கொழும்பு நகரிலுள்ள உணவகங்கள் மற்றும் உணவு விற்பனை நிலையங்களில் உணவின் தரம், சுகாதாரம் மற்றும் உணவுப் பாதுகாப்புத் தரநிலைகள் தொடர்பான பிரச்சினைகள் குறித்து பொதுமக்கள் இலகுவாக முறைப்பாடுகளைச் சமர்ப்பிக்கும் வகையில், கொழும்பு மாநகர சபையின் (CMC) QR குறியீட்டு அடிப்படையிலான உணவுப் பாதுகாப்பு முறைப்பாட்டு முறையை விரிவுபடுத்தும் திட்டம் இன்று (05) உத்தியோகபூர்வமாக ஆரம்பித்து வைக்கப்பட்டது. கொழும்பு மாநகர முதல்வர் வ்ராய் கலி பல்தசார் தலைமையில், கொழும்பு மாநகர சபையின் பொதுச் சுகாதாரத் திணைக்களத்தினால் முன்னெடுக்கப்பட்ட இந்நிகழ்ச்சித்திட்டம், வெள்ளவத்தையில் ஆரம்பிக்கப்பட்டு பம்பலப்பிட்டி வரை முன்னெடுக்கப்பட்டது.&nbsp; உணவுப் பாதுகாப்புக் கண்காணிப்பில் பொதுமக்களின் பங்களிப்பை அதிகரிப்பதே இத்திட்டத்தின் பிரதான நோக்கமாகும். இந்த QR குறியீட்டு அடிப்படையிலான முறைப்பாட்டு முறை, முதன்முதலில் 2025 ஆம் ஆண்டு கிருலப்பனைப் பகுதியில் ஒரு முன்னோடித் திட்டமாக அறிமுகப்படுத்தப்பட்டது.&nbsp; அக்காலப்பகுதியில் பொதுமக்களிடமிருந்து தொடர்ச்சியாக முறைப்பாடுகள் கிடைக்கப்பெற்றதுடன், அவற்றை ஆய்வு செய்து தேவையான நடவடிக்கைகளை மேற்கொள்வதற்கு சுகாதார வைத்திய அதிகாரிகள் (MOH) மற்றும் பொதுச் சுகாதார பரிசோதகர்களுக்கு (PHI) வாய்ப்பு ஏற்பட்டது.&nbsp; இம்முன்னோடித் திட்டத்தின் மூலம் பெறப்பட்ட அனுபவங்களையும் பொதுமக்களின் வரவேற்பையும் கருத்திற்கொண்டு, இம்முறையை கொழும்பு நகரம் முழுவதும் படிப்படியாக விரிவுபடுத்தத் தீர்மானிக்கப்பட்டுள்ளது. உணவகங்கள் மற்றும் உணவு விற்பனை நிலையங்களில் ஏற்படும் மோசமான அனுபவங்களைப் பலர் சமூக ஊடகங்களில் பகிர்ந்துகொண்டாலும், அவற்றை உரிய அதிகாரிகளிடம் உத்தியோகபூர்வ முறைப்பாடுகளாகச் சமர்ப்பிக்காத நிலை பொதுவான சவாலாகக் காணப்படுகிறது.&nbsp; இந்தப் புதிய டிஜிட்டல் முறைமையின் ஊடாக, இவ்வாறான பிரச்சினைகளை நேரடியாகச் சம்பந்தப்பட்ட பொதுச் சுகாதார அதிகாரிகளிடம் கொண்டு செல்ல வாய்ப்பு ஏற்படுத்தப்பட்டுள்ளது. இம்முறையின் கீழ், உணவகங்கள் மற்றும் உணவு விற்பனை நிலையங்களில் காட்சிப்படுத்தப்பட்டுள்ள QR குறியீட்டைத் தமது கையடக்கத் தொலைபேசியின் மூலம் ஸ்கேன் செய்வதன் ஊடாக Google Form படிவத்தை அணுக முடியும். அதன் மூலம் உணவின் தரம், சுகாதாரமற்ற சூழல், முறையற்ற உணவு கையாளுதல் மற்றும் ஏனைய உணவுப் பாதுகாப்புப் பிரச்சினைகள் தொடர்பான முறைப்பாடுகளைச் சமர்ப்பிக்கலாம். சமர்ப்பிக்கப்படும் முறைப்பாடுகள் சம்பந்தப்பட்ட சுகாதார வைத்திய அதிகாரிகள் மற்றும் பொதுச் சுகாதார பரிசோதகர்களுக்கு அனுப்பி வைக்கப்பட்டு, அவை பரிசீலிக்கப்பட்டு தேவையான மேலதிக நடவடிக்கைகள் மேற்கொள்ளப்படும். இம்முறைமையின் மற்றுமொரு முக்கிய அம்சம் முறைப்பாட்டாளர்களின் தனியுரிமையைப் பாதுகாப்பதாகும். தொடர்பு விபரங்களை வழங்குவது கட்டாயமற்றது என்பதால், தமது அடையாளத்தை வெளிப்படுத்தாமல் முறைப்பாடுகளைச் சமர்ப்பிக்கவும் முடியும். வழங்கப்படும் தனிப்பட்ட தகவல்களின் இரகசியத்தன்மை பாதுகாக்கப்படும். மேலும், கொள்வனவு செய்த உணவுப் பொருட்கள் தொடர்பாக முறைப்பாடு செய்யும் நபர்கள், குறித்த உணவுப் பொருளையும் அதற்கான பற்றுச்சீட்டு அல்லது கட்டண இரசீதையும் பாதுகாப்பாக வைத்திருக்குமாறு கொழும்பு மாநகர சபை அறிவுறுத்துகிறது.&nbsp;விசாரணைகளின்போது இவை தேவைப்படக்கூடும் என்பதால், குறித்த உணவுப் பொருளை மீண்டும் உணவகத்திடம் ஒப்படைக்க வேண்டாம் எனவும் பொதுமக்களிடம் கேட்டுக்கொள்ளப்படுகிறது. இந்நிகழ்ச்சித்திட்டம் தொடர்பில் கருத்துத் தெரிவித்த கொழும்பு மாநகர முதல்வர் வ்ராய் கலி பல்தசார், “உணவுப் பாதுகாப்பு என்பது நம் அனைவரையும் பாதிக்கும் ஒரு விடயமாகும். நாம் ஓர் உணவகத்திற்குச் சென்றாலும், உணவு விற்பனை நிலையமொன்றிலிருந்து உணவை வாங்கினாலும், நாம் உட்கொள்ளும் உணவு பாதுகாப்பானது என்ற நம்பிக்கை நமக்கு இருக்க வேண்டும்.&nbsp; இந்த முறைமையின் மூலம், பொதுமக்கள் தமது பிரச்சினைகளை இலகுவாக முன்வைப்பதற்கான வாய்ப்பை ஏற்படுத்துவதுடன், அந்த முறைப்பாடுகள் குறித்து ஆராய்வதற்குப் பொறுப்பான அதிகாரிகளிடம் அவற்றைக் கொண்டு சேர்ப்பதையும் நோக்கமாகக் கொண்டுள்ளோம். கொழும்பை ஆரோக்கியமானதும் பாதுகாப்பானதுமான நகரமாகப் பேணுவது நம் அனைவரினதும் கூட்டுப் பொறுப்பாகும்.”எனத் தெரிவித்தார். இந்நிகழ்வில் கொழும்பு மாநகர சபை உறுப்பினர்கள், பிரதம சுகாதார வைத்திய அதிகாரி, பிரதி பிரதம சுகாதார வைத்திய அதிகாரி, பிரதம பொதுச் சுகாதார பரிசோதகர், நிர்வாக மாவட்ட இலக்கம் 05 இன் சுகாதார வைத்திய அதிகாரி, பொதுச் சுகாதார பரிசோதகர்கள் மற்றும் ஏனைய மாநகர சபை அதிகாரிகள் கலந்துகொண்டனர். இந்த QR குறியீட்டு அடிப்படையிலான முறைப்பாட்டு முறையை எதிர்காலத்தில் கொழும்பு 01 முதல் கொழும்பு 15 வரையிலான அனைத்துப் பகுதிகளிலும் உள்ள உணவகங்கள் மற்றும் உணவு விற்பனை நிலையங்களுக்கு படிப்படியாக அறிமுகப்படுத்த கொழும்பு மாநகர சபை திட்டமிட்டுள்ளது. மேலும், உணவுப் பாதுகாப்பு தொடர்பான முறைப்பாடுகளை கொழும்பு மாநகர சபையின் பொதுச் சுகாதாரத் திணைக்களத்தின் 011 267 6161 என்ற தொலைபேசி இலக்கத்தின் ஊடாகவோ அல்லது cmchealthcomplaints@gmail.com என்ற மின்னஞ்சல் முகவரிக்கோ சமர்ப்பிக்க முடியும்.

கொழும்பில் உணவு பாதுகாப்பு முறைப்பாட்டு முறை அறிமுகம்!

கொழும்பில் உணவு பாதுகாப்பு முறைப்பாட்டு முறை அறிமுகம்!

You may also like