நெல் சந்தைப்படுத்தல் சபையிடமுள்ள நெல்லில் 30,000 மெற்றிக் தொன்களை அரிசியாக மாற்றி சந்தைக்கு விநியோகிக்க அமைச்சரவை அங்கீகாரம் வழங்கியுள்ளது. 2026 ஜூலை 22ஆம் திகதி இடம்பெற்ற 34ஆவது உணவுக் கொள்கை மற்றும் பாதுகாப்புக் குழுக் கூட்டத்தில் முன்வைக்கப்பட்ட பரிந்துரைகளுக்கு அமைய, அரசாங்கத்தின் நெல் கொள்வனவு நடவடிக்கைகளுக்கு வசதியளிக்கும் வகையில் இந்த நடவடிக்கை மேற்கொள்ளப்படவுள்ளது. இதன்படி, நெல் சந்தைப்படுத்தல் சபையிடமுள்ள மொத்த நெல் கையிருப்பிலிருந்து 30,000 மெற்றிக் தொன் நெல், கூட்டுறவு மொத்த விற்பனைக் கூட்டுத்தாபனத்தின் ஊடாக அரிசியாக மாற்றப்படும். அரிசியாக மாற்றப்படும் நெல் 5, 10, 25 மற்றும் 50 கிலோகிராம் பொதிகளில் விநியோகிக்கப்படவுள்ளது. இதற்காக நெல் சந்தைப்படுத்தல் சபையில் பதிவு செய்யப்பட்டுள்ள அரிசி ஆலை உரிமையாளர்களிடமிருந்து விருப்பக் கோரல்கள் பெறப்படவுள்ளன. மேலும், நெல்லை அரிசியாக மாற்றும் விகிதம் மற்றும் அரிசிக்கான பொருத்தமான விலையை நிர்ணயிக்க, நெல் சந்தைப்படுத்தல் சபை, கூட்டுறவு மொத்த விற்பனைக் கூட்டுத்தாபனம், லங்கா சதொச, தேசிய அறுவடைக்குப் பின்னரான முகாமைத்துவ நிறுவனம் மற்றும் ஹெக்டயர் கொப்பேகடுவ விவசாய ஆராய்ச்சி மற்றும் பயிற்சி நிறுவனம் ஆகிய நிறுவனங்களின் அதிகாரிகளைக் கொண்ட விலை நிர்ணயக் குழு நடவடிக்கை எடுக்கவுள்ளது. தயாரிக்கப்படும் அரிசி லங்கா சதொச, கூட்டுறவு வலையமைப்பு மற்றும் தனியார் தரப்பினர்கள் ஊடாக சந்தைக்கு விநியோகிக்கப்படவுள்ளது.

30,000 மெற்றிக் தொன் நெல் அரிசியாக மாற்றி சந்தைக்கு விநியோகம்

30,000 மெற்றிக் தொன் நெல் அரிசியாக மாற்றி சந்தைக்கு விநியோகம்

You may also like