வான்பரப்பு மூடப்பட்டதன் காரணமாக தற்காலிகமாக நிறுத்தப்பட்டிருந்த டுபாய் சர்வதேச விமான நிலையங்களின் சேவைகள், இன்று (மார்ச் 2) மாலை முதல் மீண்டும் வழமைக்குத் திரும்பவுள்ளதாக அந்நாட்டு விமான நிலைய அதிகாரசபை அறிவித்துள்ளது. மத்திய கிழக்கில் நிலவும் போர் பதற்றமான சூழல் மற்றும் பாதுகாப்பு காரணங்களைக் கருத்திற்கொண்டு, நேற்று (மார்ச் 1, ஞாயிற்றுக்கிழமை) டுபாயின் இரண்டு சர்வதேச விமான நிலையங்களும் மூடப்பட்டன. ஈரான், அமெரிக்கா மற்றும் இஸ்ரேல் இடையிலான மோதல்கள் காரணமாக வான்பரப்பு பாதுகாப்பற்றதாகக் கருதப்பட்டதே இதற்கு முக்கிய காரணமாகும். இன்று மாலை முதல் விமானங்கள் இயக்கப்பட்டாலும், அவை முழுமையான அளவில் இருக்காது எனத் தெரிவிக்கப்பட்டுள்ளது: ஆரம்பத்தில் குறைந்த அளவிலான விமானங்களே இயக்கப்படும்.ஏற்கனவே முன்பதிவு செய்து காத்திருக்கும் பயணிகளுக்கு மாத்திரம் முன்னுரிமை அளிக்கப்படும். 'எமிரேட்ஸ்' (Emirates) மற்றும் 'ப்ளை டுபாய்' (flydubai) ஆகிய நிறுவனங்கள் தமது சேவைகளைக் குறைந்த எண்ணிக்கையில் ஆரம்பிக்கவுள்ளன. உரிய தகவல் அல்லது உறுதிப்படுத்தல் கிடைக்கும் வரை பயணிகள் எவரும் விமான நிலையங்களுக்கு வர வேண்டாம் என அறிவுறுத்தப்பட்டுள்ளது. சம்பந்தப்பட்ட பயணிகளுக்கு விமான நிறுவனங்கள் மூலம் நேரடியாகத் தகவல்கள் வழங்கப்பட்டு வருகின்றன. பயணிகள் தமது பயணத் திட்டங்களை மாற்றியமைக்கும் முன், அந்தந்த விமான நிறுவனங்களின் அதிகாரப்பூர்வ இணையதளங்கள் மற்றும் சமூக ஊடகப் பக்கங்களைச் சரிபார்க்குமாறு கேட்டுக்கொள்ளப்பட்டுள்ளனர். மத்திய கிழக்கின் தற்போதைய பதற்றமான சூழலில், வான் பாதுகாப்பு உறுதிப்படுத்தப்பட்ட பின்னரே இந்தச் சேவைகள் படிப்படியாக அதிகரிக்கப்படும் என எதிர்பார்க்கப்படுகிறது.

டுபாயில் இன்று மாலை முதல் விமான சேவைகள் ஆரம்பம்!

டுபாயில் இன்று மாலை முதல் விமான சேவைகள் ஆரம்பம்!

You may also like