அரசாங்கத்தின் திட்டங்களுக்கு, மகா சங்கத்தினரிடமிருந்து கிடைக்கும் ஆன்மீக வழிகாட்டலும், சமூக விழுமியங்களைப் பலப்படுத்துவதற்காக வழங்கப்படும் ஒத்துழைப்பும் மிகப் பெரிய பலமாகும் என பிரதமர் கலாநிதி ஹரிணி அமரசூரிய தெரிவித்தார். &nbsp;நிகழ்வொன்றில் கலந்துகொண்டு உரையாற்றும் போதே பிரதமர் இதனைத் தெரிவித்தார். இந்த நிகழ்வில் மேலும் உரையாற்றிய பிரதமர்,''வனவாசி பிக்குகள் இயற்கையுடன் ஒன்றிக் கலந்து, சகிப்புத்தன்மையுடன் வாழும் வாழ்க்கை முறையும், ஆரண்யவாசி பிக்குமார்களின் வாழ்க்கைப் பாரம்பரியம் மூலம் வெளிப்படும் எளிமை, கட்டுப்பாடு, ஒழுக்கம் மற்றும் எதிர்காலம் பற்றிய பொறுப்புக்கூறல் ஆகியனவும், ஒரு நாட்டை நவீனமயமாக்கும் இந்தப் பயணத்தில் மிக முக்கியமான முன்மாதிரிகளாகும். இன்று நாம் ஒரு நாடாக முன்னோக்கிச் செல்வது புதியவற்றை உருவாக்குவதன் மூலம் மட்டுமல்ல, மாறாக, நம்மிடம் இருப்பதைப் புதுப்பித்து, மக்களுக்கு இருப்பதைவிடச் சிறந்த வாழ்க்கையை உருவாக்கிக் கொடுப்பதற்குத் தேவையான சூழலை உருவாக்கிக்கொண்டே முன்னோக்கிச் செல்கிறோம். நாம் இப்போது போக்குவரத்துத் துறையை நவீனமயமாக்கி மெட்ரோ சேவைகளை அறிமுகப்படுத்துவது முதல், சுகாதாரம், கல்வி உட்பட அனைத்துத் துறைகளையும் நவீனமயமாக்கியவாறே இந்த மாற்றத்தை நாம் அனுபவித்து வருகின்றோம். நாம் ஒரு நாடு என்ற வகையில் கட்டியெழுப்ப எதிர்பார்ப்பது, இருப்பதைவிட வளமான ஒரு நாட்டை மாத்திரமல்ல, மேலும் சிறந்த, உணர்வுப்பூர்வமான, பொறுப்புணர்வுமிக்க சமூகத்தைக் கொண்ட அழகான வாழ்க்கையுமேயாகும். அதற்குப் புதிய தொழில்நுட்பம், புதிய உட்கட்டமைப்பு வசதிகள் மற்றும் புதிய பொருளாதார வாய்ப்புகள் தேவைப்படுவதைப் போலவே, அவற்றைச் சரியாகப் பயன்படுத்துவதற்குத் தேவையான மானுடப் பண்புகளும் நம்மிடையே வளர வேண்டும். அதேபோன்று, இந்தப் பயணத்தில் ஒரு அரசாங்கம் என்ற வகையில் நாம் எடுக்கும் முயற்சிகளுக்கு மகா சங்கத்தினராகிய உங்களிடமிருந்து கிடைக்கும் ஆன்மீக வழிகாட்டலும், சமூகத்தினுள் உயரிய விழுமியங்களை நிலைநாட்டுவதற்காக வழங்கப்படும் ஒத்துழைப்பும் எமக்கு மிகச் சிறந்த பக்கபலமாகும் என்பதையும் நினைவுகூர விரும்புகின்றேன். ஒரு நாட்டைப் புதுப்பிக்கும் பணியானது அரசாங்கமொன்றினால் மாத்திரம் தனித்துச் செய்யக்கூடிய காரியமல்ல. உருவாக்கப்படும் புதிய வசதிகள், புதிய முறைமைகள் மற்றும் புதிய வாய்ப்புகளைப் பாதுகாத்து, பொறுப்புடன் பயன்படுத்தி, அவற்றை மேலும் அபிவிருத்தி செய்து எதிர்கால சந்ததியினரிடம் ஒப்படைக்க வேண்டியது நம் அனைவரினதும் பொறுப்பாகும் என பிரதமர் கலாநிதி ஹரிணி அமரசூரிய மேலும் தெரிவித்தார். இந்நிகழ்வில் மகா விகார வம்சத்தைச் சேர்ந்த ஷியாமோபாலி மகா நிகாயத்தின் மல்வத்து மகா விகாரப் பிரிவின் அநுநாயக்கரும், கம்பஹா விக்ரமாராச்சி சுதேச மருத்துவப் பல்கலைக்கழகத்தின் வேந்தருமான நியங்கொட விஜிதசிறி தேரர், மற்றும் மகா விகார வம்சத்தைச் சேர்ந்த ஷியாமோபாலி மகா நிகாயத்தின் அஸ்கிரி மகா விகாரப் பிரிவின் அநுநாயக்கரும் களனி பல்கலைக்கழகத்தின் வேந்தருமான சாஸ்திரபதி நாரம்பனாவே ஆனந்த நாயக்க தேரர் உள்ளிட்ட மகா சங்கத்தினர், புத்தசாசன, சமய மற்றும் கலாசார விவகாரங்கள் பிரதி அமைச்சர் கமகேதர திசாநாயக்க, எதிர்க்கட்சித் தலைவர் சஜித் பிரேமதாச, காலி மாவட்டப் பாராளுமன்ற உறுப்பினர் நிஷாந்த பெரேரா உள்ளிட்ட விருந்தினர்களும், பெருந்திரளான பக்தர்களும் கலந்துகொண்டனர்.

மகா சங்கத்தினரின் ஒத்துழைப்பு அரசாங்கத்திற்குப் பெரிய பலம் - பிரதமர்

மகா சங்கத்தினரின் ஒத்துழைப்பு அரசாங்கத்திற்குப் பெரிய பலம் - பிரதமர்

You may also like