ஊழல் குற்றச்சாட்டு தொடர்பில் சிறைத்தண்டனை விதிக்கப்பட்டுள்ள முன்னாள் அமைச்சர் பிரியங்கர ஜயரத்னவுக்கு எதிராக இலஞ்ச ஊழல் விசாரணை ஆணைக்குழுவினால் தாக்கல் செய்யப்பட்டுள்ள மற்றுமொரு வழக்கை, மேலதிக சாட்சிய விசாரணைக்காக எதிர்வரும் நவம்பர் 13ஆம் திகதி மீண்டும் விசாரணைக்கு எடுத்துக்கொள்ள கொழும்பு மேல் நீதிமன்றம் உத்தரவிட்டுள்ளது. குறித்த வழக்கு இன்று (02) கொழும்பு மேல் நீதிமன்ற நீதிபதி ரஷாந்த கொடவெல முன்னிலையில் விசாரணைக்கு எடுத்துக்கொள்ளப்பட்டது. இதன்போது, விளக்கமறியலில் உள்ள முன்னாள் அமைச்சர் பிரியங்கர ஜயரத்னவை சிறைச்சாலை அதிகாரிகள் நீதிமன்றத்தில் முன்னிலைப்படுத்தினர். விசாரணையின்போது, இலஞ்ச ஊழல் விசாரணை ஆணைக்குழுவின் பெண் அதிகாரியின் நெறிப்படுத்தலில் வழக்கின் விசாரணை அதிகாரி ஒருவரிடம் சாட்சியங்கள் பதிவு செய்யப்பட்டன. அதனைத் தொடர்ந்து, பிரதிவாதி தரப்பில் முன்னிலையான ஜனாதிபதி சட்டத்தரணி ஷவீந்திர பெர்னாண்டோவின் நெறிப்படுத்தலில் குறுக்கு விசாரணைகள் இடம்பெற்றன. இதனையடுத்து, மேலதிக சாட்சிய விசாரணையை நவம்பர் 13ஆம் திகதிக்கு ஒத்திவைக்க நீதிமன்றம் உத்தரவிட்டது. 2013ஆம் ஆண்டு மே மாதம் 10ஆம் திகதி முதல் ஜூன் மாதம் 6ஆம் திகதி வரையான காலப்பகுதியில் சிவில் விமானப் போக்குவரத்து அமைச்சராகப் பதவி வகித்தபோது, சட்டவிரோதமாக 3,000 வெசாக் வாழ்த்து அட்டைகளை அச்சிடுவதற்கு நடவடிக்கை எடுத்ததன் மூலம் அரசாங்கத்திற்கு 128,520 ரூபாய் நட்டத்தை ஏற்படுத்தியதாக முன்னாள் அமைச்சர் மீது குற்றஞ்சாட்டப்பட்டுள்ளது. இதன் மூலம் ஊழல் குற்றத்தைப் புரிந்ததாகக் குற்றஞ்சாட்டி, இலஞ்ச ஊழல் விசாரணை ஆணைக்குழு அவருக்கு எதிராக இந்த வழக்கைத் தாக்கல் செய்துள்ளது.

பிரியங்கர ஜயரத்னவுக்கு எதிரான ஊழல் வழக்கு ஒத்திவைப்பு!

பிரியங்கர ஜயரத்னவுக்கு எதிரான ஊழல் வழக்கு ஒத்திவைப்பு!

You may also like