* நாமலால் எனது வாக்குவங்கி பாதிக்காது - ரணில் திட்டவட்டம்

* ஒரே நாளில் முடிவை மாற்றிய தம்மிக்க பெரேரா-ஆடிப்போன ராஜபக்ஷமார்

* சஜித் வென்றால் பிரதமர் யார் ? - ஐக்கிய மக்கள் சக்திக்குள் மூவரின் பெயர் ஆராய்வு

ஜனாதிபதி ரணில் விக்கிரமசிங்க கடந்த புதன்கிழமை கொழும்பு சினமன் கிரேன்ட் ஹோட்டலில் (07) ஊடகப் பிரதானிகளுடனான சந்திப்பொன்றை நடத்தினார்.

சர்வதேச நாணய நிதியம் அல்லது கடன் வழங்குநர்களுடன் செய்து கொள்ளப்பட்ட உடன்படிக்கைகளின் எந்த அளவுகோலையும் மாற்ற முடியாது எனவும் அவ்வாறு செய்தால் இலங்கைக்கு அந்த நிதியை இழக்க நேரிடும் எனவும் எனவே அனைத்து வேட்பாளர்களும் வாக்காளர்களுக்கு உண்மையைக் கூற வேண்டும்

எனவும் ஜனாதிபதி சுட்டிக்காட்டினார்.

"ஜனாதிபதித் தேர்தலுக்கான கட்டுப்பணம் செலுத்திய பின்னர் முதன்முறையாக ஊடகவியலாளர்களைச் சந்திக்கத் தீர்மானித்தேன்.வேறு எவரும் முன்வராத காரணத்தினால் தான் இன்று நான் ஜனாதிபதியாக செயற்படுகின்றேன். நான் ஜனாதிபதியாக பதவியேற்று இரண்டு வருடங்களுக்குள் நாட்டின் அடிப்படைப் பிரச்சினைகளுக்குத் தீர்வைப் பெற்றுக் கொடுத்தேன்." என்றும் கூறினார் ஜனாதிபதி.

இந்த நிகழ்வில் ஊடகவியலாளர்கள் எழுப்பிய கேள்விகளும் அதற்கு ஜனாதிபதி ரணில் விக்கிரமசிங்க அளித்த பதில்களும் பின்வருமாறு:

— தம்மிக்க பெரேரா போட்டியிலிருந்து விலகிய நிலையில் ஜனாதிபதித் தேர்தலில் நாமல் ராஜபக்ஷவின் பெயர் அறிவிக்கப்பட்டுள்ளது. பொதுஜன பெரமுனவில் உள்ள பெரும்பாலானோர் உங்களுடன் இருக்கிறார்கள். ஆனால் நாமல் ராஜபக்ஷ கடும் போட்டியாக இருப்பார் என்று எதிர்பார்க்கிறீர்களா?

போட்டி எப்படி அமையும் என்பது தெரியவில்லை. நான் யாருடனும் மோதலுக்கு வரவில்லை. நாட்டைக் கட்டியெழுப்பும் கொள்கையை மக்களிடம் முன்வைத்து நாட்டை முன்னோக்கிக் கொண்டு செல்வதற்கான வழியைக் காட்டவே முன்வந்துள்ளேன். அக்கொள்கைகளை விரும்பினால் வாக்களிக்கலாம். மற்றவர்கள் சொல்வதை நான் பொருட்படுத்தப்போவதில்லை.

நாமல் ராஜபக்ஷவும் பொதுஜன பெரமுனவும் பாராளுமன்றத்தில் ஜனாதிபதியை தெரிவு செய்வதற்காக நடத்தப்பட்ட வாக்கெடுப்பில் எனக்கு வாக்களித்தனர். அதற்கு நான் நன்றி தெரிவிக்கிறேன். இரண்டு வருடங்கள் ஒற்றுமையாகப் பணியாற்ற இணங்கினோம். இப்போது இரண்டு ஆண்டுகள் கடந்துள்ளன. வேட்பாளர் ஒருவரை ஆதரிப்பதா அல்லது முன்னிலைப்படுத்துவதா என்பதை அந்தக் கட்சி தீர்மானிக்க வேண்டும். அதற்கிணங்க, இப்போது நாம் நாட்டுக்கு உண்மைகளை சொல்ல வேண்டும்.

இது எனக்கான போராட்டம் அல்ல. எதிர்காலம் என்னவென்பதை மக்களே தீர்மானிக்க வேண்டும். எனது திட்டத்தை ஏற்றால் அதற்கு வாக்களியுங்கள் அல்லது வேறொருவருக்கு வாக்களியுங்கள்.

— வாகன இறக்குமதிக்கு அனுமதியளிப்பதன் மூலம் அதற்கான வரியை அதிகப்படுத்தி ஏனைய பொருட்களுக்கான வரிகளை குறைக்க முடியுமா?

அடுத்த வருடம் முதல் வாகன இறக்குமதிக்கு அனுமதியளிக்க முடியுமென நம்புகிறோம். வருமானம் ஈட்ட எமக்கு சுங்க வரி தேவைப்படுகிறது. மேலும் நமது வெளிநாட்டு கையிருப்பு போதுமான அளவை எட்டும் வரை காத்திருக்கிறோம். அப்போது வாகன இறக்குமதிக்கான வாய்ப்புகளை வழங்க முடியும். வாகன இறக்குமதியின் மூலம் கிடைக்கும் வரி வருமானம் அரசாங்கத்துக்கு ஒரு முக்கிய வருமான ஆதாரமாகும்.

— இந்த வருடம் ஜனாதிபதித் தேர்தலுக்கு ஏராளமான வேட்பாளர்கள் உள்ளனர். உங்களை மீண்டும் இந்த நாட்டின் ஜனாதிபதியாக்க உங்களுக்கு என்ன தகுதி இருக்கிறது. இந்த நாட்டு மக்களுக்காக நீங்கள் என்ன வாக்குறுதியை வழங்குகிறீர்கள்?

அடுத்த 05 வருடங்களில் இந்த நாட்டின் பொருளாதாரத்தை முன்னோக்கிக் கொண்டு சென்று நாட்டின் பொருளாதாரத்தை கட்டியெழுப்புவோம். அதை செயலில் நிரூபித்துள்ளேன். இம்முறை மட்டுமல்ல, 2001ஆம் ஆண்டிலும் வீழ்ச்சியடைந்த பொருளாதாரத்தைக் கொண்ட நாட்டையே நான் பொறுப்பேற்றேன். அப்போதும் அந்த பொறுப்பை நிறைவேற்றி இருக்கிறேன். எனவே, இந்த திட்டத்தை முன்னெடுத்துச் செல்லும் திறன் என்னிடம் உள்ளது.

ஆனால் ஏனைய வேட்பாளர்கள் வாக்குறுதிகளை மட்டுமே கொடுக்கிறார்கள். அந்த வாக்குறுதிகளை எப்படி நிறைவேற்றுவது என்று அவர்களிடம் கேட்க வேண்டும். பழைய அரசியல் முறையில் செயற்பட்டதாலேயே இந்த நாட்டின் பொருளாதாரம் வீழ்ச்சியடைந்தது என்பதை மறந்துவிடக் கூடாது. எனவே, நாட்டு மக்களின் எதிர்காலத்தைக் கருத்தில் கொண்டே இம்முறை ஜனாதிபதித் தேர்தலில் சுயேச்சையாக போட்டியிடத் தீர்மானித்தேன்.

— இந்த ஜனாதிபதித் தேர்தலில் நிறைவேற்று அதிகாரத்துடன் இருந்த இரண்டு ஜனாதிபதிகளின் புதல்வர்கள் போட்டியிடுகின்றனர். மறுபுறம் அரச அதிகாரம் கிடைக்காத இரண்டு வேட்பாளர்கள் போட்டியிடுகின்றனர். இந்த நான்கு முனைச் போட்டியில் மற்ற வேட்பாளர்கள் உங்களுக்கு போட்டியாக அமைவார்களா?

இவை எதுவும் எனக்கு சவால் இல்லை. நான் இந்த நாட்டு மக்களின் எதிர்காலத்துக்காக பணியாற்றுகிறேன். ஆனால் அவர்கள் தமது எதிர்காலத்துக்காக பணியாற்றுகிறார்கள். எனவே, முடிவை நீங்களே எடுக்க வேண்டும். அநுரகுமார திஸாநாயக்க எனது நல்ல நண்பர். அவருடன் எனக்கு எந்தப் பிரச்சினையும் இல்லை. மஹிந்த ராஜபக்ஷவுடன் இணைந்தும் எதிராகவும் அரசியல் செய்துள்ளேன். ஜனாதிபதி பிரேமதாசவை பதவி நீக்கம் செய்ய திட்டமிட்ட போதும் நானே காப்பாற்றினேன்.

— தோட்டத் தொழிலாளர்களுக்கு 1700 ரூபா சம்பளம் தருவதாக வாக்குறுதி அளித்தீர்கள். ஆனால் அந்த வர்த்தமானி தலைகீழாக மாற்றப்பட்டுள்ளது. இம்முறை அந்த 1700 ரூபா கிடைக்குமா?

தொழில் அமைச்சினால் அதற்கான நிதி ஒதுக்கப்பட்டது. பின்னர் சிலர் அதற்கெதிராக நீதிமன்றத்துக்குச் சென்றனர். தற்போது அந்த நிறுவனங்கள் தொழில் அமைச்சருடன் பேச்சுவார்த்தை நடத்தி வருகின்றன. இலங்கையில் இன்று விவசாய பொருளாதாரம் உருவாகியிருக்கிறது.

சில நிறுவனங்களினால் அந்தத் தொகையை வழங்க முடியும் என்றால் மற்றைய நிறுவனங்கள் அதைச் செய்யாமல் இருப்பது நியாயமற்றது. சம்பள அதிகரிப்பை வழங்க முடியாதென கூறும் நிறுவனங்களிடமிருந்து பெறப்பட்ட காணியை சம்பள அதிகரிப்பு வழங்கும் நிறுவனங்களிடம் ஒப்படைக்க வேண்டும். இந்தத் தொகையை தோட்ட மக்களுக்கு வழங்க வேண்டும். அவர்கள் கஷ்டங்களுடன் வாழ்கின்றனர். அதனால் லயன் அறைகள் உள்ள பகுதிகளை கிராமங்களாக கட்மைக்க நடவடிக்கை எடுப்போம்.

— IMF உடனான திட்டத்தின் எதிர்காலம், நடைமுறைச் செயற்பாடுகள், இதன் பின்னர் நாம் எவ்வாறான நடவடிக்கைகளை எடுக்க வேண்டும் என்பது குறித்து உங்களின் நிலைப்பாடு என்ன?

சர்வதேச நாணய நிதியத்துடன் ஒப்பந்தம் செய்துள்ளோம். அதை செயற்படுத்த வேண்டும். இந்த உடன்படிக்கையை நாம் கடைப்பிடித்தால், எமக்கு எந்த பிரச்சினையும் இருக்காது. மாற்றுத் திட்டங்களைக் கொண்டிருப்பவர்கள் அவற்றை வெளியிட வேண்டும். சர்வதேச நாணய நிதியத்தின் இலக்குகள் மற்றும் நியதிகள் மாற்றப்படாது. அவர்கள் ஒவ்வொரு நாடுகளுக்குமான அளவுகோல்களை கொண்டுள்ளனர். யாராவது எதையாவது இலவசமாகக் கொடுக்க முன்வந்தால், VAT வரியை 25% ஆக அதிகரிப்பதன் மூலம் அதை ஈடுசெய்யலாம் என்று எண்ணினால், புள்ளிவிவரங்களை சீரமைக்க முடியும் என்று நினைத்தால் சர்வதேச நாணய நிதியத்துடன் உடன்பாடுகளை எட்டலாம். ஆனால் இந்த அளவீடுகள், வருமான அளவு மற்றும் செலவு அளவுகளை எவராலும் மாற்ற முடியாது.

— 2048 ஆகும் போது எமது நாடு வளர்ச்சியடைந்த நாடாக இருக்கும் என்று நீங்கள் கூறுகிறீர்கள். ஆனால் இவர்களில் பலர் 2048 இல் உயிருடன் இருப்பார்களா என்று பலரும் யோசிக்கலாம். நீங்கள் ஆட்சிக்கு வந்தால் அடுத்த ஐந்தாண்டுகளில் அதற்காக என்ன செய்வீர்கள்?

இங்குள்ள பலர் 2048க்குள் ஏன் இல்லை என்று நினைக்கிறீர்கள். இன்று 40 வயதை உடையவர்கள் அப்போது 65 வயதாகுவார்கள். இந்த நாட்டில் பெரும்பான்மையான மக்கள் 40 வயதுக்குட்பட்டவர்கள். அப்போது இன்று இருக்கும் பெரும்பாலானவர்கள் இருப்பார்கள் என்று எனக்குத் தோன்றுகிறது. நாம் வளர்ச்சியடைந்த நாடாக மாற வேண்டும். இந்தியா 2047இலும் சீனா 2029 இலும் வளர்ச்சியடைந்த நாடாக மாறும் என்று கூறியுள்ளன.

2048 என்று நாம் கூறுகிறோம். எனவே தமது நாடு வளர்ச்சியடைவதை விரும்பவில்லையா? 50 வருடங்களில் சிங்கப்பூர் வளர்ச்சியடைந்தது. இந்த அரசியல் முறைமையை நாம் மாற்ற வேண்டும். நாம் தொலை நோக்குடன் சிந்திக்க வேண்டும். பொய் சொல்வதால்தான் இன்று இந்த நிலையில் இருக்கிறோம். இதுதான் அரசியலில் உள்ள பிரச்சினை.

அதனால் தான் இந்த ஜனாதிபதித் தேர்தலில் சுயேச்சை வேட்பாளராக போட்டியிடுகிறேன். இதில் மாற்றம் செய்யப்பட வேண்டும். தனது கட்சியில் இருந்து கொண்டு பல்வேறு வாக்குறுதிகளை அள்ளி வீசும்போது நாட்டின் அரசியல் வீழ்ச்சியடைகிறது. எதிர்க்கட்சித் தலைவர் என்பவர் மாற்றுப் பிரதமர். ஆட்சியைப் பொறுப்பேற்கும் படி கூறும்போது ஏன் ஓட வேண்டும்? அரசியல் கட்சித் தலைவர் ஒருவருக்கு ஆட்சி கிடைத்தால் அவர் அதை ஏற்றுக்கொள்வார். மாறாக கைவிட மாட்டார். ஜனாதிபதிப் பதவியை ஏற்குமாறு கேட்டபோதும் முடியாது என்று சபாநாயகரிடம் ஒப்படைக்குமாறு கூறினார்கள். பாராளுமன்றத்தை என்னால் நிர்வகிக்க முடியும் . ஆனால் என்னால் இதனை செய்ய முடியாது என சபாநாயகர் தெரிவித்தார்.

— உங்களுக்கும் நீதிமன்றத்துக்கும் இடையே ஏதேனும் முரண்பாடு உள்ளதா? சபாநாயகருக்கு பிரதம நீதியரசருடன் கலந்துரையாடி பொலிஸ் மா அதிபர் பிரச்சினைக்குத் தீர்வு காணுமாறு அண்மையில் நீங்கள் தெரிவித்திருந்தீர்கள். ஆனால் இன்று வரை அது நடக்கவில்லை.

அது அவர்கள் இருவருக்கும் இடையில் நடக்க வேண்டிய ஒன்று. நான் ஒரு பரிந்துரையையே செய்தேன். இதன்போது நீதிமன்றம் ஒரு விதமான தீர்ப்பை வழங்கியது. பாராளுமன்றம் மற்றுமொரு தீர்மானத்தை எடுத்தது. அன்று நீதித்துறைக்கும் பாராளுமன்றத்துக்கும் இடையில் முரண்பாடு ஏற்பட்ட போது, அப்போதைய சபாநாயகராக இருந்த அனுர பண்டாரநாயக்க தீர்மானம் ஒன்றை எடுத்தார்.

அது அங்கேயே முடிந்தது. நான், வெளியில் இருந்து இந்த பரிந்துரையை முன்வைத்தேன். அதனை செய்யலாமா வேண்டாமா என்பது அவரவர் முடிவு. சபாநாயகரையோ பிரதம நீதியரசரையோ நான் வற்புறுத்த முடியாது. ஜனாதிபதி என்ற வகையில் நான் பாராளுமன்றத்துக்குப் பொறுப்புக்கூற வேண்டியவன். பாராளுமன்றம் வழங்கிய முடிவை நான் அமுல்படுத்த வேண்டும்.

— தேசியப் பிரச்சினையைத் தீர்ப்பதை நீங்கள் எவ்வாறு கையாள்கிறீர்கள்? மற்றும் வடக்கு கிழக்கு அபிவிருத்தி திட்டங்கள் என்ன?

இரா. சம்பந்தனின் இறுதிக்கிரியையின்போது அதுபற்றி நான் தெளிவாக எடுத்துரைத்தேன். மேலும், தமிழ் எம்.பி.க்கள் மற்றும் ஏனைய கட்சிகளுடன் குறிப்பாக அமைச்சரவையுடன் கலந்தாலோசித்து, அனைவரும் ஏற்றுக்கொள்ளும் வகையில் ஒரு முன்மொழிவு தயாரிக்கப்பட்டுள்ளது. எதிர்காலத்தில் அது குறித்து கலந்துரை யாடுவோம். இதை நாம் அவசரமாக செயற்படுத்த வேண்டும்.

நாட்டில் பொருளாதார ஸ்திரத்தன்மையை ஏற்படுத்த அரசியல் ஸ்திரத்தன்மை உருவாக்கப்பட வேண்டும். எனவே இந்த பிரச்சினைகளை நாம் முடிக்க வேண்டும். எரிபொருள் மற்றும் மின்சாரம் இல்லாமல் வரிசையில் நிற்கும் யுகத்துக்கு நாம் யாரும் மீண்டும் செல்ல விருப்பமில்லை.

— அடுத்த தேர்தலில் மக்கள் சரியான முடிவை எடுப்பார்கள் என்று எவ்வளவு தூரம் நம்பிக்கையுடன் இருக்கிறீர்கள்?

அது மக்களின் வாக்கு உரிமையைப் பயன்படுத்துவதற்கான உரிமை. பெரும்பான்மையானவர்கள் எனது முன்மொழிவுகளை ஆதரிப்பார்கள் என்று நான் உறுதியாக நம்புகிறேன். நாட்டின் பிரச்சினைகளைத் தீர்க்கும் தலைவர்கள் தேவையா அல்லது சவால்களை எதிர்கொள்ளப் பயந்து ஓடுகின்ற தலைவர்கள் தேவையா என்பதே வாக்காளர்கள் முன் உள்ள கேள்வி.

— பல்வேறு குற்றச்சாட்டுக்கள் உள்ளவர்கள் உங்களுடன் இருப்பதால் அவர்களுடன் இணைந்து அடுத்த ஜனாதிபதித் தேர்தலில் வெற்றிபெற முடியும் என்று நீங்கள் நம்புகிறீர்களா?

என்னுடன் பாராளுமன்ற உறுப்பினர்கள் குழு ஒன்று உள்ளது. குற்றம் சாட்டப்பட்டவர்கள் இருந்தால், அவர்கள் மீது வழக்குத் தொடரலாம். அது எதையும் நான் நிறுத்தவில்லை.குற்றச்சாட்டு உள்ளவர்களைத் தேர்ந்தெடுப்பதா இல்லையா என்பதை வாக்காளர்கள் தான் தீர்மானிக்க வேண்டும். இதுவரை யாரும் செய்யாத வகையில் ஊழல் தடுப்புச் சட்டத்தை கொண்டு வந்துள்ளோம்.

குற்றச் செயல்களால் சம்பாதித்த சொத்துக்கள் தொடர்பான சட்டமூலம் அடுத்த வாரம் பாராளுமன்றத்தில் அங்கீகரிக்கப்பட்டு வர்த்தமானியில் வெளியிடப்படும். அனைவரும் ஊழல், ஊழல் என்று கூக்குரலிட்டாலும் அதற்கு என்ன செய்வது என்று யாரும் கூறவில்லை. ஆனால் நாம் அது தொடர்பில் நடவடிக்கை எடுத்துள்ளோம்.

எனது அடுத்த பயணம் ஜனாதிபதியாக வேண்டும் என்பதே. அவர்களின் அடுத்த பயணம் பாராளுமன்றத்துக்கு தேர்ந்தெடுக்கப்பட வேண்டும் என்பதே. வாக்காளர்கள் அவர்களை நிராகரித்தால், அந்தப் பிரச்சினை அத்துடன் முடிவு பெறும். எனது ஆட்சிக் காலத்தில் யாரேனும் ஒரு எம்.பி.க்கு எதிராகவும் நடவடிக்கை எடுப்பதற்கு நான் எவ்வித அழுத்தங்களையும் பிரயோகிக்கவில்லை.

நான் யாரையும் பாதுகாக்கவில்லை. அரசியலில் நாம் வெவ்வேறு நபர்களுடன் செயற்படுகிறோம். அவர்கள் திருடர்களா இல்லையா என்பதைக் கண்டுபிடிப்பது சட்டம் சார்ந்த விடயமாகும்.

"நான் பிரதமராக இருந்த காலத்தில் பல பேர் மீது வழக்குத் தொடரப்பட்டது. இறுதி முடிவு நீதிமன்றத்திடம் உள்ளது. இப்போது ஒரு அமைச்சர் மீது நீதிமன்ற வழக்குகள் உள்ளன. நான் அதை நிறுத்தச் சொன்னேனா? நான் அதனை நிறுத்தினால் தான் அது தவறு" என்று ஜனாதிபதி தெரிவித்தார்.

பத்திரிகை ஆசிரியர்களுடன் ரசியல் பேசிய ஜனாதிபதி

இந்த நிகழ்வு முடிந்த பின்னர் "தமிழன்" பத்திரிகை ஆசிரியர் ஜனாதிபதியுடன் அரசியல் விடயங்களைப்பற்றி அளவளாவிக்கொண்டிருந்தார்.

தமிழ்க்கட்சிகளை அழைத்து தேர்தலுக்கு ஆதரவு கோரினீர்களா?நீங்கள் கொடுத்த வாக்குறுதிகள் எதனையும் நிறைவேற்றவில்லை என்று தமிழ் முற்போக்குக் கூட்டணி கூறியுள்ளதே?என்று கேட்டபோது , அவர்கள் சஜித் பக்கம் ஆதரவளிக்க சென்றுவிட்டு இப்போது என்னை குறைகூறுகிறார்கள்.நான் ஒன்றுமே செய்யவில்லையென்றால் அமைச்சர்களாக அவர்கள் என்ன செய்தார்கள்?" என்று பதிலளித்தார் ரணில்.

ரிஷாத் பதியுதீனின் ஆதரவு எப்படி?உங்களுக்குக் கிடைக்குமா? என்ற கேள்விக்கு பதிலளித்த ஜனாதிபதி , "ரிஷாத் பதியுதீனிடம் நான் பல தடவை பேசியுள்ளேன்.அவர் சிறையில் இருக்கும்போது எவருமே அவரைப்பற்றி பேசாத ஒரு காலகட்டத்தில் அவரை குற்றமற்றவர் என்றால் விடுவியுங்கள் என்று பாராளுமன்றத்தில் நான்தான் குரல் எழுப்பினேன்.முன்னாள் ஜனாதிபதி கோட்டாபயவை வைத்துக்கொண்டு நான் அதனை கூறினேன்.அன்று நான் பேசியதை ரிஷாத் நன்றியுடன் நினைவில் வைத்திருக்கிறார் என்று நான் கருதுகிறேன்.அவர்கள் ஜனநாயகக் கட்சி. அவர்களாக நல்ல முடிவை எடுக்கட்டும்." என்று கூறினார் ரணில்.

தமிழ் பொதுவேட்பாளர் ஒருவர் இறங்குவது தமிழ் வாக்குகளில் பெரிதும் தாக்கத்தை ஏற்படுத்தாது என்றும் இடையில் தெரிவித்தார் ரணில்.

நாமல் ராஜபக்ஷ உங்களுக்கு கிடைக்க வேண்டிய வாக்குகளை உடைப்பாரா ?என்று கேட்டபோது , "நாமல் போட்டியிடுவதால் எனக்கு எந்தப் பாதிப்புமில்லை.எனது வாக்குகள் சிதறாது. பொதுஜன பெரமுனவின் மாவட்டத் தலைவர்கள் பலர் என்னுடன் இருக்கின்றனர். அவர்கள் இருக்கும்போது எனது வாக்குகள் சிதறாது" என்றார் ரணில் .

வடக்கின் அரசியல் நிலைமை எப்படி?என்று கேள்வியொன்றை முன்வைத்தபோது , "அங்குதான் எனது அமைச்சர் டக்ளஸ் இருக்கிறார்.அவர் மக்களோடு மக்களாக இருக்கிறார்.அங்கஜனும் எனக்கு ஆதரவளிப்பார் என்று நம்புகிறேன்" என்றார் ரணில்.

பதில் பொலிஸ் மா அதிபர் நியமனத்தை செய்யாமலே இழுத்தடித்து வருவது குறித்து கேட்டபோது அது பாராளுமன்றமும் நீதித்துறையும் செய்யவேண்டிய வேலை என்று குறிப்பிட்ட ரணில் , ஜனாதிபதியான தான்கூட பாராளுமன்றத்துக்கு பொறுப்புக்கூறவேண்டியவர் என்பதால் அதில் தலையிட முடியாது என்று குறிப்பிட்டார் ஜனாதிபதி.

பங்களாதேஷில் ஏற்பட்ட குழப்பம் தொடர்பிலும் ஆட்சிமாற்றம் குறித்தும் கருத்து வெளியிட்டார் ரணில். “முஜிபுர் ரஹ்மான் கொலைச் சம்பவத்துக்கு பின்னர் ஷேக் ஹசீனாவுக்கு இந்தியாவில் காங்கிரஸ் ஆட்சியில் அடைக்கலம் கொடுக்கப்பட்டது. இப்போது மோடி கூட ஹசீனாவுக்கு ஆதரவாக இருக்கிறார்.பங்களாதேஷ் மீது இந்தியாவுக்கு அக்கறை உண்டு .” என்று குறிப்பிட்டார் ஜனாதிபதி .

மக்கள் போராட்டத்தால் பதவியை விட்டு விலகிய கோட்டாவுக்கு இந்தியா அடைக்கலம் கொடுக்க மறுத்துவிட்டது. ஆனால் ஹசீனாவுக்கு கொடுத்தது என்று ‘தமிழன்’ ஆசிரியர் சுட்டிக்காட்டியபோது தலையை ஆட்டி ஆமாம் என்று மெல்லியதாக புன்னகையிட்டார் ரணில்.

“சரத் பொன்சேகா இந்தியாவுக்கு சென்று முக்கியமான பிரதிநிதிகளை சந்தித்துள்ளார். அவர் சிலவேளை தேர்தலில் போட்டியிடாமல் விலகிவிடுவாரோ என்ற பேச்சும் உள்ளது” என்று சொன்னபோது பதிலளித்த ரணில், இல்லையில்லை, அவர் சஜித்துக்கு எதிராக களத்தில் இருப்பார் என்பதை தான் அறிவாரென குறிப்பிட்டார் .

உணவு வகைகளை அதிகமாக எடுத்துக்கொள்ளாத ஜனாதிபதி ரணில்,வெண்ணெயுடன் சில மரக்கறிகளை மட்டுமே உணவாக எடுத்தார்.உணவுக்குப் பின்னர் பழங்களை அவரது உதவியாளர்கள் பரிமாறினர். உணவுக்குப் பின்னர் அவருக்கு ஆங்கில முறைப்படி கோப்பி வழங்கப்பட்டது.அதை அருந்திய பின்னர் அங்கிருந்து புறப்பட்டார் ரணில்.

தம்மிக்கவுக்கு என்ன ஆனது ?

கடந்த 6 ஆம் திகதி காலை 7 மணியளவில் தம்மிக்க பெரேரா நபர் ஒருவருக்கு தொலைபேசி அழைப்பை எடுத்தார்.தம்மிக்க ஜனாதிபதி தேர்தலில் போட்டியிடுவதற்கான இசைப்பேழையை தயாரித்த அந்த நபரிடம் , “எங்கே வேலைகளையெல்லாம் முடித்துவிட்டீர்களா?என்று கேள்வியெழுப்பினார் தம்மிக்க.” முடித்துவிட்டதாக அந்த நபர் கூற , அதற்கான கொடுப்பனவு கிடைத்துவிட்டதா என்று மீண்டும் கேள்வியெழுப்பினார் தம்மிக்க.இல்லை.இன்னும் வழங்கப்படவில்லையென்று அந்த நபர் கூறும்போதே அருகில் இருந்த உதவியாளர் ஒருவரை அழைத்த தம்மிக்க,சம்பந்தப்பட்ட கொடுப்பனவு ஏன் இன்னும் வழங்கபபடவில்லை என்று கோபத்துடன் வினவியிருக்கிறார்.இப்படியெல்லாம் சோம்பலாக நடந்தால் எலெக்சன் கெம்பெயினை எப்படி முன்னெடுத்துச் செல்வது என்றும் உதவியாளரை கடிந்துகொண்டார் தம்மிக்க.

அதேசமயம் தொலைபேசி அழைப்பில் இருந்த பிரமுகருக்கு தகவல் தெரிவித்த தம்மிக்க அடுத்த 10 நிமிடங்களுக்குள் அவருக்குரிய கொடுப்பனவான 10 இலட்சம் ரூபா வந்துவிடுமென கூறி தொலைபேசி அழைப்பை துண்டித்தார். தம்மிக்க 10 நிமிடங்களை கூறினாலும் ஐந்து நிமிடங்களில் சம்பந்தப்பட்ட கொடுப்பனவு குறிப்பிட்ட பிரமுகருக்கு சென்றடைந்தது.

மேற்சொன்னவை நடந்தது கடந்த செவ்வாய்க்கிழமை காலை நேரம்.. இனித்தான் முக்கிய விடயங்கள் அரங்கேறின.

தடுமாறிய ராஜபக்ஷமார் இதே தினம் மாலை 6 மணிக்கு பெசில் ராஜபக்ஷவின் கையடக்க தொலைபேசிக்கு அழைப்பொன்று வந்தது. மறுமுனையில் இருந்தவர் தம்மிக்க பெரேரா . “தேர்தல் போட்டியிலிருந்து விலகி நிற்க தீர்மானித்திருக்கிறேன்.அதனை அறிவிப்பது எனது கடமையல்லவா ?” என்று பெசிலிடம் கூறினார் தம்மிக்க.

ஆரம்பத்தில் இது நகைச்சுவையாக இருக்கலாம் என்று கருதிய பெசில்,பின்னர் அதனை சீரியஸாக எடுத்துக்கொண்டார்.”தேர்தலில் இருந்து விலகுவதற்கான காரணம் என்ன?” என்று தம்மிக்கவிடம் கேட்டார் பெசில் .

“தாயாருக்கு 92 வயதாகிறது. அவருக்கு உடல்நிலை சரியில்லை.எனவே அவரை கவனிக்கவேண்டும்.” என்று அதற்கு பதிலளித்தார் தம்மிக்க.

சரி,தாயாருக்கு 92 வயது என்பது உங்களுக்கு இப்போதா தெரியும்?தேர்தல் போஸ்டர் , பெனர் எல்லாம் அடித்தாயிற்று.இப்போது இப்படி சொன்னால் எப்படி? என்று திருப்பி விசனப்பட்டார் பெசில் .

“இல்லை என்னை மன்னியுங்கள். சிரமங்கள் ஏற்பட்டால் வருந்துகிறேன்.” என்று அதற்கு பதிலளித்தார் தம்மிக்க.

“சரி அப்படியாயின் எனக்கு எழுத்துமூலம் உங்களின் நிலைப்பாட்டை தாருங்கள்.பின்னர் நீங்கள் ஏதாவது கூறிவிட்டாள் நாங்கள் உங்களை வரவேற்கவில்லையென்று வந்துவிடும்” என்று தம்மிக்கவிடம் கூறினார் பெசில் .அதன்பின்னரே பெசிலுக்கு கடிதத்தை அனுப்பினார் தம்மிக்க.

கடிதம் கிடைத்த கையோடு பரபரப்பாகினார் பெசில் . அநுராதபுரத்தில் தேர்தல் வேலைகளை கவனித்துக்கொண்டிருந்த நாமல் ராஜபக்ஷவுக்கு தொலைபேசி அழைப்பெடுத்த பெசில்,அந்த வேலைகளை கைவிட்டு உடனடியாக கொழும்பு திரும்புமாறு கேட்டுக்கொண்டார். அதன்படி கொழும்பு விரைந்த நாமல்,கட்சியின் தேசிய அமைப்பாளர் என்ற ரீதியில் தங்கள் பக்கம் இருந்த எம்.பிக்களை கட்சியின் தலைமையகத்துக்கு அழைத்தார் .07ஆம் திகதி அதிகாலை வரை அந்த பேச்சு நடந்தது.அதில் தான் நாமல் ராஜபக்ஷ போட்டியிடத் தீர்மானம் எடுக்கப்பட்டது.

எவ்வாறாயினும் தம்மிக்கவின் தாயார் கொழும்பிலுள்ள பிரபல தனியார் வைத்தியசாலை ஒன்றில் சிகிச்சைக்காக சேர்க்கப்பட்டிருந்தார். மொட்டுக்கட்சிக்கு தனது முடிவை அறிவித்த பின்னர் கையடக்க தொலைபேசியை நிறுத்திவிட்டார் தம்மிக்க. எனினும் தனக்கு நெருக்கமான அமைச்சர் ஒருவரை தொலைபேசியில் அழைத்த தம்மிக்க, போட்டியில் இருந்து விலகுவது பற்றி கூறியுள்ளார். தான் போட்டியிடாவிட்டாலும் நாமல் பதிலுக்கு போட்டியிடத் தயார் நிலையில் இருப்பதாகவும் அது ராஜபக்ஷக்களின் பி பிளேன் என்றும் தம்மிக்க அப்போது கூறியிருந்தார். இந்த இடைவெளிக்குள் தம்மிக்கபை சமரசப்படுத்த எடுக்கப்பட்ட முயற்சிகள் தோல்வியடைந்தன.

நாமல் களமிறங்கியது ஏன்?

தம்மிக்க பெரேரா சில மணி நேரங்களில் தனது முடிவை எப்படி மாற்றினார் என்ற கேள்வி ராஜபக்ஷக்களுக்குள் எழுந்தது. தேர்தலில் போட்டியிட்டு ரணிலிடம் தோல்வியடைந்தால் தம்மிக்கவின் வர்த்தக சாம்ராஜ்யத்துக்கு ஆபத்து வரும் , பங்குச் சந்தையில் பின்னடைவு வருமென்று அவருக்கு அழுத்தங்கள் அரச மேல்மட்டத்தில் இருந்து வந்ததாக ஒரு தரப்பில் சொல்லப்பட்டது. மறுபக்கம் இது தம்மிக்க - ராஜபக்ஷ தரப்புகள் இணைந்து ஆடிய கேம் என்று இன்னொரு தரப்பில் சொல்லப்பட்டது.

எவ்வாறாயினும் நாமல் ராஜபக்ஷவை வேட்பாளராக அறிவிக்கும் நிகழ்வில் ராஜபக்ஷ தரப்பில் பலர் கலந்துகொள்ளவில்லை. சமல் ராஜபக்ஷ அவரது புதல்வர் சஷீந்திர ராஜபக்ஷ ,கோட்டாபய ராஜபக்ஷ ,தாயார் சிராந்தி , சகோதரர்கள் ரோஹித ,யோஷித்த என்று எவரையும் அந்த நிகழ்வில் காண முடியவில்லை. ராஜபக்ஷமார் குடும்ப முடிவு என்று நாமலின் நியமனம் மக்களால் கருதப்படுமென்று எண்ணி இப்படி நிகழ்வை அவர்கள் தவிர்த்ததாக சொல்லப்பட்டாலும் சமல் மற்றும் சஷீந்திர வேண்டுமென்றே இந்த நிகழ்வை புறக்கணித்ததாக அறியமுடிந்தது.

சமல் ராஜபக்ஷவைப் பொறுத்தவரை அவர் ரணிலை வேட்பாளராக நிறுத்துவதற்கே விரும்பியிருந்தார். மஹிந்தவின் நிலைப்பாடும் அதுவே என்றாலும் புத்திர பாசம் அவரின் கருத்துக்கு இடமளிக்காமல் தடுத்துவிட்டது. நாமலுக்கு இன்னும் சில காலம் பொறுத்திருக்க சமல் அறிவுரை வழங்கியபோதும் மஹிந்த குடும்பத்தார் அதனை ஏற்கவில்லை. ஜோதிடப்படி சமல் ராஜபக்ஷவின் புதல்வர் சஷீந்திரவுக்கு இராஜயோகம் இருப்பதால் நாமலை மேவி அவர் ஆட்சியதிகாரத்தில் அமர்ந்துவிடக்கூடாதென்று கருதுகிறது மஹிந்த குடும்பம்.அதன் வெளிப்பாடே நாமலின் இந்த அவசர தீர்மானம் என்று சொல்கின்றன உள்ளகத் தகவல்கள்.

எது எப்படி இருப்பினும் தம்மிக்க போட்டியில் இருந்து விலகிய பின்னர் கடும் விசனத்தில் இருந்த ராஜபக்ஷ தரப்பு ,நாமலை நிறுத்தி ரணிலுக்கு கிடைக்கவேண்டிய வாக்குகளை தடுக்க தீர்மானித்தது. ஆனாலும் பொதுஜன பெரமுனவின் முக்கியமான அமைப்பாளர்கள் ரணிலின் பக்கம் இருப்பதால் நாடளாவிய ரீதியில் பிரசாரம் செய்ய நாமல் முற்படும்வேளை சிக்கல்கள் ஏற்படலாம். ராஜபக்ஷக்களினால்தான் நாட்டுக்கு இந்த நிலைமை ஏற்பட்டது என்ற பிரசாரத்தை முன்னெடுத்தால் நாமல் அதனை எதிர்கொள்ள சிரமங்களை எதிர்நோக்கலாம்.

சஜித் கட்சிக்குள்

பிரதமர் போட்டி

ஐக்கிய மக்கள் சக்தி ஜனாதிபதித் தேர்தலில் வென்றால் அடுத்துவரும் பாராளுமன்றத் தேர்தலில் பிரதமர் வேட்பாளராக யாரை நிறுத்தலாம் என்ற ஆலோசனை ஐக்கிய மக்கள் சக்திக்குள் நடத்தப்பட்டுள்ளது.

பேராசிரியர் ஜீ.எல்.பீரிஸ். , ரஞ்சித் மத்தும பண்டார ,ஹர்ஷ டி சில்வா ஆகியோரின் பெயர்கள் இதற்காக பரிசீலிக்கப்படுகின்றன. ஹர்ஷ டி சில்வாவின் பெயருக்கே கட்சி தலைமைத்துவம் முன்னுரிமை வழங்கியுள்ளதாக அறியமுடிகின்றது.

ஐக்கிய மக்கள் சக்தி தலைமையிலான பரந்த அரசியல் கூட்டணியான ஐக்கிய மக்கள் கூட்டணி உத்தியோகபூர்வ அறிமுகம் (08) கொழும்பு சுகததாச உள்ளக விளையாட்டரங்கில் இடம்பெற்றது.

எதிர்வரும் ஜனாதிபதித் தேர்தலில் ஐக்கிய மக்கள் சக்தியின் ஜனாதிபதி வேட்பாளரான சஜித் பிரேமதாசவை ஜனாதிபதியாக நியமிப்பதற்காக உருவாக்கப்பட்ட இந்தக் கூட்டணியில் 10 அரசியல் கட்சிகளும் குழுக்களும் இணைந்துள்ளன. ஐக்கிய மக்கள் சக்தியின் கூற்றுப்படி, இந்த புதிய அரசியல் கூட்டணி இலங்கையின் வெற்றியை அடையும் நோக்கில் உருவாக்கப்பட்ட நாட்டின் மிகப்பெரிய கூட்டணியாகும்.

ஐக்கிய மக்கள் கூட்டணி ஆனது ஐக்கிய மக்கள் சக்தி, ஶ்ரீலங்கா சுதந்திரக் கட்சி தயாசிறி ஜயசேகர அணி, ஶ்ரீலங்கா பொதுஜன பெரமுன பாராளுமன்ற உறுப்பினர் ஜீ.எல். பீரிஸ் அணி, பாராளுமன்ற உறுப்பினர் மனோ கணேசன் தலைமையிலான தமிழ் முற்போக்குக் கூட்டணி , பாராளுமன்ற உறுப்பினர் ரவூப் ஹக்கீம் தலைமையில் ஶ்ரீலங்கா முஸ்லிம் காங்கிரஸ் உட்பட பல அரசியல் கட்சிகளைக் கொண்டுள்ளது.

பழனி திகாம்பரம் தலைமையிலான தொழிலாளர் தேசிய சங்கம், வே . இராதாகிருஷ்ணன் தலைமையிலான மலையக மக்கள் முன்னணி, பாராளுமன்ற உறுப்பினர் டலஸ் அழகப்பெரும தலைமையிலான சுதந்திர மக்கள் சபை மற்றும் முன்னாள் பாராளுமன்ற உறுப்பினர் அர்ஜுன ரணதுங்கவின் புரவெசி ஹந்த உள்ளிட்ட தரப்புகளையும் உள்ளடக்கி உத்தியோகபூர்வ ஒப்பந்தம் கைச்சாத்திடப்பட்டது.

இதன்போது உரையாற்றிய பாராளுமன்ற உறுப்பினர் சஜித் பிரேமதாச, இலங்கையின் அடுத்த தலைமுறைக்கு வலுவான நாட்டை உருவாக்குவதற்கு அனைத்து அரசியல் கட்சிகளும் ஒன்றிணைந்து ஒற்றுமையாக செயற்பட வேண்டும் என்றார்.

ஐக்கிய மக்கள் கூட்டணியின் கொள்கைகள் வெளியீட்டு விழாவில் அறிவிக்கப்பட்டதுடன், சஜித் பிரேமதாசவும் கூட்டணியின் ஜனாதிபதி வேட்பாளராக முன்வைக்கப்பட்டார்.

பேஸ்புக் விளம்பரங்களுக்கு

பணத்தை செலவிட்ட ரணில்

ஜனாதிபதி ரணில் விக்கிரமசிங்கவின் அரசியல் பிரசார விளம்பரங்களுக்காக கடந்த மாதத்தில் மெட்டா நிறுவனத்துக்கு பெருந்தொகைப் பணம் செலவிடப்பட்டுள்ளது.

உள்ளூர் அமைப்பான Hashtag Generation வெளியிட்ட தரவுகளின்படி, விக்கிரமசிங்கவை ஆதரிக்கும் அரசியல் கட்சிகள் ஜூன் 30 முதல் ஜூலை 29 வரை மெட்டா விளம்பரங்களுக்காக மட்டும் 5.1 மில்லியன் ரூபாய் ( 17,000) டொலர்களுக்கு மேல் செலவிட்டதாக கூறப்படுகின்றது.

ரணிலுடன் இணையுங்கள் என்ற பேஸ்புக் பக்கத்தில் 13,093 டொலர் பெறுமதியான 44 விளம்பரங்கள் முதலிடத்தைப் பிடித்துள்ளன.

விஜேதாச ராஜபக்ஷவுக்கு ஆதரவு மேலும், ஜனாதிபதி வேட்பாளர் விஜேதாச ராஜபக்ஷவுக்கு ஆதரவு தெரிவித்து 10 விளம்பரங்களுக்காக 2,323 டொலர்கள் செலவிடப்பட்டுள்ளதாக தெரியவந்துள்ளது.

ஜனாதிபதி ஊடகப் பிரிவினால் வெளியிடப்பட்ட 17 விளம்பரங்களுக்காக 661 டொலர்கள் செலவிடப்பட்டுள்ளன.

தேசிய மக்கள் சக்தியின் தலைவர் அநுரகுமார திசாநாயக்க ஆகியோரை உள்ளடக்கமாக கொண்ட பக்கமான Next Politics என்ற பேஸ்புக் பக்கம், இந்தக் காலப்பகுதியில் 54 விளம்பரங்களுக்காக $354 செலவிட்டுள்ளது.

எவ்வாறாயினும், ரணில் விக்கிரமசிங்கவை ஆதரிக்கும் உள்ளடக்கத்துடன் கூடிய பேஸ்புக் பக்கங்களும் அவதானிக்கப்பட்டுள்ளதாக தெரிவிக்கப்படுகிறது.

இராஜாங்க அமைச்சு பதவிகளை துறக்க தயாராகும் மொட்டு கட்சி முக்கியஸ்தர்கள்

ஆளும் கட்சியில் இராஜாங்க அமைச்சு பதவிகளை வகித்து வரும் மொட்டு கட்சியின் எட்டு பாராளுமன்ற உறுப்பினர்கள் பதவிகளை துறக்க ஆயத்தமாகி வருவதாக தெரிவிக்கப்படுகின்றது.

எதிர்வரும் ஜனாதிபதித் தேர்தலில் ஜனாதிபதி ரணில் விக்கிரமசிங்கவுக்கு ஆதரவளிக்காத தரப்பினர் இவ்வாறு பதவிகளை துறக்கத் தீர்மானித்துள்ளதாக அரசியல் வட்டாரத் தகவல்கள் தெரிவிக்கின்றன.

டி.வீ.சானக்க, தேனுக விதானகமகே, ஷசீந்திர ராஜபக்ஷ, அசோக பிரியந்த, மொஹான் டி சில்வா, இந்திக்க அனுருத்த, பிரசன்ன ரணவீர மற்றும் சிறிபால கம்லத் ஆகியோர் இவ்வாறு தங்களது இராஜாங்க அமைச்சு பதவிகளைத் துறக்கத் தீர்மானித்துள்ளனர். அரசாங்கத்துக்கு ஆதரவளிக்காது அமைச்சு பதவிகளை வகிப்பது பொருத்தமற்றது என சுட்டிக்காட்டப்பட்டிருந்தது.

இதேவேளை, தனிப்பட்ட காரணங்களுக்காக எதிர்வரும் ஜனாதிபதித் தேர்தலில் ஜனாதிபதி ரணில் விக்கிரமசிங்கவுக்கு ஆதரவளிப்பதாக அமைச்சர் பவித்ரா வன்னியாரச்சி, ஶ்ரீலங்கா பொதுஜன முன்னணி கட்சிக்கு அறிவித்துள்ளார்.

தனிப்பட்ட காரணங்களின் அடிப்படையில் அரசியல் தீர்மானங்களை எடுக்க வேண்டாம் என கட்சியின் தேசிய அமைப்பாளர் நாமல் ராஜபக்ஷ இதன்போது தெரிவித்துள்ளார்.

தமிழ் பொது வேட்பாளராகஅரியநேத்திரனின் பெயர் அறிப்பு

எதிர்வரும் ஜனாதிபதித் தேர்தலுக்கான தமிழ் பொது வேட்பாளராக முன்னாள் பாராளுமன்ற உறுப்பினர் பா.அரியநேத்திரன் வியாழக்கிழமை (08) அறிவிக்கப்பட்டார்.

யாழ்ப்பாணத்தில் நடைபெற்ற தமிழ்த் தேசிய பொது கட்டமைப்பின் கூட்டத்தின் பின்னர் பொது வேட்பாளராக அவரது பெயர் அறிவிக்கப்பட்டுள்ளது.

முன்னாள் பாராளுமன்ற உறுப்பினர் பா.அரியநேத்திரன், ஜனநாயக தமிழ் தேசியக் கூட்டமைப்பின் ஊடகப் பேச்சாளர் சுரேஷ் பிரேமச்சந்திரன், தமிழ்த் தேசிய கட்சியின் தலைவர் நா.சிறிகாந்தா, தமிழ்த் தேசிய பசுமை இயக்கத்தின் தலைவர் பொ.ஐங்கரநேசன், ஜனநாயக போராளிகள் கட்சியின் தலைவர் சிவநாதன் வேந்தன், அரசியல் ஆய்வாளர் நிலாந்தன் உள்ளிட்ட சிவில் அமைப்பின் பிரதிநிதிகள் அக்கூட்டத்தில் பங்கேற்றிருந்தனர்.

எதிர்வரும் ஜனாதிபதித் தேர்தலில் தமிழர் தரப்பிலிருந்து பொது வேட்பாளரை களமிறக்குவதற்கான யோசனைக்கு செயலுரு வழங்கும் நோக்கிலான புரிந்துணர்வு உடன்படிக்கை கடந்த மாதம் 22ஆம் திகதி கைச்சாத்திடப்பட்டது.

8 தமிழ்த் தேசியக் கட்சிகளும் தமிழ் மக்கள் பொதுச் சபையும் இந்த புரிந்துணர்வு உடன்படிக்கையில் கைச்சாத்திட்டிருந்தன. இந்த உடன்படிக்கையின் பிரகாரம் தமிழ்த் தேசிய பொது கட்டமைப்பு ஸ்தாபிக்கப்பட்டிருந்தது. இன்று வவுனியாவில் கூடும் தமிழரசுக் கட்சியின் மத்திய குழுவின் கூட்டத்தில் அரியநேத்திரன் தொடர்பில் பேசப்படுமென சொல்லப்பட்டது.

சிவா இராமசாமி

mesivaraj@yahoo.com

சண்டே சாம்பார்

சண்டே சாம்பார்

You may also like