உயிர்த்த ஞாயிறு தின பயங்கரவாதத் தாக்குதலின் முக்கிய சூத்திரதாரியாக குறிப்பிடப்படும் சஹ்ரான் ஹாசிமுடன் தனக்கு எந்தவிதமான தொடர்பும் கிடையாது எனவும், அவரை தான் நேரில் கண்டதுமில்லை, பேசியதுமில்லை எனவும் அகில இலங்கை மக்கள் காங்கிரஸின் தலைவரும் பாராளுமன்ற உறுப்பினருமான ரிசாத் பதியுதீன் தெரிவித்துள்ளார். அம்பாறை, நிந்தவூர் பகுதியில் நடைபெற்ற விசேட ஊடகவியலாளர் சந்திப்பில் கலந்துகொண்டு கருத்து தெரிவிக்கும்போதே அவர் இதனை குறிப்பிட்டுள்ளார். உயிர்த்த ஞாயிறு தின தாக்குதலுக்கும் இலங்கை முஸ்லிம் சமூகத்திற்கும் எந்தவிதமான தொடர்பும் இல்லை என தெரிவித்த ரிசாத் பதியுதீன், சஹ்ரானின் பயங்கரவாத செயற்பாடுகளை முஸ்லிம் சமூகமோ அல்லது முஸ்லிம் அரசியல் தலைமைகளோ ஒருபோதும் ஆதரிக்கவில்லை எனவும் கூறினார். தாக்குதலில் பாதிக்கப்பட்ட மக்களுக்கு உரிய நீதி கிடைக்க வேண்டும் என்பதில் முஸ்லிம் சமூகம் உறுதியாக இருப்பதாகவும் அவர் தெரிவித்தார். உயிர்த்த ஞாயிறு தின தாக்குதலின் பின்னர் அரசியல்வாதியாக தானும் பாதிக்கப்பட்டதாக குறிப்பிட்ட அவர், பாராளுமன்ற உறுப்பினராகவும் தேசிய கட்சியொன்றின் தலைவராகவும் இருந்த தன்னை சபாநாயகருக்குக்கூட அறிவிக்காமல் இரவோடு இரவாக கைது செய்து சிறையில் அடைத்ததாக தெரிவித்தார். முன்னாள் விடுதலைப் புலிகள் அமைப்பின் உறுப்பினர் ஒருவர் தமக்கு எதிராக முன்வைத்துள்ளதாகக் கூறப்படும் ஆதாரமற்ற குற்றச்சாட்டுகளை அடிப்படையாகக் கொண்டு சில ஊடகங்கள் செய்திகளை வெளியிட்டு வருவதாகவும் அவர் குற்றம் சுமத்தினார். சஹ்ரானுடன் தனக்கு எந்தவித தொடர்பும் இல்லை என தெரிவித்த ரிசாத் பதியுதீன், தமக்கு எதிராக பொய்யான குற்றச்சாட்டுகளை முன்வைப்பவர்களுக்கு எதிராக சட்ட நடவடிக்கை எடுக்கத் தயங்கமாட்டேன் எனவும் கூறினார். உயிர்த்த ஞாயிறு தின தாக்குதல் தொடர்பில் நேர்மையானதும் சுயாதீனமானதுமான விசாரணைகள் நடத்தப்பட்டு உண்மை வெளிக்கொண்டு வரப்பட வேண்டும் எனவும், பாதிக்கப்பட்ட மக்களுக்கு நீதி கிடைப்பதற்காக முன்னெடுக்கப்படும் முறையான விசாரணைகளுக்கு முழுமையான ஒத்துழைப்பை வழங்கத் தயாராக இருப்பதாகவும் அவர் மேலும் குறிப்பிட்டுள்ளார். (பாறுக் ஷிஹான்)

சஹ்ரானுடன் எந்தத் தொடர்பும் இல்லை; நேரில் கண்டதுமில்லை – ரிசாத் பதியுதீன்

சஹ்ரானுடன் எந்தத் தொடர்பும் இல்லை; நேரில் கண்டதுமில்லை – ரிசாத் பதியுதீன்

You may also like