ஐக்கிய மக்கள் சக்தி (SJB) என்பது ஊழல் மற்றும் மோசடி குற்றச்சாட்டுகள் இல்லாத, தூய்மையான அரசியலில் ஈடுபடும் நபர்களைக் கொண்ட ஒரு கட்சி என்றும், ஏனைய அரசியல் முகாம்களுக்கு எதிராக முன்வைக்கப்பட்ட குற்றச்சாட்டுகள் இன்றும் செல்லுபடியாகும் என்றும் பாராளுமன்ற உறுப்பினர் எஸ்.எம். மரிக்கார் தெரிவித்தார்.&nbsp; எதுல்கோட்டேயிலுள்ள ஐக்கிய மக்கள் சக்தி கட்சியின் தலைமையகத்தில் இன்றைய தினம் (13) நடைபெற்ற ஊடகவியலாளர் சந்திப்பில் கலந்துகொண்டு உரையாற்றிய அவர், கடந்த அரசாங்கங்களில் இடம்பெற்றதாகக் கூறப்படும் ஊழல் மோசடிகளை நிரூபிக்கும் பலம் தற்போதைய அரசாங்கத்திடம் இல்லை எனச் சுட்டிக்காட்டினார்.&nbsp; குறிப்பாக, நிலக்கரி மோசடி தொடர்பாக விசாரணை நடத்த ஜனாதிபதியால் 6 மாத கால அவகாசத்துடன் ஒரு கமிஷன் நியமிக்கப்பட்டுள்ள நிலையில், அதன் தீர்ப்பு 3 மாதங்களில் வழங்கப்படும் என ஜே.வி.பி.யின் செயலாளர் ரில்வின் சில்வா கூறுவது அந்த கமிஷனின் நம்பகத்தன்மையை சீர்குலைப்பதாக அவர் குறிப்பிட்டார். மக்கள் வாக்குகளால் தெரிவு செய்யப்படாத ஒரு கட்சிச் செயலாளருக்கு இவ்வாறான அறிக்கைகளை வெளியிட எந்த உரிமையும் இல்லை என்றும், நீதிமன்றம் மற்றும் சுயாதீன நிறுவனங்களின் பணிகளில் தலையிடாமல் அவை சுதந்திரமாக இயங்க அனுமதிக்க வேண்டும் என்றும் அவர் வலியுறுத்தினார். பாராளுமன்ற உறுப்பினர் ஹர்ஷ டி சில்வா தொடர்பாக எழுந்துள்ள செய்திகள் குறித்து கருத்து தெரிவித்த மரிக்கார், ஹர்ஷ டி சில்வா மத்திய-வலதுசாரி முகாமைப் பிரதிநிதித்துவப்படுத்தும் கட்சியின் பொருளாதாரக் குழுவின் தலைவர் என்றும், அவர் அரசாங்கத்திற்கு ஆதரவளிக்கப் போவதில்லை எனத் தெளிவுபடுத்தியுள்ளதாகவும் கூறினார்.&nbsp; நாட்டின் பொருளாதாரத்தைக் கட்டியெழுப்பும் வேலைத்திட்டத்திற்கு ஹர்ஷ டி சில்வா ஒத்துழைக்கத் தயாராக இருப்பதைப் போலவே, நகர அபிவிருத்தி அல்லது மின்சக்தித் துறையை பலப்படுத்தத் தானும் தயாராக இருப்பதாகவும் அவர் தெரிவித்தார். தற்போது மின்சாரம், நீர், எரிபொருள் மற்றும் மருந்துகளின் விலைகள் அதிகரித்துள்ளதால் நாட்டின் அனைத்துத் துறைகளும் வீழ்ச்சியடைந்துள்ளதாகச் சுட்டிக்காட்டிய மரிக்கார், அரசாங்கம் திறந்த பொருளாதாரத்திற்குப் பதிலாக 'தீவு மனப்பாங்குடன்' மூடிய பொருளாதார முறையை பின்பற்றுவதால் வெளிநாட்டு முதலீடுகள் வருவதில்லை என குற்றம் சாட்டினார். அதிகாரத்தைப் பெறுவதற்காக தேர்தல் மேடைகளில் வழங்கப்பட்ட போலி வாக்குறுதிகளால் இன்று அரசாங்கம் திண்டாடி வருவதாகவும், எவ்வித 'பரிசோதனைகளும்' செய்யப்படாத, அனுபவம் வாய்ந்த ஒரே குழு ஐக்கிய மக்கள் சக்தியிடம் மட்டுமே இருப்பதாகவும் அவர் மேலும் தெரிவித்தார்.&nbsp; நாட்டின் உத்தியோகபூர்வ எதிர்க்கட்சித் தலைவர் சஜித் பிரேமதாச மாத்திரமே என்பதை நினைவூட்டிய அவர், தமது கட்சி ஐக்கிய தேசியக் கட்சியுடன் மாத்திரமே இணைந்து செயற்படத் தீர்மானித்துள்ளதாகவும், ஏனைய பொது எதிர்க்கட்சிகளுடன் இணையவில்லை என்றும் கூறினார். கடந்த இரண்டு தேர்தல்களில் தோல்வியடைந்த போதிலும், மக்கள் தமது கட்சியின் உறுப்பினர்களை 'திருடர்கள்' என்று அழைக்கவில்லை என்பது பெருமைக்குரியது எனக் குறிப்பிட்ட அவர், யதார்த்தத்தைப் புரிந்துகொண்டு நாட்டின் எதிர்காலத்தை அனுபவம் வாய்ந்த தமது குழுவிடம் ஒப்படைக்குமாறு மக்களிடம் கேட்டுக்கொண்டார். ஞான பிரசாந்தன்

அரசாங்கத்தின் போலி வாக்குறுதிகளால் நாடு வீழ்ச்சியடைந்துள்ளது - எஸ்.எம். மரிக்கார்

அரசாங்கத்தின் போலி வாக்குறுதிகளால் நாடு வீழ்ச்சியடைந்துள்ளது - எஸ்.எம். மரிக்கார்

You may also like