மலையகத் தமிழ் மக்கள் இலவசக் கல்வியின் பயனை 1972ஆம் ஆண்டுக்குப் பின்னரே அனுபவிக்கத் தொடங்கினர் என மகளிர் மற்றும் சிறுவர் விவகார அமைச்சர் சரோஜா சாவித்திரி போல்ராஜ் தெரிவித்துள்ளார். கண்டியிலுள்ள கல்லூரியில் கடந்த 25ஆம் திகதி நடைபெற்ற ‘கடவாசல்’ வரலாற்று நாவல் அறிமுக விழாவில் பிரதம அதிதியாகக் கலந்துகொண்டு உரையாற்றும்போதே அவர் இதனைத் தெரிவித்தார். கண்டி மக்கள் கலை இலக்கிய ஒன்றியத்தின் ஏற்பாட்டில் நடைபெற்ற இந்நிகழ்வில், இவ்வாண்டு அரச சாகித்திய விருதைப் பெற்ற ர. நித்தியானந்தனின் ‘கடவாசல்’ நாவல் அறிமுகம் செய்யப்பட்டது. இதன்போது தொடர்ந்து உரையாற்றிய அமைச்சர், சி.டபிள்யூ.டபிள்யூ. கன்னங்கராவினால் 1944ஆம் ஆண்டு இலவசக் கல்வி அறிமுகப்படுத்தப்பட்ட போதிலும், அதன் பயன்கள் மலையக மக்களை முறையாகச் சென்றடையவில்லை எனக் குறிப்பிட்டார். 1972ஆம் ஆண்டு கொண்டுவரப்பட்ட குடியரசு அரசியலமைப்புக்குப் பின்னரே மலையகத் தமிழ் மக்கள் இலவசக் கல்வியின் பயனை அனுபவிக்கத் தொடங்கியதாகவும் அவர் தெரிவித்தார். மேலும், வரலாற்றில் தோல்வியடைந்த போராட்டங்கள் குறித்துப் பேசுகையில், இலங்கையில் மக்கள் விடுதலை முன்னணியினால் முன்னெடுக்கப்பட்ட இரு கிளர்ச்சிகளின் தோல்விகளிலிருந்து கற்றுக்கொண்ட பாடம், நாடாளுமன்றத் தேர்தல்களின் ஊடாகவே தேவையான மாற்றங்களை ஏற்படுத்த முடியும் என்பதாகும் எனக் குறிப்பிட்டார். அத்துடன், தோல்வியில் முடிவடைந்த போராட்டத்தை மையமாகக் கொண்டு ர. நித்தியானந்தனால் எழுதப்பட்ட ‘கடவாசல்’ நாவல், தற்போதைய அரசாங்கத்தின் ஆட்சிக் காலத்தில் வெளிவந்த முதலாவது அரசியல் வரலாற்று நாவலாக அமைவதாகவும் அவர் தெரிவித்தார். இந்நிகழ்வில் உரையாற்றிய மாத்தளை இஸ்லாமிய தமிழ் இலக்கியப் பேரவையின் தலைவர் எம்.எம். பீர் முஹம்மத், வரலாற்று நாவல்களை எழுதுவதற்கு மொழியாற்றல், கற்பனை வளம் மற்றும் வரலாற்றுச் சம்பவங்கள் குறித்த ஆழமான அறிவு மட்டுமன்றி, நீண்டகால உழைப்பும் அர்ப்பணிப்பும் அவசியம் எனத் தெரிவித்தார். 1970 மற்றும் 1980களில் இடம்பெற்ற அரசியல் எழுச்சிகளை மையமாகக் கொண்டு எழுதப்பட்ட ‘கடவாசல்’ நாவல், இவ்வாண்டு சாகித்திய விருதைப் பெற்றுள்ளமை குறிப்பிடத்தக்கது. இந்நிகழ்வில் கல்வியாளர்கள், இலக்கியவாதிகள், சமூக செயற்பாட்டாளர்கள் உள்ளிட்ட பலரும் கலந்துகொண்டு உரையாற்றினர்.

1972க்குப் பின்னரே மலையக மக்களுக்கு இலவசக் கல்வி – அமைச்சர்

1972க்குப் பின்னரே மலையக மக்களுக்கு இலவசக் கல்வி – அமைச்சர்

You may also like