“அரசாங்கத்தால் ஏற்கனவே விலைமனு கோரப்பட்டிருந்த நிலக்கரி தொகை சரியென்றால் கடந்த ஏப்ரல் 20 ஆம் திகதி நாட்டை வந்தடைந்திருக்க வேண்டும். குறித்த திகதியிலிருந்து தற்போது இரு மாதங்கள் ஆகின்றன. ஆனால், இதுவரையில் விலைமனுகோரப்பட்ட அந்த மொத்த நிலக்கரி தொகையும் நாட்டை வந்தடையவில்லை. மேலும், 2026 – 2027 விலைமனு கோரல் தொடர்பிலும் தற்போது வரையில் தெளிவான விளக்கமொன்றை வலுசக்தி அமைச்சு அறிவிக்கவில்லை என்று ஐக்கிய குடியரசு முன்னணியின் தலைவர் பாட்டலி சம்பிக்க ரணவக்க குற்றச்சாட்டு முன்வைத்துள்ளார். நிலக்கரி கொள்முதல் தொடர்பான விசேட ஜனாதிபதி ஆணைக்குழுவின் செயலகத்துக்கு ஆவணங்கள் ஒப்படைப்பதற்காக நேற்று (16) வருகை தந்திருந்தபோதே அவர் இதனைக் குறிப்பிட்டார். இதுதொடர்பில் அவர் மேலும் கூறுகையில், 2025 மற்றும் 2026ஆம் ஆண்டு காலப்பகுதிக்குள் இடம்பெற்ற நிலக்கரி கொள்முதல் செயற்பாடுகள் தொடர்பில் தேவையான மேலதிக தெளிவான தகவல்களை செயலகத்துக்கு ஒப்படைத்துள்ளோம். இதுவொரு சாதாரணப் பிரச்சினை அல்ல. 2025 மற்றும் 2026ஆம் ஆண்டு காலப்பகுதிக்குள் இறக்குமதி செய்யப்பட்ட நிலக்கரிகளைக்கொண்ட 30 கப்பல்கள் தொடர்பான விடயங்கள் இதில் உள்ளடக்கப்பட்டுள்ளன. வேண்டுமென்று நிலக்கரி விலைமனுவை தாமதப்படுத்தியதால் ஏற்கனவே நிலக்கரி இறக்குமதிசெய்த பொடென்ஸியா என்ற நிறுவனத்துக்கு, தமது தனிப்பட்ட விருப்பத்துக்காக 05 நிலக்கரி கப்பல்களை இறக்குமதிசெய்ய அனுமதியளித்திருந்தார்கள். மேலும் 25 நிலக்கரி கப்பல்களை இறக்குமதி செய்யும் பொறுப்பை ட்ரைடென்ட் செம்பார் (Trident Chemphar Limited) என்ற நிறுவனத்துக்கு வழங்கினார்கள். இருந்தபோதும் அவர்களுக்கு உரிய நேரத்தில் நிலக்கரியை நாட்டுக்குக் கொண்டுவர முடியாமல் போனது. அது மாத்திரமல்லாமல் தரம் குறைந்த நிலக்கரியை இறக்குமதி செய்ததால் ஏப்ரல் மாதம் 20ஆம் திகதியாகும்போது பாரதூரமான பிரச்சினைகள் உருவாகியிருந்தன. 20ஆம் திகதிக்கு முன்னரே 25 கப்பல்கள் நாட்டை வந்தடைய இருந்தன. மேலும், 19 கப்பல்களை அவசர கொள்முதலின் அடிப்படையில் இறக்குமதி செய்தனர். இந்த இறக்குமதி ட்ரோன் ஜோர்ட் நிறுவனத்துக்கு வழங்கியிருந்தார்கள். இவ்விரு நிறுவனங்களுக்கும் கொள்முதல் பொறுப்பை வழங்கியது சட்டத்துக்கு முரணானது என்று சட்டமா அதிபர் அறிவித்திருக்கிறார். எவ்வாறாயினும் தொடர்ச்சியான மின் விநியோகத்தை வழங்குதல் என்ற போர்வையில் இந்த சட்டவிரோதச் செயற்பாடு தொடர்ந்து முன்னெடுக்கப்பட்டு வருவது மாத்திரமல்லாமல் இதனால் பாரதூரமான பிரச்சினைகள் உருவாகியுள்ளன. சரியென்றால் இந்த நிலக்கரி தொகை ஏப்ரல் 20ஆம் திகதி நாட்டை வந்தடைந்திருக்க வேண்டும். தற்போது இரு மாதங்களை நெருங்குகின்றன. ஆனால் இதுவரையில் அந்த மொத்த நிலக்கரி தொகையும் நாட்டை வந்தடையவில்லை. 2026 – 2027 விலைமனு கோரல் தொடர்பிலும் தற்போது வரையில் தெளிவான விளக்கமொன்றை வலுசக்தி அமைச்சு அறிவிக்கவில்லை. இந்த விடயத்தில் பல்வேறு பிரச்சினைகள் இருக்கின்றன. ஒன்று தரம் குறைந்த நிலக்கரியால் சுற்றுச்சூழல் பாதிப்பு. இயந்திர பிரச்சினைகளுக்கு மேலதிகமாக மின்சக்தி பிரச்சினையை எடுத்துக்கொண்டால் தரம் குறைந்த நிலக்கரியால் மின் உற்பத்திக்கு வழமையை விட அதிக செலவு ஏற்படும். அதிக நிலக்கரி விநியோகத்திலும் வரையறை ஏற்படும். அதன்போது கட்டாயம் மின்சக்தி வீழ்ச்சி ஏற்படும். அதனை ஈடுசெய்ய டீசல் உள்ளிட்ட எரிபொருள் தேவைப்படும். அதற்காக மேலதிக செலவு செய்ய ஏற்படும். உதாரணமாக நிலக்கரியால் உற்பத்தி செய்யப்படும் ஓர் அலகு மின்னை 16 ரூபாவுக்குப் பெற்றுக்கொள்ள முடியுமென்றால், டீசலால் மின் உற்பத்தி இடம்பெறும்போது ஓர் அலகு மின்னை 100 ரூபாவுக்கு அதிக விலைகொடுத்து கொள்வனவுசெய்ய நேரிடும். எனவே, அதற்காக அதிக செலவு செய்யவேண்டி ஏற்படும். மற்றைய காரணம், டீசல் விலை நிர்ணயத்தின்போது சரியான விலையொன்று நிர்ணயிக்கப்படவில்லை. 720 ரூபாவாக டீசல் விலை அதிகரிக்கலாமென ஜனாதிபதி கூறியிருந்தார். தற்போது 404 ரூபாவுக்கு டீசல் விற்பனையாகிறது. இந்த மேலதிக தொகையை யார் செலுத்துவது என்பதில் தெளிவில்லை. மேலதிகமாக 1000 டீசல் தொன் அதாவது, 1.5 மில்லியன் லீற்றர் டீசலால் மின்ற உற்பத்தி செய்யப்படுகிறது என்றால் அதற்காக மேலதிகமாக அதிக டொலரை செலவழிக்க வேண்டி ஏற்படும். 2023, 2024 மற்றும் 2025ஆம் ஆண்டுகளில் எமது டொலர் கணக்கை நேர்மறையாக முன்னெடுத்துச் சென்றோம். வாகனம் இறக்குமதி இடம்பெற்றாலும் நேர்மறையாக அந்த விடயங்கள் இடம்பெற்றன. தற்போது இடம்பெற்றுள்ள நிலக்கரி மோசடியால் டொலர் கணக்கு வீழ்ச்சியைச் சந்தித்துள்ளது. இதற்கு பிரதான காரணம், நிலக்கரி மோசடியால் மேலதிக டீசல் உள்ளிட்ட எரிபொருளின் தேவைப்பர்டு உருவாகியுள்ளது. அதன் பிரதிபலனாக பஸ், மீன்பிடிப் படகுகள், லொறிகளுக்கு கிடைக்கவேண்டிய எரிபொருள் கிடைக்காது. எரிபொருள் விநியோகத்தில் கோட்டா முறையும் நடைமுறையில் இருக்கிறது. அதனால் பொருளாதாரத்துக்கும் பாரிய நட்டம் ஏற்பட்டுள்ளது. இதுதொடர்பான கணக்கு வழக்குகள் பாராளுமன்றத்துக்கும் ஏனைய நிறுவனங் களுக்கும் கிடைத்துள்ள அறிக்கைகளைப் பெற்றுக்கொடுத்துள்ளோம். 60 நாட்கள் அமைதி செயற்பாடுகளுக்கான அமெரிக்க ஈரானுக்கிடையில் புரிந்துணர்வு உடன்படிக்கை மேற்கொள்ளப்பட்டுள்ளது. இந்நிலையில், எரிபொருள் விலையும் வீழ்ச்சியைக் கண்டுள்ளது. இன்றைய (நேற்றைய) நிலைவரப்படி ஒரு பீப்பாய் மசகு எண்ணெயின் விலை 70 டொலராக குறைந்துள்ளது. யுத்தத்துக்கும் முன்னரும் இந்த தொகையிலேயே இருந்தது. இதேபோன்று டீசல் மற்றும் பெற்றோல் பீப்பாய்களின் விலையும் குறைவடைந்துள்ளது. சரியென்றால் தற்போது எரிபொருள் விலையும் குறைய வேண்டும். உதாரணத்துக்கு தற்போது ஒரு லீற்றர் டீசல் 236 ரூபாவுக்கும் ஒரு லீற்றர் பெற்றோல் 225 ரூபாவுக்கும் இலங்கைக்கு இறக்குமதி செய்ய முடியும். மேலதிக கணக்கு வழக்குகள் கொழும்பு துறைமுகத்துக்கு அப்பாலுள்ள வரி மற்றும் ஏனைய இலாப நோக்கங்களின் அடிப்படையிலானதாகும். யுத்தம் ஆரம்பித்தபோது 35 நாட்களுக்கு தேவையான எரிபொருள் இருப்பிலுள்ளதாகத் தெரிவித்து ஒருவாரத்தில் எரிபொருள் விலையை அதிகரித்திருந்தார்கள். தற்போது யுத்தம் நிறைவடைந்து விலை குறைந்து வருகிறது. இது நீதியான அரசாங்கமென்றால் தற்போது எரிபொருள் விலை குறைய வேண்டும் என்றார்.

இருமாதங்களாகியும் நிலக்கரி தொகை இன்னும் நாட்டை வந்தடையவில்லை - சம்பிக்க ரணவக்க

இருமாதங்களாகியும் நிலக்கரி தொகை இன்னும் நாட்டை வந்தடையவில்லை - சம்பிக்க ரணவக்க

You may also like