உயிர்த்த ஞாயிறு தினத் தாக்குதல்களில் பாதிக்கப்பட்டவர்களுக்கு நீதி கோரி, நீர்கொழும்பு குடிமக்கள் குழுவினால் ஏற்பாடு செய்யப்பட்ட அமைதியான போராட்டம் இன்று (21) கட்டுவபிட்டிய சந்திப்பில் நடைபெற்றது. உயிர்த்த ஞாயிறு தினத் தாக்குதல்களைத் தொடர்ந்து சத்தியத்தையும் நீதியையும் கோரி முன்னெடுக்கப்பட்டு வரும் தொடர் போராட்டங்களின் 89ஆவது மாதாந்திர போராட்டம் இதுவென ஏற்பாட்டாளர்கள் தெரிவித்துள்ளனர். இதேவேளை, 2019 ஏப்ரல் 21ஆம் திகதி இடம்பெற்ற உயிர்த்த ஞாயிறு தினத் தாக்குதல்கள் தொடர்பான பிரதான வழக்கில், கொழும்பு சிறப்பு மூவரடங்கிய உயர் நீதிமன்றம் நாளை (22) தீர்ப்பு வழங்கவுள்ளது. இதனை முன்னிட்டு போராட்டத்தில் கலந்துகொண்டவர்கள், நாளைய நீதிமன்றத் தீர்ப்பை எதிர்பார்த்துள்ளதாக தெரிவித்துள்ளனர். தாக்குதல்களில் உயிரிழந்தவர்கள், காயமடைந்தவர்கள் மற்றும் அவர்களது குடும்பத்தினருக்கு நீதி கிடைக்கும் வகையிலான தீர்ப்பு வழங்கப்படும் என தாம் நம்புவதாகவும் அவர்கள் குறிப்பிட்டுள்ளனர். உயிர்த்த ஞாயிறு தினத் தாக்குதல்களுக்கு சதித்திட்டம் தீட்டியமை, தாக்குதல்களை நடத்தியவர்களுக்கு உதவி மற்றும் உடந்தையாக இருந்தமை உள்ளிட்ட குற்றச்சாட்டுகளின் கீழ் 24 பிரதிவாதிகளுக்கு எதிராக 23,270க்கும் மேற்பட்ட குற்றச்சாட்டுகள் முன்வைக்கப்பட்டு இந்த வழக்கு விசாரணைக்கு எடுத்துக்கொள்ளப்பட்டுள்ளமை குறிப்பிடத்தக்கது.

உயிர்த்த ஞாயிறு தினத் தாக்குதல் விவகாரம் - நீர்கொழும்பில் போராட்டம்

உயிர்த்த ஞாயிறு தினத் தாக்குதல் விவகாரம் - நீர்கொழும்பில் போராட்டம்

You may also like