மீனவர்களின் வாழ்வியலை சிதைக்கும் வகையில் செயற்படுவதாகக் குற்றம் சுமத்தப்படும் கடற்றொழில் அமைச்சர் இராமலிங்கம் சந்திரசேகரனுக்கு எதிராக நீதிமன்ற வழக்கொன்றை முன்னெடுக்கவுள்ளதாக கடற்றொழில் இணையத்தின் ஊடகப் பேச்சாளர் அன்னலிங்கம் அன்னராசா தெரிவித்துள்ளார். இதற்காக பொதுமக்களிடமிருந்து எதிர்வரும் நாட்களில் உண்டியல் மூலம் ஒரு ரூபாய் நிதி திரட்டும் நடவடிக்கை முன்னெடுக்கப்படவுள்ளதாகவும் அவர் குறிப்பிட்டுள்ளார். கடற்றொழில் அல்லது மீனவர்களின் வாழ்வாதாரம், இந்திய மீனவர் பிரச்சினை தொடர்பில் முன் அனுபவம் இல்லாத சந்திரசேகரனை கடற்றொழில் அமைச்சர் பதவியில் இருந்து மாற்றுமாறு ஜனாதிபதியிடம் கோரிக்கை விடுப்பதாகவும் அன்னராசா தெரிவித்துள்ளார். எமது கடற்பரப்பையும் மீனவர்களின் வாழ்வாதாரத்தையும் பாதுகாக்கும் வகையில், அனுபவமுள்ள ஒருவரை கடற்றொழில் அமைச்சராக நியமிக்க வேண்டும் எனவும் அவர் வலியுறுத்தியுள்ளார். தமது கோரிக்கைகள் நடைமுறைப்படுத்தப்படாவிட்டால், எதிர்வரும் காலங்களில் பாரிய போராட்டங்களை முன்னெடுக்க நேரிடும் எனவும் அவர் எச்சரித்துள்ளார். இதேவேளை, அண்மையில் கைது செய்யப்பட்ட ஒன்பது இந்திய மீனவர்களையும் விடுதலை செய்யுமாறு இந்திய மீனவர் அமைப்புகள் கோருவது தவறானது எனவும் அன்னராசா தெரிவித்துள்ளார். அவர்களுக்கு எதிராக சட்டரீதியான நடவடிக்கைகள் முன்னெடுக்கப்பட்ட பின்னரே விடுதலை வழங்க முடியும் எனவும் அவர் குறிப்பிட்டுள்ளார். கடந்த தினங்களில் நெடுந்தீவு மீனவர்களின் 80 வலைகள் இந்திய மீனவர்களால் சேதப்படுத்தப்பட்டதாகவும், அந்தச் சம்பவம் தொடர்பில் இந்திய மீனவர் அமைப்புகள் எவ்வித கருத்தையும் தெரிவிக்கவில்லை எனவும் அவர் சுட்டிக்காட்டியுள்ளார்.

கடற்றொழில் அமைச்சருக்கு எதிராக நீதிமன்ற வழக்கு - அன்னராசா அறிவிப்பு

கடற்றொழில் அமைச்சருக்கு எதிராக நீதிமன்ற வழக்கு - அன்னராசா அறிவிப்பு

You may also like