அன்டிகுவா மற்றும் பார்புடாவின் செயின்ட் ஜான்ஸில், 2026 நவம்பர் 1 முதல் 4ஆம் திகதி வரை நடைபெறவுள்ள 28ஆவது பொதுநலவாய அரச தலைவர்கள் மாநாட்டில் (CHOGM 2026) பங்கேற்கும் இலங்கைக் குழுவிற்கு பிரதமர் கலாநிதி ஹரிணி அமரசூரிய தலைமை தாங்கவுள்ளார். “செழுமையான பொதுநலவாயத்திற்காக கூட்டாண்மைகளையும் முதலீடுகளையும் துரிதப்படுத்துதல்” (Accelerating Partnerships and Investment for a Prosperous Commonwealth) என்ற தொனிப்பொருளின் கீழ், பொதுநலவாய அமைப்பில் அங்கம் வகிக்கும் 56 நாடுகளின் அரச மற்றும் நாட்டுத் தலைவர்களுடன் பிரதமர் இணைந்து கலந்துகொள்ளவுள்ளார். இந்த உச்சிமாநாட்டின்போது, பிரதமர் கலாநிதி ஹரிணி அமரசூரிய பொதுநலவாய அரச தலைவர்கள் மாநாட்டின் நிறைவு அமர்வுகள் மற்றும் தலைவர்களுக்கான கலந்துரையாடல் அமர்வுகளில் பங்கேற்கவுள்ளார்.பொருளாதார ஒத்துழைப்பு மற்றும் முதலீடு, டிஜிட்டல் மாற்றம், இளைஞர்களுக்கு அதிகாரமளித்தல், காலநிலை மாற்றம் மற்றும் நல்லாட்சி உள்ளிட்ட முக்கிய விடயங்கள் தொடர்பில் இலங்கையின் நிலைப்பாடுகளையும் முன்னுரிமைகளையும் அவர் முன்வைக்கவுள்ளார். உச்சிமாநாட்டின் ஒரு பகுதியாக, இலங்கையின் இராஜதந்திர, வர்த்தக மற்றும் அபிவிருத்தி கூட்டாண்மைகளை மேம்படுத்தும் நோக்கில், பல்வேறு நாடுகளின் தலைவர்கள், அரசாங்கத் தலைவர்கள் மற்றும் அரசியல், வர்த்தகத் தலைவர்களுடன் பிரதமர் இருதரப்பு சந்திப்புகளையும் மேற்கொள்ளத் திட்டமிட்டுள்ளார். மேலும், முதலீடு சார்ந்த அபிவிருத்தி, பெண்களுக்கு அதிகாரமளித்தல் மற்றும் உலகளாவிய சுகாதாரம் ஆகிய துறைகளில் இலங்கையின் முன்னுரிமைகளையும் நோக்குகளையும் எடுத்துரைக்கும் வகையில், பொதுநலவாய மகளிர் மன்றம், பொதுநலவாய தலைவர்கள் மற்றும் பிரதம நிறைவேற்று அதிகாரிகளுக்கான முதலீட்டு உச்சிமாநாடு, உலகளாவிய கண் சுகாதார உச்சிமாநாடு ஆகியவற்றிலும் பிரதமர் உரையாற்றவுள்ளார்.

CHOGM 2026 மாநாட்டில் ஹரிணி அமரசூரிய தலைமை!

CHOGM 2026 மாநாட்டில் ஹரிணி அமரசூரிய தலைமை!

You may also like