நேபாள-திபெத் எல்லைப் பகுதியில் ஏற்பட்ட பனிப்பாறை மற்றும் பாறைச் சரிவு காரணமாக மத்திய நேபாளத்தில் திடீர் வெள்ளப்பெருக்கு ஏற்பட்டது. இதன்போது பாய்ந்து வந்த சேறும் சகதியும் நிறைந்த பெருவெள்ளம், வழியிலிருந்த கிராமங்களையும் நகரங்களையும் அடியோடு அழித்துள்ளது. கடந்த ஒகஸ்ட் 26 அன்று ஏற்பட்ட இந்த இயற்கை பேரிடரில் சிக்கி உயிரிழந்தோரின் எண்ணிக்கை 675 ஆக அதிகரித்துள்ளது. மீட்புக் குழுவினர் தொடர் தேடுதலில் ஈடுபட்டு வரும் வேளையில், 2,400-க்கும் மேற்பட்டோரின் நிலை குறித்து இதுவரை எந்தத் தகவலும் இல்லாததால் பலி எண்ணிக்கை மேலும் உயரும் என அஞ்சப்படுகிறது. இந்த வெள்ளப் பெருக்கால் நாட்டின் முக்கிய வீதிகள், பாலங்கள் மற்றும் நீர்மின் நிலையங்கள் மிகக் கடுமையாகச் சேதமடைந்துள்ளன. மோசமான காலநிலை மற்றும் அவ்வப்போது பெய்யும் மழையையும் பொருட்படுத்தாமல், தேசிய பேரிடர் அபாயக் குறைப்பு மற்றும் முகாமைத்துவ ஆணைக்குழுவின் (NDRRMA) தலைமையில் மீட்புப் பணிகள் தீவிரமாக நடந்து வருகின்றன. 5,000 இராணுவத்தினர் உட்பட 11,000-க்கும் மேற்பட்ட பாதுகாப்புப் படையினர் இதில் களமிறக்கப்பட்டுள்ளனர். பேரிடரில் சிக்கிய 163 வெளிநாட்டினர் உட்பட சுமார் 2,500 பேர் இதுவரை பாதுகாப்பான இடங்களுக்கு மீட்கப்பட்டுள்ளனர்.114 இந்தியர்கள், 27 சீனர்கள், 20 தென் கொரியர்கள் உட்பட மொத்தம் 187 சுற்றுலாப் பயணிகள் மீட்கப்பட்டோ அல்லது அதிகாரிகளின் தொடர்பிலோ உள்ளனர். 420 வெளிநாட்டினரின் நிலை குறித்து இதுவரை எந்தத் தகவலும் கிடைக்கப்பெறவில்லை. பாதிக்கப்பட்ட பகுதிகளைச் சென்றடைவதற்கும், காணாமல் போனவர்களை விரைவில் கண்டறிவதற்கும் தேவையான அனைத்து நடவடிக்கைகளையும் நேபாள அரசு முடுக்கிவிட்டுள்ளது.

நேபாள வெள்ளப்பெருக்கு: பலி எண்ணிக்கை அதிகரிப்பு

நேபாள வெள்ளப்பெருக்கு: பலி எண்ணிக்கை அதிகரிப்பு

You may also like