2026 ஆம் ஆண்டு நடைபெறவுள்ள உலகக் கிண்ண கால்பந்து போட்டிகளுக்கான அட்டவணையில் எந்தவித மாற்றமும் மேற்கொள்ளப்பட மாட்டாது என சர்வதேச கால்பந்து கூட்டமைப்பு உத்தியோகபூர்வமாக அறிவித்துள்ளது. தனது நாட்டுப் போட்டிகளை மெக்சிகோவிற்கு மாற்றுமாறு ஈரான் விடுத்த கோரிக்கையே நிராகரிக்கப்பட்டுள்ளது. ஈரான் மீதான அமெரிக்க - இஸ்ரேலிய போர்ச் சூழலைக் காரணம் காட்டி, அமெரிக்காவில் நடைபெறவுள்ள தமது போட்டிகளை மெக்சிகோவிற்கு மாற்றுமாறு ஈரான் கால்பந்து சம்மேளனத் தலைவர் மெஹ்தி தாஜ் கோரிக்கை விடுத்திருந்தார். ஈரானிய வீரர்களின் பாதுகாப்பிற்கு தன்னால் உத்தரவாதம் அளிக்க முடியாது என அமெரிக்க ஜனாதிபதி டொனால்ட் ட்ரம்ப் அண்மையில் அறவித்திருந்தார். இதனையடுத்தே, பாதுகாப்பு இல்லாத ஒரு நாட்டிற்கு தமது அணி வீரர்கள் செல்ல போவதில்லை என ஈரான் அறிவித்திருந்தது. ஈரானிய அணியினருக்கு விசா வழங்குவதிலும், ஏனைய வசதிகளைச் செய்து கொடுப்பதிலும் அமெரிக்கா ஒத்துழைக்கவில்லை என மெக்சிகோவிற்கான ஈரானிய தூதுவர் குற்றம் சுமத்தியிருந்தார். எனினும் கடந்த வருடம் டிசம்பர் 6 ஆம் திகதி வெளியிடப்பட்ட போட்டி அட்டவணையின் படியே அனைத்துப் போட்டிகளும் நடைபெறும் என பீபா திட்டவட்டமாக அறிவித்துள்ளது. 2026 உலகக் கிண்ணத் தொடரின் முதல் போட்டி ஜூன் 11 ஆம் திகதி மெக்சிகோவிற்கும் தென்னாபிரிக்காவிற்கும் இடையில் நடைபெறவுள்ளமை குறிப்பிடத்தக்கது.

பீபா போட்டி அட்டவணையில் மாற்றமில்லை

பீபா போட்டி அட்டவணையில் மாற்றமில்லை

You may also like