நாட்டின் விவசாய–உணவுத் துறையை அதிக உற்பத்தித்திறன் கொண்டதாகவும், சவால்களுக்கு ஈடுகொடுக்கக்கூடியதாகவும், போட்டித்தன்மை மிக்க பொருளாதாரத்தை நோக்கி முன்னேற்றும் துறையாகவும் மாற்றுவதே ‘அக்ரிகனெக்ட் ஸ்ரீலங்கா’ திட்டத்தின் நோக்கம் எனப் பிரதமர் கலாநிதி ஹரிணி அமரசூரிய தெரிவித்துள்ளார். இலங்கை அக்ரிகனெக்ட் கூட்டு நடைமுறைப்படுத்தல் திட்டத்தின் அங்குரார்ப்பண நிகழ்வு நேற்று (30) கொழும்பில் நடைபெற்றது. இதில் கலந்துகொண்டு உரையாற்றிய பிரதமர், விவசாயத் துறையை நவீனமயப்படுத்துவதிலும், தேசிய பொருளாதாரத்தை வலுப்படுத்துவதிலும் டிஜிட்டல் மயமாக்கல் முக்கிய பங்கு வகிப்பதாகக் குறிப்பிட்டார். உலக வங்கிக் குழுமம், இலங்கை அரசாங்கம் மற்றும் சர்வதேச விவசாய அபிவிருத்தி நிதியம் (IFAD) ஆகியவற்றின் கூட்டாண்மையுடன் இத்திட்டம் நடைமுறைப்படுத்தப்படுகிறது. சிறு விவசாயத் துறையை மேம்படுத்துதல், வேலைவாய்ப்புகளை உருவாக்குதல் மற்றும் உலகளாவிய உணவுப் பாதுகாப்பை வலுப்படுத்துதல் ஆகியவை இதன் பிரதான இலக்குகளாகும். நாட்டின் பொருளாதாரத்தை கட்டியெழுப்புவதற்கும் நீண்டகால அபிவிருத்தியை உறுதிப்படுத்துவதற்கும் விவசாயிகளுக்கு ஆதரவளித்தல், உணவு முறைமைகளை வலுப்படுத்துதல் மற்றும் கிராமிய சமூகங்களுக்கான வாய்ப்புகளை விரிவுபடுத்துதல் அவசியம் எனப் பிரதமர் வலியுறுத்தினார். மேலும், 2027–2031ஆம் ஆண்டுகளுக்கான பொது முதலீட்டுத் திட்டத்தின் கீழ், ஐந்து வருட காலப்பகுதியில் சுமார் 17.5 ட்ரில்லியன் ரூபா பொது முதலீடுகளுக்காக ஒதுக்கப்பட்டுள்ளதாகவும், அதில் 8.3 ட்ரில்லியன் ரூபா உற்பத்தியை அடிப்படையாகக் கொண்ட பொருளாதார மாற்றத்திற்காக ஒதுக்கப்பட்டுள்ளதாகவும் தெரிவித்தார். விவசாயம், கைத்தொழில், சுற்றுலா, புத்தாக்கம் மற்றும் டிஜிட்டல் மாற்றம் ஆகிய துறைகளை வலுப்படுத்துவதுடன், தொழில்நுட்பம் மற்றும் மூலோபாயக் கூட்டாண்மைகள் ஊடாக விவசாயத்தை நவீனமயப்படுத்தி நிலையான பொருளாதார வளர்ச்சியை உறுதிப்படுத்த வேண்டும் என்றும் பிரதமர் மேலும் தெரிவித்தார். இந்நிகழ்வில் அமைச்சர்கள், அரச அதிகாரிகள், உலக வங்கிக் குழுமம் மற்றும் IFAD பிரதிநிதிகள், தனியார் துறையினர், விவசாய அமைப்புகள் உள்ளிட்ட பலர் கலந்துகொண்டனர்.

உணவுத் துறையை நவீனமயமாக்கும் ‘அக்ரிகனெக்ட் ஸ்ரீலங்கா’ திட்டம்!

உணவுத் துறையை நவீனமயமாக்கும் ‘அக்ரிகனெக்ட் ஸ்ரீலங்கா’ திட்டம்!

You may also like