அநேகமான நோய்கள் ஏற்படுவதற்குக் காரணம் நோயைப் பரப்புகின்ற நுண்ணுயிர்கள்தான்.&nbsp;இந்த நுண்ணுயிர்கள் பக்டீரியா, வைரஸ், புரட்டோஷோவா, ஒட்டுண்ணிகள் என்று கண்ணுக்குத் தெரியாத நுண்ணுயிர் வகைகளைச் சேர்ந்தவை. இப்படியாக ஏற்படுகின்ற நோய்கள் மனிதர்களிடையே பரவக்கூடியவை. இதனால் இந்நோய்கள் தொற்றுநோய்கள் என்று கூறப்படுகின்றன. சில தொற்றுநோய்கள் நோயாளியின் எச்சில், சிறுநீர், மலம் என்பவற்றிலிருந்து நோயற்றவர்களுக்கு பரவுகின்றன. சுகாதாரப் பழக்கவழக்கங்களான கை கழுவுதல், முகக்கவசம் அணிதல் போன்றவை இவற்றின் பரம்பலைத் தடுக்கின்றன. நோயைத் தரும் சில ஒட்டுண்ணிகள் (PROTOZOA)போன்றவை இரத்தத்தில் கலந்திருக்கும்போது நுளம்பு, தெள்ளு போன்ற காவிகளால் (VECTORS) உறிஞ்சப்பட்டு மனிதர்களைக் கடிக்கும்போது பரவுகின்றன. இன்னும் சில தவறான பழக்கவழக்கங்களால் பாதுகாப்பற்ற பாலியல் தொடர்பு மூலம் மனிதரிடையே பரவுகின்றன. மேகநோய் என்கின்ற சிபிலிஸ், கொனோரியா, எச்.ஐ.வி. போன்றவை இந்தப் பரவல் முறை தொற்றுநோய்களில் உதாரணமானவை. இப்படிப் பரவுகின்ற தொற்றுநோய்களைக் குணப்படுத்த மருந்துகள் கண்டுபிடிக்கப்பட்டுள்ளன. சிலவேளைகளில் இப்படி கண்டறிந்த மருந்துகள் காலம் செல்லச்செல்ல தமது செயற்றிறனை இழந்ததும் புதிய மருந்துகள் கண்டுபிடிக்கப்பட்டுக்கொண்டேயிருக்கின்றன. மொத்தத்தில் தொற்றுநோய்கள் மருந்துகளால் குணப்படுத்தக்கூடியவை என்பது ஆறுதல் தரும் விஷயம். ஆனால், இன்று மனிதகுலத்துக்கு மிகப்பெரும் ஆபத்தைத் தருவனவாக இருக்கும் சில நோய்கள் தொற்றாத நோய்கள் என்று வகைப்படுத்தப்பட்டுள்ளன. தொற்றுநோய்களை COMMUNICABLE DISEASES என்றும் தொற்றாநோய்களை NON- COMMUNICABLE DISEASES என்றும் ஆங்கிலத்தில் கூறுவார்கள்.இந்தத் தொற்றாநோய்கள் நோய் நுண்ணுயிர்களின் பரவலால் தோன்றுவதில்லை. இவை பரவுவதற்கு எதுவித காவிகளும் உதவுவதில்லை. இந்தத் தொற்றாத நோய்களைக் குணப்படுத்த எதுவித நுண்ணுயிர்க்கொல்லிகளும் (ANTIBIOTICS) கண்டுபிடிக்கப்படவில்லை. அப்படியென்றால் இந்தத் தொற்றாத நோய்கள் எப்படி ஏற்படுகின்றன?மனிதன் தனது தவறான வாழ்க்கை முறை, தவறான உணவு முறை, தப்பான பழக்கவழக்கங்கள், மன உளைச்சல் போன்றவற்றால் இந்த நோய்களுக்கு ஆளாகிறான். இன்று இந்தத் தொற்றா நோய்கள் என்று கருதப்படும் நோய்கள் சில - நீரிழிவு, இருதய நோய்கள், பக்கவாதம், கல்லீரல் நோய்கள், சில புற்றுநோய்கள், நீண்டகால நுரையீரல் நோய்கள் என்பவை முக்கியமானவை.இந்த நோய்களால் பாதிக்கப்பட்டவர்களை தொற்றுநோய்கள் இலகுவில் பற்றிக்கொள்கின்றன. அப்படி ஏற்பட்ட தொற்றுநோய்களும் மருந்துகளுக்குக் குணமாவதில்லை. நீண்டகாலத்துக்கு தொற்றுநோய்களால் பாதிக்கப்படுகின்றனர். இந்தத் தொற்றாநோய்களின் குணப்படுத்தலுக்கு இவற்றுக்கு ஏற்படும் பக்கவிளைவுகளைச் சீர்செய்யவும் பெரும் செலவினங்கள் ஏற்படுகின்றன. இந்தத் தொற்றா நோய்களால் பாதிக்கப்பட்டவர்கள் தொடர்ந்து உயிர்வாழ பயன்படும் மருத்துவச் செயல்முறைகள், அவர்களது பொருளாரத்தையும் நாட்டின் பொருளாதாரத்தையும் பாதிக்கின்றன. தொற்றாத நோய்கள் எவரைப் பாதிக்கும் என்பதற்கு வரைமுறை இல்லை. வயது வித்தியாசம் இல்லாமல், ஆண், பெண் என்ற வித்தியாசம் பாராமல், செல்வந்தர், ஏழை என்ற பேதம் பாராட்டாமல், மக்கள் தொகையை தினந்தோறும் உலகளாவிய ரீதியில் குறைத்துக்கொண்டிருக்கின்றன. தொற்றா நோய்களை முற்றாகக் குணப்படுத்த முடியாது. வாழும் காலம் வரை மருந்துகளை உபயோகிப்பதும், மீறிப்போனால் பழுதாகிப்போன உறுப்புகளை செயற்கை முறையில் இயக்கி தற்காலிக ஆறுதல் பெறவும்தான் முடியுமேயொழிய, முற்றாகக் குணப்படுத்த முடியாது என்பதை நாம் மனதிற்கொள்ள வேண்டும். உதாரணமாக, தொற்றா நோய் என்று சொல்லப்படுகின்ற நீரிழிவு நோயை எடுத்துக்கொண்டால், நீரிழிவு நோயால் இயங்காமல் போன சிறுநீரகங்களே DIALYSIS முறை மூலம் செயற்கையாக சிறுநீரகத்தின் தொழிலைச் செய்துகொள்ளலாம். ஆனால், உயிர் வாழும் வரை மாதம் ஒரு முறையாவது இந்தச் சிறுநீரக செயற்கைத் தொழில் முறை மூலம் கழிவுப்பொருட்களை வெளியேற்றுவது அவசியம். இதனால் ஏற்படும் மருத்துவச் செலவும் அடிக்கடி DIALYSIS செய்வதால் ஏற்படக்கூடிய தொற்றுநோய் அபாயங்களும் நோயாளியையும் அவரது குடும்பத்தையும் வேண்டாம் இந்த வாழ்க்கை என்று எண்ணவைத்துவிடும். இன்று இலங்கையில் தொற்றாத நோய்களால் பாதிக்கப்பட்டுள்ள நோயாளிகளின் தொகை அதிகரித்து வருகின்றது. இந்தத் தொற்றாத நோய்களிலிருந்து நாங்கள் விடுபடுவதற்கு நாம் எமது வாழ்க்கை முறையை - பழக்கவழக்கங்களை இளம்வயதிலிருந்தே மாற்ற வேண்டும். எவ்வாறு மாற்றலாம் என்பதை தொடர்ந்து அடுத்த முறை பார்ப்போம். டாக்டர்எஸ்.அருள் இராமலிங்கம்

தொற்று நோய்களும் தொற்றாத நோய்களும்

தொற்று நோய்களும் தொற்றாத நோய்களும்

You may also like