சுதந்திர தின விழாவை முன்னிட்டு வடக்கு மாகாணத்தின் ஆளுநர் நா.வேதநாயகனின் உரை. மாண்புமிகு மதகுருமார்களே, இந்தியத் துணைத்தூதுவர் அவர்களே, மாகாண பிரதம செயலாளர் உள்ளிட்ட அரச உத்தியோகத்தர்களே, முப்படை மற்றும் பொலிஸ் உயரதிகாரர்களே, அன்பிற்குரிய வடக்கு மாகாண மக்களே, உங்கள் அனைவருக்கும் எனது முதற்கண் வணக்கங்கள். இன்று, இலங்கைத் திருநாடு தனது 78ஆவது சுதந்திர தினத்தைக் கொண்டாடுகின்றது. வரலாற்றிலேயே முதன்முறையாக, ஜனாதிபதி செயலகத்தின் விசேட பணிப்புரைக்கு அமைவாக, இம்முறை சுதந்திர தின நிகழ்வானது மாகாண மட்டத்தில், எமது மாகாண சபையின் ஊடாக ஏற்பாடு செய்யப்பட்டு வெகுவிமர்சையாகக் கொண்டாடப்படுகின்றது. அதிகாரப் பரவலாக்கத்தின் ஒரு முக்கிய சமிக்ஞையாகவும், மாகாணங்களின் முக்கியத்துவத்தை மத்திய அரசாங்கம் அங்கீகரித்துள்ளதன் அடையாளமாகவும் இந்த ஏற்பாட்டை நான் பார்க்கின்றேன். இந்த வரலாற்றுச் சிறப்புமிக்க தருணத்தில், வடக்கு மாகாணத்தின் ஆளுநராக உங்கள் முன் உரையாற்றுவதில் நான் பெருமகிழ்ச்சி அடைகின்றேன். நண்பர்களே, சுதந்திரம் என்பது வெறுமனே ஒரு கொடியேற்ற நிகழ்வோ அல்லது ஒரு நாள் கொண்டாட்டமோ அல்ல. அது ஒரு தேசத்தின் ஆன்மா. அந்தத் தேசத்தில் வாழும் ஒவ்வொரு குடிமகனும், எவ்வித அச்சமுமின்றி, சம உரிமையுடன், தன்மானத்துடன், பொருளாதாரச் சுபீட்சத்துடன் வாழ்வதே உண்மையான சுதந்திரமாகும். கடந்த ஏழு தசாப்தங்களுக்கும் மேலாக, குறிப்பாக வடக்கு மாகாண தமிழ் மக்களைப் பொறுத்தவரையில், இந்தச் சுதந்திர தினம் என்பது ஒரு கொண்டாட்ட நாளாக இருந்ததை விட, நிறைவேறாத எதிர்பார்ப்புகளையும், தீர்க்கப்படாத பிரச்சினைகளையும் நினைவுகூரும் ஒரு நாளாகவே இருந்து வந்திருப்பதை நான் அறிவேன். கடந்த காலங்களில் ஏற்பட்ட கசப்பான அனுபவங்கள், போரின் வடுக்கள் மற்றும் அரசியல் ரீதியான ஏமாற்றங்கள் காரணமாக, இந்த நாளை ஒரு 'கரிநாளாக' பார்க்கும் மனநிலை எம்மக்கள் மத்தியில் இயல்பாகவே இருந்து வந்திருக்கிறது என்பதையும் நான் புரிந்து கொள்கின்றேன்.&nbsp; ஆனால், அன்பான மக்களே! காலம் மாறிக் கொண்டிருக்கிறது. மாற்றத்துக்கான ஒரு புதிய சகாப்தத்தில் நாம் இப்போது அடியெடுத்து வைத்திருக்கின்றோம். அந்த மாற்றத்தின் மீது நம்பிக்கை வைக்குமாறு உங்களை நான் அன்புடன் அழைக்கின்றேன். ஜனாதிபதி அநுரகுமார திஸாநாயக்கவின் தலைமையிலான தற்போதைய அரசாங்கம், 'சொற்களை விட செயலே முக்கியம்' என்ற அடிப்படையில் பயணித்துக் கொண்டிருக்கின்றது. பல தசாப்தங்களாக விடுவிக்கப்படாமல் இருந்த பொதுமக்களின் காணிகள், இன்று எவ்வித அரசியல் நிபந்தனைகளுமின்றி உரிமையாளர்களிடம் கையளிக்கப்பட்டு வருகின்றன. இது ஒரு நல்லாட்சிக்கான ஆரம்பம். அரசாங்கத்தின் இந்த அக்கறையானது வெறும் அரசியல் பேச்சுகளுக்குள் முடங்கிவிடவில்லை. அண்மையில் எமது மாகாணத்தைப் புரட்டிப் போட்ட 'டித்வா' சூறாவளிப் பேரனர்த்தத்தின் போது, மத்திய அரசாங்கம் எமக்கு வழங்கிய ஒத்துழைப்பு இதற்குச் சிறந்த சான்றாகும். பாதிக்கப்பட்ட எமது உட்கட்டமைப்பு வசதிகளை மீளமைக்கவும், மக்களின் வாழ்வாதாரத்தைக் கட்டியெழுப்பவும் ஜனாதிபதி அநுரகுமார திஸாநாயக்கவின் அரசாங்கம், போதிய நிதியை எவ்வித தாமதமுமின்றி வடக்கு மாகாண சபைக்கு விடுவித்துள்ளது. வடக்கு மாகாணத்தின் மீள்கட்டுமானப் பணிகளுக்கென வரவு-செலவுத் திட்டத்தில் ஒதுக்கப்பட்டுள்ள நிதியானது, கடந்த காலங்களை விடப் பல மடங்கு அதிகமாகும். வடக்கின் வளர்ச்சி மீது மத்திய அரசாங்கம் கொண்டுள்ள இந்த விசேட கரிசனை, நாம் தனித்து விடப்படவில்லை என்பதை உறுதிப்படுத்துகின்றது. இன்று தேசம் முழுவதும் ஒரு புதிய மறுமலர்ச்சிப் பாதையில் பயணிக்கின்றது. மாண்புமிகு ஜனாதிபதியின் வழிகாட்டலில் முன்னெடுக்கப்படும் தேசிய வேலைத்திட்டங்கள், வெறுமனே கொழும்புக்கு மட்டுப்படுத்தப்பட்டவை அல்ல. அவை வடக்கின் ஒவ்வொரு கிராமத்தையும் சென்றடைய வேண்டும். 'கிளீன் சிறிலங்கா': எமது சூழலைத் தூய்மையாக வைப்பது மட்டுமல்ல, எமது நிர்வாகக் கட்டமைப்பையும் ஊழலற்றதாக, தூய்மையாக மாற்றுவதே இதன் நோக்கம். வடக்கின் நகரங்கள் மற்றும் கிராமங்களைச் சுத்தமாகவும், பசுமையாகவும் மாற்றுவதில் நாம் முன்னோடிகளாகத் திகழ வேண்டும். 'டிஜிட்டல் மயமாக்கல்': அரச சேவைகள் மக்களைச் சென்றடைவதில் உள்ள தாமதங்களையும், இடையில் இடம்பெறும் ஊழல்களையும் ஒழிப்பதற்கு டிஜிட்டல் தொழில்நுட்பமே ஒரே வழியாகும். வடக்கு மாகாணம் கல்வியில் சிறந்த மாகாணம். எனவே, இந்த டிஜிட்டல் புரட்சியில் நாம் முழுமையாகப் பங்காற்றி, நவீன தொழில்நுட்பத்துடன் கூடிய வினைத்திறனான அரச சேவையை எமது மக்களுக்கு வழங்க வேண்டும். 'வறுமை ஒழிப்பு': இலங்கையிலேயே வறுமைச் சுட்டி அதிகமாக உள்ள மாவட்டங்கள் எமது மாகாணத்தில்தான் உள்ளன என்ற கசப்பான உண்மையை நாம் ஏற்கத்தான் வேண்டும். அரசாங்கம் முன்னெடுக்கும் வறுமை ஒழிப்புத் திட்டங்களைச் சரியாகப் பயன்படுத்தி, எமது மக்களைப் பொருளாதார ரீதியாகத் தலைநிமிரச் செய்ய வேண்டும். 'போதை ஒழிப்பு': எமது எதிர்கால சந்ததியினரான இளைஞர் சமுதாயத்தைப் போதைவஸ்து என்ற அரக்கனிடமிருந்து காக்க வேண்டிய பெரும் பொறுப்பு எமக்குள்ளது. ஜனாதிபதியின் போதை ஒழிப்புத் திட்டத்திற்கு எமது பூரண ஒத்துழைப்பை வழங்கி, 'போதையற்ற வடக்கு மாகாணத்தை' நாம் உருவாக்க வேண்டும். 'பிரஜா சக்தி': அபிவிருத்தியில் மக்களின் நேரடிப் பங்களிப்பை உறுதி செய்யும் 'பிரஜா சக்தி' திட்டம் மூலம், கிராமியப் பொருளாதாரத்தை வலுப்படுத்த வேண்டும். இந்தத் தேசிய திட்டங்கள் அனைத்தும் அரசியல் கட்சிகளுக்கோ அல்லது தனியொரு அரசாங்கத்துக்கோ உரியவை அல்ல. இவை நாட்டு மக்களுக்கானவை. இவற்றை நாம் சரியாகப் பயன்படுத்திக் கொள்ள வேண்டும். அன்பானவர்களே, அரசியல் உரிமைகளுக்காகக் குரல் கொடுப்பது எவ்வளவு முக்கியமோ, அதே அளவு முக்கியமானது எமது பொருளாதார இருப்பைத் தக்கவைத்துக் கொள்வதும் ஆகும். இதனை நாம் தெளிவாகப் புரிந்து கொள்ள வேண்டும். கடந்த காலங்களில் எமது மாகாணத்துக்கு வந்த பல நல்ல அபிவிருத்தித் திட்டங்களை, அவை மத்திய அரசாங்கத்திடமிருந்து வருகின்றன என்பதற்காகவோ அல்லது அரசியல் காரணங்களுக்காகவோ நாம் எதிர்த்திருக்கின்றோம். அல்லது சந்தேகக் கண் கொண்டு பார்த்திருக்கின்றோம். 'எதிர்ப்பதுதான் அரசியல்' என்ற ஒரு பழமைவாத அரசியல் கலாசாரம் இங்கு வேரூன்றியிருப்பதை நாம் மறுக்க முடியாது. ஆனால், இந்த மனப்பாங்கு எமது இளைஞர்களின் எதிர்காலத்தைப் பாதிப்பதை நாம் சிந்திக்க வேண்டும். அபிவிருத்தித் திட்டங்கள் வரும்போது, அவற்றை அரசியல் கண்ணாடி கொண்டு பார்க்காமல், 'இதனால் எமது மக்களுக்கு என்ன நன்மை?', 'எமது இளைஞர்களுக்கு எவ்வளவு வேலைவாய்ப்பு கிடைக்கும்?' என்ற வளர்ச்சிக்கான கண்ணோட்டத்தில் பார்க்கப் பழகிக் கொள்ள வேண்டும். உலகம் வேகமாக இயங்கிக் கொண்டிருக்கிறது. நாம் இன்னும் பழைய கோசங்களை வைத்துக்கொண்டு, வரும் வாய்ப்புகளைத் தட்டிக்கழித்தால், எமது அடுத்த சந்ததி தொழில் தேடி வெளிநாடுகளுக்கும், வெளி மாவட்டங்களுக்கும் செல்லும் நிலை மாறாது. எனவே, மக்களின் நன்மை கருதி வரும் திட்டங்களை அரவணைத்து, அவற்றை வெற்றிபெறச் செய்வதே விவேகமான அரசியலாகும். ஆக்கபூர்வமான விமர்சனங்கள் தேவை, ஆனால் கண்மூடித்தனமான எதிர்ப்புகள் எமது வளர்ச்சியை நாமே தடுப்பதற்குச் சமமாகும். வடக்கு மாகாணம் இன்று கைத்தொழில் மற்றும் முதலீட்டுத் துறையில் ஒரு பாரிய பாய்ச்சலை நிகழ்த்தத் தயாராகிவிட்டது. அண்மையில் யாழ்ப்பாணத்தில் நாம் வெற்றிகரமாக நடாத்திய 'வடக்கு முதலீட்டு உச்சிமாநாடு' சர்வதேச முதலீட்டாளர்களின் கவனத்தை ஈர்த்துள்ளது. மூன்று புதிய முதலீட்டு வலயங்கள் எமது மாகாணத்தில் உருவாகவுள்ளன. பரந்தன் இரசாயனத் தொழிற்சாலை, போன்ற எமது வரலாற்றுப் பெருமை மிக்க தொழிற்சாலைகள் புத்துயிர் பெறவுள்ளன. 'வளமான வடக்கு' என்பது இனி வெறும் கனவல்ல, அது வெகுவிரைவில் நனவாகப் போகும் யதார்த்தம். வடக்கு மாகாணம் என்பது தமிழ் மக்களைப் பெரும்பான்மையாகக் கொண்டிருந்தாலும், இங்கு முஸ்லிம் மற்றும் சிங்கள மக்களும் ஐக்கியமாக வாழ்ந்து வருகின்றார்கள். இந்த மூவின மக்களின் பன்மைத்துவ கலாசாரமே எமது மாகாணத்தின் அழகும், பலமும் ஆகும். வேற்றுமையில் ஒற்றுமை காண்பதே இலங்கையின் சிறப்பு. அந்த வகையில், கடந்த கால வடுக்களை ஆற்றுப்படுத்தி, பரஸ்பர நம்பிக்கையை வளர்த்து, வளமான, அமைதியான, கௌரவமானதொரு எதிர்காலத்தை நோக்கி ஓரணியில் திரள்வோம்.&nbsp;ஜனாதிபதி அவர்கள் முன்னெடுக்கும் 'நேர்மையான தேசம்' என்ற பயணத்தில் நாமும் கைகோர்ப்போம். அரசாங்கம் நீட்டியுள்ள நேசக்கரம் எமது வாழ்வை வளமாக்கட்டும். உங்கள் அனைவருக்கும் இனிய சுதந்திர தின நல்வாழ்த்துகள்! நன்றி.

சுதந்திர தின விழாவை முன்னிட்டு வடக்கு மாகாண ஆளுநரின் உரை

சுதந்திர தின விழாவை முன்னிட்டு வடக்கு மாகாண ஆளுநரின் உரை

You may also like