குறைந்த வருமானம் கொண்ட குடும்பங்களுக்கு வழங்கப்படும் அஸ்வெசும நலன்புரித் திட்டத்தின் பயனாளிகளின் எண்ணிக்கை, 2025ஆம் ஆண்டுடன் ஒப்பிடுகையில் இந்த ஆண்டு பாதியாகக் குறைந்துள்ளதாக நிதி மற்றும் திட்டமிடல் பிரதி அமைச்சர் அனில் ஜயந்த பெர்னாண்டோ இன்று (11) பாராளுமன்றத்தில் தெரிவித்துள்ளார். எதிர்க்கட்சித் தலைவர் சஜித் பிரேமதாச எழுப்பிய கேள்விக்கு பதிலளிக்கும்போதே அவர் இதனை குறிப்பிட்டுள்ளார். 2025ஆம் ஆண்டு 24 இலட்சத்து 39,917 பயனாளிகள் இருந்த நிலையில், 2026ஆம் ஆண்டு ஓகஸ்ட் மாதத்திற்குள் அந்த எண்ணிக்கை 12 இலட்சத்து 51,522 ஆகக் குறைந்துள்ளதாக தெரிவித்துள்ளார். இந்தக் குறைப்பு உலக வங்கி அல்லது சர்வதேச நாணய நிதியத்தின் அறிவுறுத்தலின் அடிப்படையில் மேற்கொள்ளப்பட்டதல்ல எனத் தெரிவித்த அமைச்சர், அஸ்வெசும திட்டத்தின் கீழ் மேற்கொள்ளப்படும் மறுகணக்கெடுப்பு மற்றும் பயனாளர்களின் தகுதி மறுசான்றிதழ் காரணமாகவே எண்ணிக்கை குறைந்துள்ளதாக விளக்கமளித்தார். முதற்கட்ட மற்றும் இரண்டாம் கட்ட விண்ணப்பங்களின் மறுசான்றிதழ் நடவடிக்கைகள் தற்போது இடம்பெற்று வருவதுடன், அவை செப்டெம்பர் மாத இறுதிக்குள் நிறைவடையும் என எதிர்பார்க்கப்படுவதாகவும் அமைச்சர் குறிப்பிட்டுள்ளார். அஸ்வெசும திட்டத்தின் கீழ் மிகவும் ஏழ்மையானோர், ஏழ்மையானோர், நலிவடைந்தோர் மற்றும் இடைநிலைப் பிரிவினர் என நான்கு பிரிவுகளுக்கு நிவாரணம் வழங்கப்பட்டு வந்த நிலையில், தற்போது மிகவும் ஏழ்மையானோர் மற்றும் ஏழ்மையான பிரிவினருக்கு மாத்திரம் நிவாரணம் வழங்கப்பட்டு வருவதாகவும் அவர் கூறியுள்ளார்.

அஸ்வெசும பயனாளிகள் எண்ணிக்கை குறைவு - அமைச்சர் அனில் ஜயந்த

அஸ்வெசும பயனாளிகள் எண்ணிக்கை குறைவு - அமைச்சர் அனில் ஜயந்த

You may also like