ஈரானை பொருளாதார ரீதியாக தனிமைப்படுத்த எதிரிகளால் முடியாது என்று ஈரான் ஜனாதிபதி மசூத் பெசெஷ்கியான் தெரிவித்துள்ளார். அத்துடன், ஈரான் அழுத்தங்களுக்கும் பொருளாதாரத் தடைகளுக்கும் ஒருபோதும் பணியாது என்றும், தனது உள்நாட்டுத் திறன்களைக் கொண்டு பொருளாதாரச் சிக்கல்களை முறியடிக்கும் என்றும் கூறியுள்ளார். துருக்கியில் நடைபெற்ற COP31 காலநிலை உச்சிமாநாட்டின் ஒரு பகுதியாக, ஈராக்கின் குர்திஸ்தான் பிராந்திய அரசாங்கத்தின் (KRG) தலைவர் நெச்சிர்வன் பர்சானியைச் சந்தித்தபோது, ​​பெசெஷ்கியான் இவ்வாறு தெரிவித்தார் என்று ஈரான் ஜனாதிபதி அலுவலகம் தெரிவித்துள்ளது. ஈரான் எதிர்கொண்ட அழுத்தங்கள், பொருளாதாரத் தடைகள் மற்றும் இழப்புகள், அந்நாட்டு மக்களின் மன உறுதியைக் குலைக்கத் தவறிவிட்டன என்று அவர் கூறினார். குர்திஸ்தான் பிராந்திய மக்கள் போன்ற நல்ல நண்பர்களும் அண்டை நாடுகளும் ஈரானுக்கு இருப்பதால், எதிரிகளால் ஈரானைப் பொருளாதார ரீதியாகத் தனிமைப்படுத்த முடியாது என்று அவர் குறிப்பிட்டார். அடிப்படைத் தேவைகளுக்கான பொருட்கள் கொண்டுவரப்படும் பாதைகளை முடக்குவதன் மூலம், ஈரானின் எதிரிகள் மக்களின் வாழ்வாதாரத்தை இலக்கு வைக்க முயற்சிப்பதாக பெசெஷ்கியான் குற்றம் சாட்டினார். உணவு மற்றும் மருந்துகள் கொண்டு செல்லும் பாதைகளைத் தடுக்குமாறு பிராந்தியத்தில் உள்ள பிற நாடுகளுக்குக்கூட அவர்கள் அழுத்தம் கொடுத்ததாக அவர் கூறினார். சில நாடுகளின் தலைவர்களைப் போலன்றி, ஈரானின் தலைவர்களோ அல்லது மக்களோ இத்தகைய அச்சுறுத்தல்களுக்கு ஒருபோதும் அடிபணிய மாட்டார்கள் என்று அவர் தெரிவித்தார். வர்த்தகம் உள்ளிட்ட அனைத்துத் துறைகளிலும் குர்திஸ்தான் பிராந்தியத்துடனான உறவை மேலும் வலுப்படுத்த வேண்டும் என்று பெசெஷ்கியான் வலியுறுத்தினார். இதற்குப் பதிலளித்த பர்சானி, ஈரானுடனான பொருளாதார மற்றும் வர்த்தக உறவுகளை விரிவுபடுத்தத் தங்கள் பிராந்தியம் தயாராக இருப்பதாகத் தெரிவித்தார்.

'எதிரிகளால் ஈரானை பொருளாதார ரீதியாக தனிமைப்படுத்த முடியாது' - ஈரான் ஜனாதிபதி

'எதிரிகளால் ஈரானை பொருளாதார ரீதியாக தனிமைப்படுத்த முடியாது' - ஈரான் ஜனாதிபதி

You may also like