இலங்கையில் மீண்டும் மீண்டும் இடம்பெற்ற சிறைச்சாலை படுகொலைகள் தொடர்பில் முழுமையான பொறுப்புக்கூறல் கிடைக்கவில்லை. சிறைச்சாலைகள் அவற்றின் கொள்ளளவை விட 300 சதவீதத்துக்கும் அதிகமாக நெரிசலடைந்துள்ளன.&nbsp; சித்திரவதை, கட்டாய காணாமல்போதல் மற்றும் கைதிகளின் குடும்பத்தினர், சட்டத்தரணிகள் மற்றும் மனித உரிமைகள் ஆணைக்குழுவினருக்கான அணுகல் கட்டுப்படுத்தப்படுதல் தொடர்பில் பரவலான குற்றச்சாட்டுகள் முன்வைக்கப்பட்டுள்ளன. இந்தப் பின்னணியில் கடந்த ஐந்து ஆண்டுகளில் தடுப்புக்காவலில் இருந்த நிலையில் 1,021 கைதிகள் உயிரிழந்துள்ளதாக கைதிகளின் உரிமைகளைப் பாதுகாப்பதற்கான ஆணைக்குழு, ஐக்கிய நாடுகள் சபைக்கு அறிக்கை சமர்ப்பித்துள்ளது. சிறைச்சாலைகளில் மீண்டும் மீண்டும் இடம்பெறும் வன்முறைகளை முடிவுக்குக் கொண்டுவருவதற்கும் உண்மையான பொறுப்புக்கூறலை உறுதிசெய்வதற்கும் இலங்கை மீது அழுத்தம் கொடுக்குமாறு சர்வதேச சமூகத்தை நாம் கேட்டுக்கொள்வதாகவும் அந்த ஆணைக்குழு சுட்டிக்காட்டியுள்ளது. ஜெனீவாவில் நடைபெற்ற ஐக்கிய நாடுகள் மனித உரிமைகள் பேரவையின் 63ஆவது அமர்வில் நேற்று முன்தினம் (16) உண்மை, நீதி, இழப்பீடு மற்றும் மீள்நிகழாமைக்கான உத்தரவாதங்களை மேம்படுத்துதல் தொடர்பான சிறப்பு அறிக்கையாளருடன் இடம்பெற்ற ஊடாடும் கலந்துரையாடலில் சட்டத்தரணி பிரபோத ரத்நாயக்கவால் முன்வைக்கப்பட்ட வாய்மொழி அறிக்கையில்,பெக்ஸ் ரோமனா அமைப்பும் கைதிகளின் உரிமைகளைப் பாதுகாப்பதற்கான குழுவும் இணைந்து, மறுப்பு மனப்பான்மை இடைக்கால நீதியின் அனைத்து தூண்களையும் பலவீனப்படுத்துவதுடன், பின்னடைவு மற்றும் மீண்டும் இடம்பெறும் உரிமை மீறல்களுக்கு வழிவகுக்கும் என்பதைச் சுட்டிக்காட்டும் சிறப்பு அறிக்கையாளரின் அறிக்கையை வரவேற்கின்றன. இது இலங்கைக்கு மிகவும் பொருந்தக்கூடிய விடயமாகும். வெலிக்கடை சிறைச்சாலையில் 1983ஆம் ஆண்டு 53 தமிழ் அரசியல் கைதிகளும் 2012ஆம் ஆண்டு 27 கைதிகளும் கொல்லப்பட்டனர். மஹர சிறைச்சாலையில் 2020ஆம் ஆண்டு 22 கைதிகள் கொல்லப்பட்டனர். 2026 ஜூலை மாதம் நீர்கொழும்பு சிறைச்சாலையில் 32 கைதிகள் மற்றும் அதிகாரிகள் கொல்லப்பட்டனர். இதுபோன்ற மேலும் பல சம்பவங்கள் இடம்பெற்றுள்ளன. இந்தக் குற்றங்கள் எதற்கும் இதுவரை பொறுப்புக்கூறல் இல்லை. கடந்த ஐந்து ஆண்டுகளில், காவலில் இருந்த நிலையில் 1,021 கைதிகள் உயிரிழந்துள்ளனர். கடந்த ஜூலை மாதம் நீர்கொழும்பு சிறைச்சாலையில் இடம்பெற்ற வன்முறையைத் தொடர்ந்து, கைதிகள் வேறு சிறைச்சாலைகளுக்கு மாற்றப்பட்ட பின்னர் சித்திரவதைகள் இடம்பெற்றதாகவும் அதன் விளைவாக மரணங்கள் ஏற்பட்டதாகவும் குற்றச்சாட்டுகள் முன்வைக்கப்பட்டுள்ளன. சிறைச்சாலைகளிலிருந்து குறைந்தது ஆறு கட்டாயக் காணாமல்போதல் சம்பவங்கள் பதிவாகியுள்ளன. அவர்கள் சில வாரங்கள் அல்லது சில மாதங்களுக்குப் பின்னரே கண்டுபிடிக்கப்பட்டனர். குடும்பத்தினர், சட்டத்தரணிகள் மற்றும் மனித உரிமைகள் ஆணைக்குழுவினருக்கான அணுகல் தன்னிச்சையான முறையில் கட்டுப்படுத்தப்பட்டுள்ளது. 2026 ஓகஸ்ட் மாத நிலைவரப்படி, இலங்கையின் சிறைச்சாலைகள் அவற்றின் கொள்ளளவை விட 300 சதவீதத்துக்கும் அதிகமாக நெரிசலடைந்திருந்தன. மேலும், 72 சதவீதத்துக்கும் அதிகமான கைதிகள் வழக்கு விசாரணையை எதிர்பார்த்து தடுத்து வைக்கப்பட்டுள்ளனர். உள்நாட்டுப் போர் முடிவடைந்து 17 ஆண்டுகளுக்கும் மேலாகியுள்ள நிலையிலும் 10 அரசியல் கைதிகள் தடுத்து வைக்கப்பட்டுள்ளதாகத் தெரிவிக்கப் படுகிறது. இவர்களை விடுவிப்பதாக அரசாங்கம் அளித்த வாக்குறுதிகள் இருந்தபோதிலும் அவர்கள் தொடர்ந்து தடுத்து வைக்கப்பட்டுள்ளனர். மாற்றுத்திறனாளி கைதிகளுக்கான விசேட வசதிகள் இல்லை. அதேவேளை, நேர்பாலீர்ப்பு கைதிகள் பாலியல் வன்முறைக்கு உள்ளாகும் அபாயத்தில் உள்ளனர். கடந்த காலத்திலும் அண்மைக் காலத்திலும் இடம்பெற்ற குற்றங்களுக்கு பொறுப்புக்கூறலை உறுதிசெய்வதற்கும் சிறைச்சாலைகளில் மீண்டும் வன்முறை இடம்பெறுவதைத் தடுப்பதற்கான நடவடிக்கைகளை மேற்கொள்வதற்கும் இலங்கை அரசாங்கத்துடன் ஈடுபட்டு செயற்படுமாறு உறுப்புநாடுகளையும் ஐக்கிய நாடுகள் அதிகாரிகளையும் நாங்கள் கேட்டுக்கொள்கிறோம் என்று குறிப்பிட்டுள்ளார். நா. தினுஷா

கடந்த 5 ஆண்டுகளில் 1,021 கைதிகள் உயிரிழப்பு - ஐ.நா. சபைக்கு அறிக்கை சமர்ப்பிப்பு

கடந்த 5 ஆண்டுகளில் 1,021 கைதிகள் உயிரிழப்பு - ஐ.நா. சபைக்கு அறிக்கை சமர்ப்பிப்பு

You may also like