கொழும்பு துறைமுகத்தில் உள்ள கொள்கலன் ஒன்றிலிருந்து கண்டுபிடிக்கப்பட்ட 472 கிலோகிராம் ஐஸ் போதைப்பொருள் தொகுதி, டுபாயிலிருந்து பாகிஸ்தானுக்கு தப்பிச் சென்றுள்ள போதைப்பொருள் கடத்தல்காரரான ‘பரேவி சுதா’ என்பவரால் இலங்கைக்கு அனுப்பப்பட்டிருக்கலாம் என பொலிஸார் சந்தேகம் வெளியிட்டுள்ளனர். அத்துடன், ‘அங்கொட பிரியந்த’ மற்றும் ‘ரூபன்’ ஆகியோரும் இந்த போதைப்பொருள் கடத்தலுடன் தொடர்புபட்டிருக்கலாம் என பொலிஸார் சந்தேகிப்பதுடன், அது தொடர்பான விசாரணைகள் முன்னெடுக்கப்பட்டு வருகின்றன. போதைப்பொருள் அடங்கிய கொள்கலன் மொரோக்கோவுக்கு மீள் ஏற்றுமதி செய்வதற்குத் தயாராக இருந்ததாக தகவல்கள் வெளியாகியுள்ள போதிலும், இந்த போதைப்பொருளை இலங்கைக்குள் கொண்டு வருவதற்கே திட்டமிடப்பட்டிருந்ததாக பொலிஸார் சந்தேகிக்கின்றனர். ஐஸ் போதைப்பொருள் அடங்கியதாக சந்தேகிக்கப்படும் கொள்கலன் ஒன்று கொழும்பு துறைமுகத்தின் கொள்கலன் முனையத்தில் இருப்பதாக வெளிநாட்டில் வசிக்கும் தனியார் தகவல் வழங்குநர் ஒருவரிடமிருந்து சிரேஷ்ட பிரதிப் பொலிஸ் மா அதிபருக்கு தகவல் கிடைத்துள்ளது. அதன்படி, நடவடிக்கை மேற்கொண்ட பொலிஸ் அதிகாரிகள் சந்தேகத்திற்கிடமான கொள்கலனை சோதனையிடுவதற்காக கடந்த 28ஆம் திகதி நீதிமன்ற உத்தரவையும் பெற்றிருந்தனர். அதற்கமைய, நேற்று (31) குறித்த கொள்கலன் சோதனையிடப்பட்டது. இதன்போது, கொள்கலனுக்குள் துணிகளுக்கு இடையில் மறைத்து வைக்கப்பட்டிருந்த சுமார் 472 கிலோகிராம் எடையுள்ள ஐஸ் போதைப்பொருள் தொகுதி கண்டுபிடிக்கப்பட்டுள்ளது. மேற்கொள்ளப்பட்ட மேலதிக விசாரணைகளில், குறித்த போதைப்பொருள் தொகுதி இலங்கையைச் சேர்ந்த வர்த்தகர் ஒருவரின் பெயரில் அனுப்பப்பட்டிருந்தமை தெரியவந்துள்ளது. இதனையடுத்து, தெமட்டகொடையைச் சேர்ந்த 44 வயதான ஆறுமுகன் சசிதரன் என்ற வர்த்தகர் கைது செய்யப்பட்டுள்ளார். அவரிடம் மேற்கொள்ளப்பட்ட விசாரணைகளின்போது, இந்த சம்பவத்துடன் தொடர்புடையதாகக் கருதப்படும் இரு பாகிஸ்தான் பிரஜைகள் தொடர்பான தகவல்கள் வெளியாகியுள்ளன.&nbsp; இதையடுத்து, ஜம்பட்டா வீதியிலுள்ள அடுக்குமாடி குடியிருப்பு ஒன்றில் தங்கியிருந்த அவர்களை மத்திய குற்றப் புலனாய்வுப் பிரிவின் அதிகாரிகள் கைது செய்துள்ளனர். தெமட்டகொடை வர்த்தகரின் நிறுவனத்தின் ஊடாக குறித்த போதைப்பொருள் தொகுதியை இலங்கைக்கு கொண்டு வர நடவடிக்கை மேற்கொண்டதாக கைது செய்யப்பட்ட இரு பாகிஸ்தான் பிரஜைகளும் தெரிவித்துள்ளதாக பொலிஸார் கூறுகின்றனர்.

கொள்கலனில் சிக்கிய போதைப்பொருள் - கடத்தலின் பின்னணி குறித்து அதிர்ச்சி தகவல்கள்

கொள்கலனில் சிக்கிய போதைப்பொருள் - கடத்தலின் பின்னணி குறித்து அதிர்ச்சி தகவல்கள்

You may also like