கடந்த காலங்களில் இடம்பெற்றதாகக் கூறப்படும் படுகொலைகள், காணாமல் ஆக்கப்பட்ட சம்பவங்கள் மற்றும் மனித உரிமை மீறல்களுக்கு நீதி மற்றும் பொறுப்புக்கூறலை வலியுறுத்தி, “நீதிக்கான ஓலம்” போராட்டம் இன்று (14) யாழ்ப்பாணம் செம்மணி பகுதியில் ஆரம்பமானது. யாழ். மாவட்ட வலிந்து காணாமல் ஆக்கப்பட்ட உறவுகளின் சங்கத் தலைவி சிவபாதம் இளங்கோதை பொதுச்சுடரை ஏற்றி போராட்டத்தை ஆரம்பித்து வைத்தார். இதனைத் தொடர்ந்து உயிரிழந்தவர்களை நினைவுகூர்ந்து மலர் மாலை அணிவித்தல் மற்றும் மலர் வணக்கம் செலுத்தும் நிகழ்வுகளும் இடம்பெற்றன. செம்மணி உள்ளிட்ட தமிழர் தாயகப் பகுதிகளில் இடம்பெற்றதாகக் கூறப்படும் படுகொலைகள் மற்றும் மனித உரிமை மீறல்களை நினைவுகூரும் வகையில் காட்சிப்படுத்தல்களும் இடம்பெற்றன. உள்நாட்டு பொறிமுறைகளுக்கு அப்பால் சுயாதீனமான சர்வதேச விசாரணை நடத்தப்பட வேண்டும் என்பதே போராட்டத்தின் பிரதான கோரிக்கையாக முன்வைக்கப்பட்டுள்ளது. இந்நிலையில், போராட்டத்தின் அடுத்த கட்டமாக எதிர்வரும் 17ஆம் திகதி யாழ்ப்பாணம் பொது நூலகத்திலிருந்து ஐக்கிய நாடுகள் சபையின் அலுவலகம் வரை பேரணி முன்னெடுக்கப்பட்டு மகஜர் கையளிக்கப்படவுள்ளதாக ஏற்பாட்டாளர்கள் தெரிவித்துள்ளனர். தமிழ் அரசியல் கட்சிகள், சிவில் சமூக அமைப்புகள், மதத் தலைவர்கள், தொழிற்சங்கங்கள், மாணவர் அமைப்புகள் மற்றும் பொதுமக்கள் என அனைத்து தரப்பினரும் ஒன்றிணைந்து நீதிக்கான இந்தப் பயணத்தில் பங்கேற்குமாறும் ஏற்பாட்டாளர்கள் அழைப்பு விடுத்துள்ளனர்.

சர்வதேச விசாரணையை வலியுறுத்தி ஒன்றிணையும் தமிழர் தரப்பு

சர்வதேச விசாரணையை வலியுறுத்தி ஒன்றிணையும் தமிழர் தரப்பு

You may also like