தூண்டிவிடும் குழுக்களைப் பயன்படுத்தி நாட்டை மீண்டும் அராஜக நிலைக்கு இட்டுச் செல்ல அரசாங்கம் முயல்வதாகவும், அதன் மூலம் நழுவிப்போகும் அதிகாரத்தைத் தக்கவைக்க நினைப்பது நியாயமற்றது என்றும் முன்னாள் இராஜாங்க அமைச்சர் இந்திக அனுருத்த தெரிவித்துள்ளார்.&nbsp; பத்தரமுல்ல நெலும் மாவத்தையிலுள்ள ஸ்ரீலங்கா பொதுஜன பெரமுன கட்சித் தலைமையகத்தில் இன்று (20) நடைபெற்ற ஊடகவியலாளர் சந்திப்பில் கலந்துகொண்டு கருத்துத் தெரிவிக்கும்போதே அவர் இதனைப் குறிப்பிட்டார். இன்று நாடு நாளுக்கு நாள் மோசமடைந்து வருவதை நாட்டு மக்களும், குறிப்பாக அரசாங்கத்தை நடத்துபவர்களும் உணர்ந்துள்ளதாகத் தெரிவித்த அவர், எவ்விதக் கட்டுப்பாடும் இன்றி டொலரின் மதிப்பு மிக வேகமாக உயர்ந்து வருவதே இதற்கு முக்கிய காரணம் என்றார்.&nbsp; எரிபொருள் உட்பட நாட்டிற்கு இறக்குமதி செய்யப்படும் அனைத்து அத்தியாவசியப் பொருட்களின் விலைகளும் பெருமளவில் உயர்ந்துள்ளதோடு, டொலரின் இந்த உயர்வினால் கடந்த சில நாட்களாக கட்டுமானத் துறைக்குத் தேவையான மூலப்பொருட்களின் விலைகள் எவ்விதக் கட்டுப்பாடும் இன்றி சுமார் 20% வரை அதிகரித்துள்ளன என்றும், இதனால் சாதாரண பொதுமக்களே கடுமையாகப் பாதிக்கப்பட்டுள்ளனர் என்றும் அவர் சுட்டிக்காட்டினார்.&nbsp; இந்த அரசாங்கத்திடம் முறையான எந்தவொரு திட்டமும் இல்லை என்பது இதன் மூலம் தெளிவாகின்றது எனக் குறிப்பிட்ட அவர், சற்று நேரத்திற்கு முன்னர்தான் பால்மாவின் விலை ஒரு கிலோவிற்கு 125 ரூபாவினாலும், 450 கிராம் 50 ரூபாவினாலும் உயர்த்தப்பட்டதாகவும், இதன் பாதிப்பு சாதாரண நுகர்வோருக்கே தவிர படித்த பேராசிரியர்களுக்கு இது புரியாது என்றும் சாடினார். அரசாங்கத்தின் எந்தவொரு வேலைத்திட்டமும் இன்று கண்ணுக்குத் தெரிவதில்லை எனக் குற்றஞ்சாட்டிய முன்னாள் இராஜாங்க அமைச்சர், இன்று டொலரின் மதிப்பு 340 ரூபாயைத் தாண்டியுள்ளதால் வீடு கட்ட நினைத்தவர்கள் அந்த எண்ணத்தைக் கைவிட வேண்டிய நிலை ஏற்பட்டுள்ளதோடு, நாட்டின் தொழில்துறைகளும் வீழ்ச்சியடைந்துள்ளன என்றார்.&nbsp; சமீபத்தில் வாகனங்களுக்கு கூடுதல் வரி விதிக்கப்படுவதற்கு முன்பே, தேவையான நபர்கள் தங்களுக்குத் தேவையான பொருட்களை உரிய இடங்களுக்குக் கொண்டு வந்து சேர்த்துள்ளதாகத் தெரியவருகிறது எனக் குறிப்பிட்ட அவர், இது குறித்து எங்கு விசாரணைகள் நடக்கின்றன எனக் கேள்வி எழுப்பினார்.&nbsp; புகார் அளித்தால் அதற்கொரு குழுவை நியமிப்பார்கள் என்றாலும், அவ்வாறு நியமிக்கப்பட்ட எந்தவொரு குழுவும் மக்களுக்கு முறையான பதிலை வழங்கவில்லை என்றும், 323 கொள்கலன்கள் மோசடியாகக் கடத்தப்பட்ட போதிலும் அதுகுறித்த குழுவின் அறிக்கை இன்னும் பாராளுமன்றத்தில் சமர்ப்பிக்கப்படவில்லை என்றும் அவர் தெரிவித்தார்.&nbsp; இந்த அரசாங்கத்திற்குள் பாரிய அளவிலான திருட்டுகளும் கடத்தல்களும் இடம்பெற்று வருவதாகவும், புலனாய்வுக் குழுக்களுக்குள் தங்களுக்கு நெருக்கமானவர்களையே நியமித்து விசாரணைகளை நடத்தினால் மக்களுக்கு எவ்வாறு நீதி கிடைக்கும் என்றும் அவர் கேள்வி எழுப்பினார். இந்த அரசாங்கத்தில் உள்ளவர்கள் ஆட்சிக்கு வருவதற்கு முன்னர் பாரிய போராட்டங்களை நடத்தியதோடு, இப்போது அந்தப் போராட்டக் குழுக்களுடனேயே முன்னோக்கிச் செல்ல முயல்கிறார்கள் என்று தெரிவித்த அவர், முன்னர் நாம் இராணுவத்தினரை நினைவுகூர்ந்தபோது வடக்கில் உள்ள தீவிரவாத மற்றும் இனவாத உணர்வுகளைத் தூண்டும் வகையில் ஆங்காங்கே நினைவேந்தல்கள் நடத்தப்பட்ட போதிலும், இப்போது அது கொழும்பு வரைந்துள்ளதாகக் குறிப்பிட்டார்.&nbsp; கடந்த சில நாட்களுக்கு முன்னர் வெள்ளவத்தையில் கண்டது உண்மையான தமிழ் மக்களை அல்ல என்றும், உண்மையான தமிழ் மக்கள் இன்று யுத்தம் முடிவுக்கு வந்ததன் பலனை அனுபவித்து வருவதாகவும் தெரிவித்த அவர், இதைப் பொறுத்துக்கொள்ள முடியாத சில தொண்டு நிறுவனங்களும், புலி டயஸ்போராவும் இதன் பின்னணியில் உள்ளதாகவும், அவர்களின் கைக்கூலிகளே அங்கு நின்றார்கள் என்றும் கூறினார்.&nbsp; எனவே, ஜனாதிபதிக்கும் அரசாங்கத்திற்கும் இப்போது எஞ்சியிருப்பது மீண்டும் போராட்டக் குழுக்களை நாட்டின் பல்வேறு இடங்களில் நிலைநிறுத்துவதுதானா என்ற சந்தேகம் எமக்கு எழுகிறது என்றும், நாட்டை மீண்டும் அராஜக நிலைக்குக் கொண்டு செல்ல இவர்கள் முயற்சிக்கலாம் என்றும் எச்சரித்த அவர், இவ்வாறான தூண்டுதல் குழுக்களைப் பயன்படுத்தி நழுவிப்போகும் அதிகாரத்தைத் தக்கவைக்க அரசாங்கம் முயலுமானால் அது ஒருபோதும் நியாயமாகாது என்றார். வெவ்வேறு நபர்களை வெவ்வேறு இடங்களில் அமர்த்துவதன் மூலம் இதற்குத் தீர்வு காண முடியும் என்று நினைக்க முடியாது எனக் குறிப்பிட்ட அவர், ஒரு தரப்பு செய்வதை மறுதரப்பு அறியாத குழுக்களே இன்று நாட்டை வழிநடத்துகின்றன என்றார்.&nbsp; முன்னாள் ஜனாதிபதி ரணில் விக்ரமசிங்கவுடன் இணைந்து செயற்பட ஸ்ரீலங்கா பொதுஜன பெரமுனவின் குழுவொன்று இருந்ததாக நினைவு கூர்ந்த அவர், அந்தக் குழு 360 ரூபாயாக இருந்த டொலரை 290 ரூபாயிற்குக் கொண்டுவர பெரும் பாடுபட்டதாகவும், அதன்போது மக்களுக்குச் சில அசௌகரியங்கள் ஏற்பட்டன என்பதை ஒப்புக்கொள்வதாகவும் தெரிவித்தார்.&nbsp; எனினும், டொலரை 290 ரூபாயிற்குக் கொண்டு வந்து மக்களுக்கு எம்மால் நிவாரணம் வழங்க முடிந்ததாகவும், அவ்வாறு கட்டியெழுப்பப்பட்ட நாட்டைத்தான் பொய்களைக் கூறி இவர்கள் பொறுப்பேற்று இப்போது டொலரை மீண்டும் 340 ரூபாயிற்குக் கொண்டு வந்துள்ளனர் என்றும் அவர் சாடினார்.&nbsp; அத்தியாவசியமானதா இல்லையா என்று பார்க்காமல் கட்டுப்பாடின்றி பொருட்கள் குவிக்கப்பட்டுள்ளதாகத் தெரிவித்த அவர், உள்நாட்டு உற்பத்திப் பொருளாதாரம் பற்றிப் பேசிய அரசாங்கம், இன்று ஒரு ஊசியைக் கூட உற்பத்தி செய்ய முடியாத நிலையில்தான் உள்ளது என்றும், நாட்டில் உற்பத்தி செய்யக்கூடிய உப்பு, அரிசி போன்றவற்றைக்கூட வெளிநாட்டிலிருந்து இறக்குமதி செய்யும் நிலை ஏற்பட்டுள்ளது என்றும் தெரிவித்தார். நாட்டை மீண்டும் தீக்கிரையாக்கும் நிலைக்குக் கொண்டு செல்ல வேண்டாம் என்று தாம் கேட்டுக்கொள்வதாகத் தெரிவித்த இந்திக அனுருத்த, உடனடியாக ஒரு ஜனநாயகத் தேர்தலுக்கு நாட்டை இட்டுச் செல்லுமாறும், தயவுசெய்து ஜனநாயகத்திற்கு இடமளிக்குமாறும், இதனை ஒடுக்குமுறையினாலும் அச்சுறுத்தலினாலும் கொண்டு செல்ல முயற்சிக்க வேண்டாம் என்றும் கேட்டுக்கொண்டார்.&nbsp; இன்று அமைக்கப்பட்டுள்ள அனைத்து ஜனாதிபதி ஆணைக்குழுக்கள், விசாரணைக் குழுக்கள், இலஞ்ச ஒழிப்பு ஆணைக்குழு என அனைத்திலும் தங்களுக்கு நெருக்கமான முகங்களே காணப்படுவதால் அனைத்துப் பிரச்சினைகளையும் மூடிமறைக்கும் நிலைமையே உள்ளதே தவிர, எதற்கும் முறையான தீர்வு கிடைப்பதாகத் தெரியவில்லை என்றார்.&nbsp; அரசாங்கம் இன்று திசையறியாது தடம்மாறிச் செல்வதாகவும், எனவே உடனடியாக ஒரு தேர்தலை நடத்தி, மக்கள் தேர்ந்தெடுக்கும் ஒரு குழுவிடம் நாட்டை ஒப்படைப்பதற்கான வேலைத்திட்டத்தை உருவாக்குவதே சிறந்தது என்றும் அவர் தனது ஊடக சந்திப்பில் வலியுறுத்தினார். (ஞான பிரசாந்தன்)

அரசாங்கம் நாட்டை அராஜக நிலைக்கு இட்டுச் செல்கின்றது - இந்திக அனுருத்த குற்றச்சாட்டு

அரசாங்கம் நாட்டை அராஜக நிலைக்கு இட்டுச் செல்கின்றது - இந்திக அனுருத்த குற்றச்சாட்டு

You may also like