலே செய்ய வேண்டிய ஒரே விடயமாகும். குற்றவியல் விசாரணை திணைக்கள அதிகாரிகளுக்கு ஒத்துழைப்பு வழங்க வேண்டும். மாறாக, குற்றவியல் விசாரணை அதிகாரியை நீக்குவதாகக்கோரி போராட்டம் செய்யக்கூடாது. அதற்கு பதிலாக, இந்தத் தாக்குதல் சம்பவம் தொடர்பில் தான் அறிந்த அல்லது கைபேசி, கணினியிலுள்ள தகவல்களை பெற்றுக்கொடுப்பதே அவசியமாகும். சரத் வீரசேகர கூறுவதுபோன்று எதிர்காலத்தில் நாட்டுக்கு பாதிப்பு ஏற்படுத்தக் கூடிய தகவல்கள் சலேவுக்கு தெரியுமாக இருந்தால் அதனை நாட்டு மக்களுக்கு அறிவிக்க வேண்டும். தனக்கு தெரியாவிட்டால் அறிந்தவர்களிடமிருந்து பெற்றுக்கொடுப்பதே புலனாய்வு அதிகாரியின் கடமையாகும். சலே பிரத்தியேகமாக புலனாய்வுப் பிரிவை முன்னெடுத்து சென்றாரா என்பது தெரியவில்லை. ஆனால் அவர் அரச புலனாய்வு அதிகாரியாகவே கடமையாற்றினார். அப்படியென்றால், அவர் அரசுக்கே தகவல்களை வழங்க வேண்டும்’’ என்றார்.

உண்மைகளை சலே வெளியிட வேண்டும் - நளிந்த

உண்மைகளை சலே வெளியிட வேண்டும் - நளிந்த

You may also like