மட்டக்களப்பு மாவட்டத்தில் ஜனவரி மாதம் முதலாம் திகதி தொடக்கம் ஒக்டோபர் 18 ஆம் திகதி வரை 92 பேர் உயிர்மாய்ப்பு செய்து கொண்டுள்ளதாக தெரிவிக்கப்பட்டுள்ளது. மட்டக்களப்பு நாவற்குடா பிரதேசத்தில் பெண்(44) ஒருவர் வீட்டின் அறையின் கூரையில் தூக்கில் தொங்கி உயிர்மாய்ப்பு செய்து கொண்ட சம்பவம் நேற்று(17) இடம்பெற்றதுடன் மீண்டும் மாவட்டத்தில் உயிர்மாய்ப்பு சம்பவங்கள் அதிகரித்துள்ளதாக தெரிவிக்கப்பட்டுள்ளது. காத்தான்குடி பொலிஸ் பிரிவிலுள்ள நாவற்குடா கணக்குபிள்ளை வீதியைச் சேர்ந்த 44 வயதுடைய ரவீந்திரன் நிரோஜினி என்பவரே இவ்வாறு உயிரிழந்துள்ளார். குறித்த பெண் சம்பவ தினமான சனிக்கிழமை இரவு 8.00 மணியளவில் வீட்டின் அறையில் தூக்கில் தொங்கி உயிர்மாய்ப்பு செய்து கொண்ட நிலையில் சடலமாக மீட்கப்பட்டு பிரேத பரிசோதனைக்காக மட்டு.போதனா வைத்தியசாலை பிரேத அறையில் ஒப்படைக்கப்பட்டுள்ளதாக பொலிஸார் தெரிவித்தனர். இது தொடர்பான மேலதிக விசாரணைகளை காத்தான்குடி பொலிஸார் மேற்கொண்டு வருகின்றனர். இதேவேளை மாவட்டத்தில் கடந்த 2025 ஆம் ஆண்டு ஜனவரி&nbsp;முதலாம் திகதி தொடக்கம் டிசம்பர் 31 ஆம் திகதி வரை 147 பேர் உயிர்மாய்ப்பு செய்து கொண்டனர். இந்த நிலையில் 2026 ஜனவரி முதலாம் திகதி தொடக்கம் ஒக்டோபர் 18 வரை காலப்பகுதியில் 92 பேர் உயிர்மாய்ப்பு செய்து கொண்டதுடன் கடந்த 12ம் திகதி உயிர்மாய்ப்பு செய்வதற்கு கல்லடி பாலத்தில் இருந்து வாவிக்குள் குதித்த 19 வயது இளம் யுவதி ஒருவரை மீனவர்கள் காப்பாற்றியதுடன் கடந்த 15 ம் திகதி சித்தாண்டியில் 21 வயது இளம் யுவதி ஒருவர் உயிர்மாய்ப்பு செய்து கொண்டார். இவ்வாறு மாவட்டத்தில் மீண்டும் உயிர்மாய்ப்பு அதிகரித்து வருவதாக எமது பிராந்திய செய்தியாளர் தெரிவித்துள்ளார். இது தொடர்பாக மாவட்டத்திலுள்ள அனைத்து தரப்பினரும் கவனம் செலுத்தி காரணங்களை கண்டறிந்து இந்த உயிர்மாய்ப்புகளை தடுக்க வழிகோலுமாறு பொதுமக்கள் கோரிக்கை விடுத்துள்ளனர். (கனகராஜா சரவணன் )

மட்டக்களப்பில் அதிகரிக்கும் உயிர்மாய்ப்பு சம்பவங்கள்!

மட்டக்களப்பில் அதிகரிக்கும் உயிர்மாய்ப்பு சம்பவங்கள்!

You may also like