2027ஆம் ஆண்டுக்கான வரவு செலவுத் திட்ட முன்மொழிவுகளில் பொதுச் சுகாதார பரிசோதகர்களின் (PHI) சேவைகள் புறக்கணிக்கப்பட்டுள்ளதாக இலங்கை பொதுச் சுகாதார பரிசோதகர்கள் சங்கம் தெரிவித்துள்ளது. ஜனாதிபதியினால் சமர்ப்பிக்கப்பட்ட வரவு செலவுத் திட்டத்தில், பொதுச் சுகாதார பரிசோதகர்கள் எதிர்கொள்ளும் பிரச்சினைகளுக்குத் தீர்வுகாண எந்தவொரு நடவடிக்கையும் முன்மொழியப்படாதமை குறித்து சங்கம் தனது கவலையையும் அதிருப்தியையும் வெளியிட்டுள்ளது. சுகாதாரத் திணைக்களம் மற்றும் உள்ளூராட்சி திணைக்களத்தின் கீழ் நாடளாவிய ரீதியில் சுமார் 2,400 பொதுச் சுகாதார பரிசோதகர்கள் பணியாற்றி வருவதாகவும், தமது கடமைகளை முன்னெடுப்பதில் அவர்கள் பல்வேறு சவால்களை எதிர்கொள்வதாகவும் சங்கம் சுட்டிக்காட்டியுள்ளது. பொதுச் சுகாதார பரிசோதகர்கள் எதிர்கொள்ளும் பிரச்சினைகள் தொடர்பில் ஜனாதிபதி உள்ளிட்ட சம்பந்தப்பட்ட அதிகாரிகளின் கவனத்திற்குக் கொண்டுவருவதற்கு ஏற்கனவே பல நடவடிக்கைகள் முன்னெடுக்கப்பட்டதாகவும் சங்கம் தெரிவித்துள்ளது. ஒரு கிராம சேவகர் பிரிவுக்கு மாத்திரம் பொறுப்பாகக் கடமையாற்றும் ஏனைய கள உத்தியோகத்தர்களின் அலுவலகக் கொடுப்பனவுகள் வரவு செலவுத் திட்டத்தின் ஊடாக அதிகரிக்கப்பட்டுள்ள போதிலும், பொதுச் சுகாதார பரிசோதகர்களின் அலுவலகக் கொடுப்பனவுகள் தொடர்பில் எவ்வித கவனமும் செலுத்தப்படவில்லை என சங்கம் குறிப்பிட்டுள்ளது. பொதுச் சுகாதார பரிசோதகர்கள் 10 முதல் 20 கிராம சேவகர் பிரிவுகளை உள்ளடக்கிய விரிவான பிரதேசங்களுக்குப் பொறுப்பாகச் செயற்படுவதுடன், தமது கடமைகளை முன்னெடுப்பதற்காக கள அலுவலகங்களையும் பராமரிக்க வேண்டியுள்ளதாகச் சுட்டிக்காட்டப்பட்டுள்ளது. மேலும், தமக்குப் பொறுப்பான பிரதேசங்களில் தினமும் சுமார் 100 கிலோமீற்றர் வரை பயணம் செய்ய வேண்டியுள்ள போதிலும், பொதுச் சுகாதார பரிசோதகர்களுக்கான பயணக் கொடுப்பனவுகள் தொடர்பிலும் வரவு செலவுத் திட்டத்தில் கவனம் செலுத்தப்படவில்லை என சங்கம் தெரிவித்துள்ளது. அத்துடன், இதுவரை மோட்டார் சைக்கிள்களைப் பெற்றுக்கொள்ளாத தகுதியுடைய அனைத்து பொதுச் சுகாதார பரிசோதகர்களுக்கும் மோட்டார் சைக்கிள்களை வழங்குவதற்கான வேலைத்திட்டம் எதுவும் முன்மொழியப்படவில்லை என்றும் சங்கம் சுட்டிக்காட்டியுள்ளது. பொதுச் சுகாதார பரிசோதகர்களின் பங்களிப்பை அரசாங்கம் வரவு செலவுத் திட்டத்தில் உரிய முறையில் அங்கீகரிக்கத் தவறியுள்ளதாக மீண்டும் வலியுறுத்தியுள்ள சங்கம், அவர்களின் நீண்டகாலப் பிரச்சினைகளுக்குத் தீர்வுகாண வரவு செலவுத் திட்ட முன்மொழிவுகள் ஊடாக உடனடி நடவடிக்கை எடுக்குமாறு அதிகாரிகளிடம் கோரிக்கை விடுத்துள்ளது.

PHI அதிகாரிகளின் பிரச்சினைகளை கண்டுகொள்ளாத வரவு செலவுத் திட்டம்?

PHI அதிகாரிகளின் பிரச்சினைகளை கண்டுகொள்ளாத வரவு செலவுத் திட்டம்?

You may also like