சர்வதேச நாணய நிதியத்தின் (IMF) நிபந்தனைகளுக்கு ஏற்ப எரிபொருள் விலைகளை அதிகரிப்பதைத் தவிர்த்து, திறைசேரியில் சேமிக்கப்பட்டுள்ள நிதியைப் பயன்படுத்தி மக்களுக்கு எரிபொருள் சலுகைகளை வழங்க அரசாங்கம் நடவடிக்கை எடுக்க வேண்டுமென எதிர்க்கட்சித் தலைவர் சஜித் பிரேமதாச கோரிக்கை விடுத்துள்ளார். இன்று (5) விசேட அறிக்கையொன்றை வெளியிட்டு கருத்து தெரிவித்த அவர், செலவை ஈடுசெய்யும் எரிபொருள் விலை நிர்ணய முறையை நடைமுறைப்படுத்தி எரிபொருள் விலைகளை அதிகரிக்குமாறு IMF பிரதிநிதிகள் அரசாங்கத்திடம் யோசனை முன்வைத்துள்ளதாகக் குறிப்பிட்டுள்ளார். IMF உடனான தற்போதைய இணக்கப்பாட்டை மாற்றியமைப்பதாக வாக்குறுதியளித்தே மக்கள் அரசாங்கத்திற்கு ஆணை வழங்கியதாகவும், எனினும் அந்த வாக்குறுதி நிறைவேற்றப்படாமல் பழைய இணக்கப்பாடே தொடர்ந்தும் நடைமுறைப்படுத்தப்படுவதாகவும் அவர் தெரிவித்தார். மக்கள் மீது வரிச்சுமை அதிகரிக்கப்பட்டுள்ள நிலையில், பொருளாதார நெருக்கடிக்கு முகங்கொடுத்துள்ள சாதாரண மக்களுக்கு இலக்குவைக்கப்பட்ட முறையில் எரிபொருள் சலுகைகளை வழங்க வேண்டும். அத்துடன், உண்மையான தரவுகளின் அடிப்படையில் குறைந்த வருமானம் பெறும் மக்களை அடையாளம் கண்டு அவர்களுக்கு உரிய சலுகைகளை வழங்குவதற்கான முறையான பொறிமுறையொன்றை அரசாங்கம் உருவாக்க வேண்டும். மக்கள் பெரும் பொருளாதார அழுத்தங்களை எதிர்கொண்டுள்ள நிலையில், அரசாங்கம் தனது தேர்தல் வாக்குறுதிகளை நிறைவேற்றி மக்களுக்கு நிவாரணம் வழங்க வேண்டும் எனவும், IMF இன் நிபந்தனைகளுக்கு அமைவாக எரிபொருள் விலைகளை அதிகரிப்பதைத் தவிர்க்க வேண்டும் எனவும் எதிர்க்கட்சித் தலைவர் சஜித் பிரேமதாச மேலும் கோரிக்கை விடுத்தார்.

எரிபொருள் விலை உயர்வை தவிர்க்குமாறு சஜித் கோரிக்கை

எரிபொருள் விலை உயர்வை தவிர்க்குமாறு சஜித் கோரிக்கை

You may also like