முல்லைத்தீவு - புதுக்குடியிருப்பு கமநலசேவைநிலையப் பிரிவிலுள்ள வீரசிங்கம், சித்தாறு, ஜங்கன், சிவசாமி ஆகிய அணைக்கட்டுக்களின் கட்டுமானப்பணிகள் குறித்து வன்னிமாவட்ட பாராளுமன்ற உறுப்பினர் துரைராசா ரவிகரன், முல்லைத்தீவு மாவட்ட கமநல அபிவிருத்தி உதவி ஆணையாளரிடம் கேள்வி எழுப்பியுள்ளார். இந்நிலையில் சிவசாமி அணைக்கட்டினுடைய கட்டுமானப்பணிகள் பூர்த்தி செய்யப்பட்டுள்ளதாகத் தெரிவித்த முல்லைத்தீவு மாவட்ட கமநல உதவி ஆணையாளர், வீரசிங்கம், சித்தாறு அணைக்கட்டுகளின் கட்டுமானப்பணிகள் இன்னும் ஒரு வாரத்திற்குள் பூர்த்திசெய்யப்படுமெனவும், ஜங்கன் அணைக்கட்டின் கட்டுமானப்பணிகள் எதிர்வரும் ஏப்ரல் மாதத்திற்குள்ளும் பூர்த்தி செய்யப்படுமெனவும் தெரிவித்துள்ளார். முல்லைத்தீவு மாவட்ட கமநல அபிவிருத்தித் திணைக்களத்தில் இன்று (26) பாராளுமன்ற உறுப்பினர் ரவிகரனுக்கும் முல்லைத்தீவு மாவட்ட கமநல உதவி ஆணையாளருக்குமிடையில் சந்திப்பொன்று இடம்பெற்றது. இச்சந்திப்பிலேயே இவ்விடயம் தொடர்பில் கலந்துரையாடப்பட்டுள்ளது. இது தொடர்பில் மேலும் தெரியவருகையில், உலகவங்கியின் நிதி உதவியில் 'சியாப்' நிறுவனத்தின் ஊடாக முன்னெடுக்கப்பட்ட புதுக்குடியிருப்பு கிழக்கு கமக்கார அமைப்பின்கீழ் காணப்படும் வீரசிங்கம், சித்தாறு அணைக்கட்டுக்கள் மற்றும் மல்லிகைத்தீவு கமக்கார அமைப்புப் பிரிவிற்குட்பட்ட ஜங்கன் அணைக்கட்டு ஆகிய அணைக்கட்டுக்களை அமைப்பதில் காலதாமதம் ஏற்பட்டுள்ளதால் தாம் பலத்த இடர்பாடுகளுக்கு முகங்கொடுத்து வருவதாக அப்பகுதி விவசாயிகள் நாடாளுமன்ற உறுப்பினர் ரவிகரனிடம் முறையீடு செய்திருந்தனர். இந்நிலையில் விவசாயிகளின் முறையீட்டிற்கு அமைவாக குறித்த அணைக்கட்டுக்களை அமைப்பதில் ஏற்பட்டுள்ள தாமதம் தொடர்பில் கடந்த 27.01.2026 இடம்பெற்ற முல்லைத்தீவு மாவட்ட அபிவிருத்தி ஒருங்கிணைப்புக் குழுக் கூட்டத்தில் பாராளுமன்ற உறுப்பினர் ரவிகரன் முல்லைத்தீவு மாவட்ட கமநல உதவி ஆணையாளரிடம் கேள்வி எழுப்பியிருந்தார். இந்நிலையில் கடந்த பெப்ரவரி மாதத்திற்குள் குறித்த அணைக்கட்டுக்களின் வேலைகளை பூர்த்திசெய்வதற்கு நடவடிக்கை மேற்கொள்ளப்படுமென குறித்த முல்லைத்தீவு மாவட்ட அபிவிருத்தி ஒருங்கிணைப்புக் குழுக்கூட்டத்தில் கமநல அபிவிருத்தி உதவி ஆணையாளரால் பதில் வழங்கப்பட்டிருந்தது. இந்நிலையில் இவ்வாறு கமநல உதவி ஆணையாளரால் பதில் வழங்கப்பட்டிருந்த நிலையிலும் இதுவரை குறித்த அணைக்கட்டுக்களின் வேலைகள் பூத்திசெய்யப்படவில்லை என அப்பகுதி விவசாயிகளால் அண்மையில் பாராளுமன்ற உறுப்பினரின் கவனத்திற்கு கொண்டுவரப்பட்டது. இத்தகையசூழலில் இன்று முல்லைத்தீவு மாவட்ட கமநல உதவி ஆணையாளரை நேரில் சந்தித்த பாராளுமன்ற உறுப்பினர் குறித்த அணைக்கட்டுக்களின் கட்டுமானப் பணிகள் குறித்து கேள்வி எழுப்பியிருந்தார். இதன்போது புதுக்குடியிருப்ப கிழக்கு கமக்கார அமைப்பிலுள் வீரசிங்கம், சித்தாறு அணைக்கட்டுகளின் பணிகள் இன்னும் ஒரு வாரத்திற்குள் பூர்த்திசெய்யப்படுமெனவும், மல்லிகைத்தீவு கமக்கார அமைப்பு பிரிவிலுள்ள ஜங்கன் அணைக்கட்டின் பணிகள் எதிர்வரும் ஏப்ரல் மாதத்திற்குள் பூர்த்தி செய்யப்படுமெனவும் முல்லைத்தீவு மாவட்ட கமநல உதவி ஆணையாளர் பதிலளித்தார். அணைக்கட்டு அமைக்கும் பணிகள் துரிதமாக இடம்பெற்று வருகின்றமைக்கு கமநல உதவி ஆணையாளருக்கு நன்றி தெரிவித்த பாராளுமன்ற உறுப்பினர், அணைக்கட்டின் பணிகளை உரியகாலத்திற்குள் முழுமைப்படுத்தி விவசாயிகளிடம் கையளிக்குமாறும் கேட்டுக்கொண்டார். (விஜயரத்தினம் சரவணன்)

முல்லைத்தீவு அணைக்கட்டுகள் - முன்னேற்றம் குறித்து ரவிகரன் கேள்வி

முல்லைத்தீவு அணைக்கட்டுகள் - முன்னேற்றம் குறித்து ரவிகரன் கேள்வி

You may also like