மின் உற்பத்திச் செலவு குறைந்துள்ளதுடன், மாற்று வலுசக்தி மூலம் மின் உற்பத்தியும் அதிகரித்துள்ள நிலையில், மின்கட்டண உயர்வும் அடிக்கடி ஏற்படும் மின்தடையும் தொடர்வது ஏன் என ஜனநாயக தமிழ் தேசியக் கூட்டணியின் பேச்சாளர் சுரேஷ் க. பிரேமச்சந்திரன் கேள்வி எழுப்பியுள்ளார். அரசாங்கத்தின் முறையான திட்டமிடல் மற்றும் இலங்கை மின்சார சபையின் சரியான பராமரிப்பு, முகாமைத்துவம் ஆகியவற்றின் குறைபாடுகளே இந்நிலைக்குக் காரணமா என்றும் அவர் வினவியுள்ளார். இது தொடர்பாக அவர் வெளியிட்டுள்ள ஊடக அறிக்கையில், கடந்த அரசாங்கத்தின் காலத்தில் மின்சார சபை மாபியாக்களின் கட்டுப்பாட்டில் இருப்பதாகக் குற்றஞ்சாட்டிய தேசிய மக்கள் சக்தி அரசாங்கம், ஆட்சிக்கு வந்தால் மின்கட்டணத்தை மூன்றில் ஒரு பங்காகக் குறைத்து தடையற்ற மின்சாரத்தை வழங்குவதாக வாக்குறுதியளித்திருந்தது எனக் குறிப்பிட்டுள்ளார். எனினும், தற்போதும் மின்கட்டணங்கள் அதிகரிப்பதுடன், நாளாந்தம் மின்தடைகளும் ஏற்படுவதாகச் சுட்டிக்காட்டிய அவர், மின்சாரத் துறையில் செல்வாக்குச் செலுத்தும் மாபியாக்களைக் கட்டுப்படுத்த அரசாங்கத்தால் முடியவில்லையா என்ற கேள்வியையும் எழுப்பியுள்ளார். தேசிய மக்கள் சக்தி அரசாங்கம் ஆட்சிக்கு வந்த பின்னர், மின்சாரத் துறையை மாபியாக்களின் பிடியிலிருந்து விடுவிப்பதாகக் கூறி அதனை நான்கு பிரிவுகளாகப் பிரித்தது. ஆனால், இந்த மறுசீரமைப்பின் பின்னர் மின் உற்பத்தி மற்றும் விநியோகத்தில் ஏற்பட்டுள்ள முன்னேற்றங்கள் குறித்து அரசாங்கம் பொதுமக்களுக்கு தெளிவுபடுத்த வேண்டும் என்றும் அவர் வலியுறுத்தியுள்ளார். சர்வதேச நாணய நிதியத்தின் நிபந்தனைகளுக்கு அமைவாக மின்கட்டணங்கள் வேகமாக அதிகரிக்கப்பட்டுள்ள நிலையில், அதற்கேற்ற வகையில் மின் உற்பத்தியும் விநியோகமும் சீராக நடைபெறுகின்றனவா என்ற கேள்வி எழுவதாகவும் அவர் தெரிவித்துள்ளார். குறிப்பாக, வடக்கு மாகாணத்தின் அனைத்து மாவட்டங்களிலும் நாள்தோறும் பல தடவைகள் மின்சாரம் தடைப்படுவதாகவும், சில சந்தர்ப்பங்களில் சில நிமிடங்களும், பல வேளைகளில் மணித்தியாலக் கணக்கிலும் மின்தடை நீடிப்பதாகவும் அவர் குறிப்பிட்டுள்ளார். சில நேரங்களில் மின்சார இணைப்புகள் மற்றும் விநியோகக் கட்டமைப்புகளில் ஏற்பட்டுள்ள கோளாறுகளைச் சீரமைப்பதற்காக மின்சாரம் துண்டிக்கப்படுவதாக அறிவிக்கப்படும் போதிலும், பல சந்தர்ப்பங்களில் முன்னறிவிப்பின்றியே மின்தடை ஏற்படுவதாகவும் தெரிவித்துள்ளார். மேலும், நாடு முழுவதும் மூன்று நாட்களுக்கு ஒருமுறை ஒரு மணிநேர மின்தடை ஏற்படும் என அரசாங்கம் அறிவித்துள்ள நிலையில், சூரியசக்தி மின் உற்பத்தி அதிகரிப்பால் மின்கட்டமைப்பு பாதிக்கப்படுவதாகவும், மறுபுறம் அனல் மின் உற்பத்தி நிலையங்களின் இயந்திரங்கள் பழுதடைந்ததால் மின்தடை தவிர்க்க முடியாததாக இருப்பதாகவும் தெரிவிக்கப்படுவது ஒன்றுக்கொன்று முரண்பாடான விளக்கங்களாக உள்ளன என அவர் சுட்டிக்காட்டியுள்ளார். சூரியசக்தி மூலம் உற்பத்தி செய்யப்படும் மின்சாரத்தைத் தேசிய மின் கட்டமைப்புடன் முறையாக இணைப்பதற்குத் தேவையான தொழில்நுட்பம் அல்லது உபகரணங்கள் அரசாங்கத்திடம் இல்லையா என்றும், மழைக்காலத்தில் நீர்மின் உற்பத்தி அதிகரிக்கக்கூடிய சூழலில் மின்தடை ஏற்படுவதற்கான காரணம் என்ன என்றும் அவர் கேள்வி எழுப்பியுள்ளார். தொழில்நுட்பம் வளர்ச்சியடைந்துள்ள இன்றைய காலகட்டத்தில், இலங்கையில் அடிக்கடி ஏற்படும் மின்தடைகள் பொருளாதாரம், தொழில்கள் மற்றும் மக்களின் வாழ்வாதாரம் உள்ளிட்ட பல்வேறு துறைகளையும் பாதிப்பதாக அவர் தெரிவித்துள்ளார். எனவே, இந்தப் பிரச்சினைகளைக் கவனத்தில் கொண்டு மின்கட்டணங்களைச் சீரமைப்பதுடன், தடையற்ற மின்சார விநியோகத்தை உறுதிப்படுத்த அரசாங்கம் உரிய நடவடிக்கைகளை மேற்கொள்ள வேண்டும் என்பதே மக்களின் எதிர்பார்ப்பு என சுரேஷ் க. பிரேமச்சந்திரன் மேலும் தெரிவித்துள்ளார்.

மின்கட்டண உயர்வும் மின்தடையும் ஏன்? – சுரேஷ் கேள்வி

மின்கட்டண உயர்வும் மின்தடையும் ஏன்? – சுரேஷ் கேள்வி

You may also like