2026 ஆம் ஆண்டுக்கான க.பொ.த உயர்தரப் பரீட்சையை ஆகஸ்ட் மாதத்தில் நடத்துவதற்கு அரசாங்கம் எடுத்துள்ள தீர்மானம் குறித்து தனது கவலையை 'சர்வஜன பலய' அமைப்பின் தலைவரும் நாடாளுமன்ற உறுப்பினருமான திலித் ஜயவீர, வெளியிட்டுள்ளார். இந்த நடவடிக்கை மாணவர்களின் தயாரிப்பு நேரத்தை கணிசமாகக் குறைக்கும் என்று அவர் குறிப்பிட்டுள்ளார். இது தொடர்பில் எக்ஸ் தளத்தில் அவர் வெளியிட்ட பதிவில், உயர்தரப் பரீட்சைக்குத் தோற்றும் மாணவர்களுக்குப் பாடத்திட்டத்தை நிறைவு செய்து பரீட்சைக்குத் தயாராவதற்கு வழமையாக சுமார் 26 மாதங்கள் கால அவகாசம் வழங்கப்படுவதாகத் தெரிவித்துள்ளார். இருப்பினும், அரசாங்கத்தின் இந்தத் தீர்மானத்தினால் மாணவர்களுக்குக் கிடைக்க வேண்டிய சுமார் ஆறு மாத கால தயாரிப்பு நேரம் பறிபோகும் என்று அவர் குற்றம் சாட்டியுள்ளார். தற்போதைய மாணவர் தொகுதி 'டிட்வா' சூறாவளியினால் ஏற்பட்ட பாதிப்புகளால் ஏற்கனவே கல்வியில் பெரும் இடையூறுகளை எதிர்கொண்டுள்ளதாகவும், அது அவர்களின் கற்றல் செயற்பாடுகளைப் பாதித்துள்ளதாகவும் அவர் சுட்டிக்காட்டியுள்ளார். இந்த ஆண்டு பரீட்சைக்குத் தோற்றும் மாணவர்கள் விடயத்தில் பிரதமர் கலாநிதி ஹரிணி அமரசூரிய மற்றும் அரசாங்கம் காட்டும் தாமதம் மற்றும் பொறுப்பற்ற தன்மையை ஜயவீர விமர்சித்துள்ளார். அரசாங்கம் தனது முடிவை மீள்பரிசீலனை செய்ய வேண்டும் என்று கோரிய அவர், இந்தப்பரீட்சை அட்டவணையைத் திரும்பப் பெற்று மாணவர்களின் நலனைக் கருத்தில் கொள்ளுமாறு அதிகாரிகளை வலியுறுத்தியுள்ளார். உயர்தரப் பரீட்சை என்பது மாணவர்களின் கல்வி மற்றும் தொழில் வாழ்க்கையில் ஒரு முக்கியமான கட்டமாகும் என்பதையும் அவர் வலியுறுத்திக் கூறியுள்ளார்.

2026 ஆம் ஆண்டு உயர்தரப் பரீட்சை அட்டவணை குறித்து திலித் ஜயவீர கருத்து

2026 ஆம் ஆண்டு உயர்தரப் பரீட்சை அட்டவணை குறித்து திலித் ஜயவீர கருத்து

You may also like