கொழும்பு கோட்டை நீதிவான் நீதிமன்றம் முன்வைத்த நீதிமன்ற அவமதிப்பு தொடர்பான பரிந்துரையை சவால் செய்து, சர்வஜன பலய கட்சியின் தலைவர் பாராளுமன்ற உறுப்பினர் திலித் ஜயவீர தாக்கல் செய்துள்ள ரிட் மனுவை எதிர்வரும் செப்டெம்பர் 18ஆம் திகதி பரிசீலனைக்கு எடுத்துக்கொள்ள மேன்முறையீட்டு நீதிமன்றம் இன்று (14) உத்தரவிட்டுள்ளது. இந்த மனு, மேன்முறையீட்டு நீதிமன்ற நீதியரசர் ரோஹந்த அபேசூரிய மற்றும் நீதியரசர்களான சமத் மொராய்ஸ், ஆதித்ய படபெந்திகே ஆகியோர் அடங்கிய மூவரடங்கிய நீதியரசர் குழாம் முன்னிலையில் விசாரணைக்கு எடுத்துக்கொள்ளப்படவுள்ளது. தொலைக்காட்சி நேர்காணலொன்றின்போது பாராளுமன்ற உறுப்பினர் திலித் ஜயவீர நீதிமன்றத்தை அவமதிக்கும் வகையில் செயற்பட்டாரா என்பதை தீர்மானிப்பதற்காக, கொழும்பு கோட்டை நீதிவான் நீதிமன்றம் இந்த விடயத்தை மேன்முறையீட்டு நீதிமன்றத்துக்கு பரிந்துரைத்திருந்தது. இந்த மனு தொடர்பான பரிசீலனை இன்று தொடர்ந்து இரண்டாவது நாளாக இடம்பெற்றது. திலித் ஜயவீர சார்பில் முன்னிலையான ஜனாதிபதி சட்டத்தரணி அலி சப்ரி, தனது கட்சிக்காரரின் நிரபராதித்தன்மையை நிரூபிக்கும் வகையில் குறித்த தொலைக்காட்சி நேர்காணலை திறந்த நீதிமன்றத்தில் ஒளிபரப்புமாறு கோரிக்கை விடுத்தார். இதையடுத்து, குறித்த காணொளியை நீதிமன்றத்தில் ஒளிபரப்புவதற்கான தேவையான ஏற்பாடுகளை மேற்கொள்ளுமாறு மேன்முறையீட்டு நீதிமன்ற பதிவாளருக்கு நீதியரசர் குழாம் உத்தரவிட்டது. இருதரப்பு சமர்ப்பணங்களையும் பரிசீலித்த நீதிமன்றம், குறித்த ரிட் மனுவை எதிர்வரும் செப்டெம்பர் 18ஆம் திகதி மூவரடங்கிய நீதியரசர் குழாம் முன்னிலையில் பரிசீலனைக்கு எடுத்துக்கொள்ள உத்தரவிட்டது.

திலித் எம்.பியின் ரிட் மனு செப்டெம்பர் 18ஆம் திகதி பரிசீலனைக்கு!

திலித் எம்.பியின் ரிட் மனு செப்டெம்பர் 18ஆம் திகதி பரிசீலனைக்கு!

You may also like