இலங்கைப் பிரதமர் கலாநிதி ஹரிணி அமரசூரிய, ருவாண்டா, ஜமைக்கா மற்றும் உகாண்டா நாடுகளின் தலைவர்கள் மற்றும் பிரதிநிதிகளுடன் தொடர்ச்சியான இருதரப்பு சந்திப்புகளை நடத்தியுள்ளார். அன்டிகுவா மற்றும் பார்புடாவில் நடைபெறும் பொதுநலவாய நாடுகளின் அரச தலைவர்கள் மாநாட்டின் (CHOGM) பக்க நிகழ்வுகளுக்கு இடையில், இந்த சந்திப்பு நடைபெற்றுள்ளது. ருவாண்டா ஜனாதிபதி போல் ககாமேவுடன் இடம்பெற்ற சந்திப்பில், இரு நாடுகளுக்கும் இடையிலான உறவுகளை வலுப்படுத்துவது தொடர்பாகக் கலந்துரையாடப்பட்டுள்ளது. குறிப்பாக பொருளாதார ஒத்துழைப்பு, வர்த்தகம் மற்றும் முதலீடு ஆகிய துறைகளில் இருதரப்பு உறவுகளை மேம்படுத்துவதற்கான வாய்ப்புகள் குறித்து இரு தலைவர்களும் ஆராய்ந்துள்ளனர். இதனைத் தொடர்ந்து, ஜமைக்கா பிரதமர் கலாநிதி அன்ட்ரூ ஹோல்னஸைச் சந்தித்த பிரதமர் ஹரிணி அமரசூரிய, இரு நாடுகளின் மக்களுக்கிடையிலான தொடர்புகளை மேம்படுத்துதல் மற்றும் இருதரப்பு ஒத்துழைப்பை விரிவுபடுத்துதல் குறித்து கலந்துரையாடியுள்ளார். இதன்போது, 2027 ஜனவரி மாதம் இலங்கையில் நடைபெறவுள்ள 'எக்ஸ்போ ஸ்ரீலங்கா' கண்காட்சியிலும், 2028 ஆம் ஆண்டின் முதல் காலாண்டில் இலங்கை நடத்தவுள்ள பொதுநலவாய பெண்கள் விவகார அமைச்சர்கள் மாநாட்டிலும் பங்கேற்குமாறு ஜமைக்காவுக்கு பிரதமர் அழைப்பு விடுத்துள்ளார். உகாண்டாவின் நீதி மற்றும் அரசியலமைப்பு விவகாரங்களுக்கான அமைச்சர் நோர்பர்ட் மாவோவையும் பிரதமர் சந்தித்துக் கலந்துரையாடியுள்ளார். தொழில்நுட்ப மற்றும் தொழிற்கல்வி, வர்த்தகம், முதலீடு மற்றும் விவசாயம் உள்ளிட்ட துறைகளில் இரு நாடுகளுக்கும் இடையிலான ஒத்துழைப்பை விரிவுபடுத்துவது குறித்து இதன்போது கவனம் செலுத்தப்பட்டுள்ளது. மேலும், அறிவுப் பரிமாற்றம், நிபுணத்துவப் பகிர்வு மற்றும் இரு நாடுகளுக்கும் பயனளிக்கும் புதிய திட்டங்களை உருவாக்குவதற்கான வாய்ப்புகள் குறித்தும் இருதரப்பினரும் இணக்கம் தெரிவித்துள்ளனர். இதற்கிடையில், மாலைதீவு துணை ஜனாதிபதி ஹுசைன் மொஹமட் லதீப்பையும் பிரதமர் ஹரிணி அமரசூரிய சந்தித்து வாழ்த்துகளைப் பரிமாறிக்கொண்டுள்ளார். பொதுநலவாய அமைப்பில் அங்கம் வகிக்கும் நாடுகளுடனான உறவுகளை வலுப்படுத்துவதிலும், பொருளாதாரம், கல்வி, விவசாயம் மற்றும் சமூகத் துறைகளில் ஒத்துழைப்பை விரிவுபடுத்துவதிலும் இலங்கை கொண்டுள்ள உறுதிப்பாட்டை இந்தச் சந்திப்புகள் மீண்டும் உறுதிப்படுத்தியுள்ளதாக பிரதமர் ஊடகப் பிரிவு தெரிவித்துள்ளது.

ருவாண்டா, ஜமைக்கா, உகாண்டா தலைவர்களுடன் பிரதமர் சந்திப்பு!

ருவாண்டா, ஜமைக்கா, உகாண்டா தலைவர்களுடன் பிரதமர் சந்திப்பு!

You may also like