மின்சார சபை மறுசீரமைப்பு தொடர்பில் தொழிற்சங்கங்களால் முன்வைக்கப்பட்டுள்ள பிரதான எட்டு கோரிக்கைகளுக்கு 48 மணி நேரத்துக்குள் பொறுப்பான அமைச்சர் அல்லது அரசாங்கம் சாதகமான தீர்வை வழங்காவிட்டால் பணிப்புறக்கணிப்பு மேற்கொள்ளப்போவதாக மின்சார சபை தொழிற்சங்கங்கள் அறிவித்துள்ளன. “இந்த அரசாங்கத்துக்கும் விடயத்துக்குப் பொறுப்பான அமைச்சருக்கும் இன்னும் 48 மணிநேரம் கால அவகாசம் வழங்குகிறோம். எங்களின் பிரச்சினைகளுக்கு தெளிவான பதிவும் தீர்வும் வழங்காவிட்டால் நிச்சயமாக நாளை 25ஆம் திகதி பகலிலிருந்து தொழிற்சங்க நடவடிக்கையை ஆரம்பிப்போம். இந்தத் தொழிற்சங்க நடவடிக்கைக்கு மின்சார சபையின் 22,000 ஊழியர்களும் பங்குபற்றுவார்கள் என்று மின்சார சபை தொழில்நுட்ப பொறியியலாளர் மற்றும் அதிகாரிகள் சங்கத்தின் உபதலைவர் நந்தன உதயகுமார தெரிவித்தார். இதுதொடர்பில் விளக்கமளித்து கொழும்பில் நேற்று (23) ஏற்பாடு செய்யப்பட்டிருந்த செய்தியாளர் சந்திப்பிலேயே இதனைக் குறிப்பிட்டார். அவர் தொடர்ந்து கருத்துத் தெரிவிக்கையில், ‘‘இலங்கையின் மின்சாரத் துறை நாளுக்கு நாள் பின்னடைவை நோக்கிச் சென்றுக்கொண்டிருக்கிறது. இந்த அரசாங்கம் ஆட்சிக்கு வந்து ஒரு வருடமும் ஏழு மாதங்களும் ஆகின்றன. இந்த அரசாங்கம் ஆட்சிக்கு வர முன்பிருந்தே மின்சார சபையின் மறுசீரமைப்பு நடவடிக்கைகள் ஆரம்பிக்கப்பட்டிருந்தன. அந்த மறுசீரமைப்பு நடவடிக்கைகளிலுள்ள தவறுகளை சரிசெய்து கொள்ளுமாறு அப்போதிருந்த அரசாங்கத்துக்கு தற்போதைய அரசாங்கம் எதிர்த்தரப்பிலிருந்தபோது எங்களுடன் இணைந்த தொழிற்சங்க நடவடிக்கையிலும் போராட்டங்களிலும் ஈடுபட்டிருந்தது. அவர்களே தற்போது ஆட்சியிலும் இருக்கிறார்கள். அப்படியான அரசாங்கம் மறுசீரமைப்பு நடவடிக்கைகளை முறையாக செய்யாமையின் காரணமாக மின்சார சபை நாளுக்கு நாள் பின்னடைவை சந்தித்து வருகின்றது. எமது நாட்டிலிருக்கும் ஒரேயொரு நிலக்கரி மின்னுற்பத்தி நிலையம் நுரைச்சோலை மின்னுற்பத்தி நிலையம். அதற்கான நிலக்கரியை முறையாக விநியோகிக்காவிட்டால் நெருக்கடி நிலை ஏற்படும். இந்த மின் உற்பத்தி நிலையம் அமைந்திருக்கும் இடத்தின் அடிப்படையில் ஒரு வருடத்துக்கே அவசியமான நிலக்கரி தொகையை 180 நாட்களுக்குள் சேமித்துக்கொள்ள வேண்டும். அவ்வாறான விநியோக நடவடிக்கை களின்போது சரியான முறைகளை பின்பற்ற வேண்டுமென்பதுடன் விநியோகஸ்தரை தெரிவு செய்யும்போது வரையறுக்கப்பட்ட காலப்பகுதிக்குள் தரமான நிலக்கரியை அவரால் விநியோகிக்க முடியுமா என்பதையும் ஆராய வேண்டும். அதன் பின்னர் விலைமனுவை ஒப்படைத்திருக்க வேண்டும். இன்றுவரை 10 கப்பல்களில் வந்த நிலக்கரிகள் விநியோகிக்கப்பட்டுள்ளன. நாங்கள் கோரிய தரம் இந்த 10 கப்பல்களில் வந்த நிலக்கரியிலும் இல்லை என்பது தெரிகிறது. பாராளுமன்றத்தில் தெரிவிக்கப்படும் ஒருசில தரவுகள் தவறாகவே இருக்கின்றன. வெளியாகியுள்ள தரவுகளின் அடிப்படையில் நிலக்கரியின் தரத்தினால் ஏற்படும் சுற்றாடல் பாதிப்பு மற்றும் மின் உற்பத்தி நிலையத்துக்கு ஏற்படும் பாதிப்பு நினைத்துபார்ப்பதை விட அதிகரிப்பதற்கான வாய்ப்புகள் இருக்கின்றன. இதற்கு முன்னரும் மறுசீரமைப்பு நடவடிக்கைகளை முறையாக மேற்கொள்ளுமாறு அமைச்சருக்கு உத்தியோகபூர்வமாக மேற்கொண் டிருந்தோம். இரு கலந்துரையாடல்களும் இடம்பெற் றிருந்தன. அந்த கலந்துரையாடல் களின்போது நாங்கள் ஏற்றுக்கொள்ளக்கூடிய பதில் கிடைக்கவில்லை. இணக்கப்பாடின்றியே அந்தப் பேச்சுவார்த்தைகள் நிறைவடைந்திருந்தன. எனவே, தொழிற்சங்கங்கள் என்ற அடிப்படையில் எங்களுக்கு மாற்ற வழி இல்லாத நிலை ஏற்பட்டுள்ளது. மின்சார சபையிலுள்ள ஊழியர்களையும் நிறுவனத்திலுள்ள சொத்துகளையும் மனிதவளத்தையும் பாதுகாத்துக்கொள்ள வேண்டுமென்றால் கட்டாயம் தொழிற்சங்க நடவடிக்கையை முன்னெடுக்க நேரிடும். அரசாங்கத்துக்கு ஜனவரி மாதம் 21ஆம் திகதியிலிருந்து தற்போது வரை அரசாங்கத்துக்கு காலக்கெடு வழங்கியிருந்தோம். இலட்சக்கணக்கான மாணவர்கள் சாதாரணத் தரப் பரீட்சைக்கு தோற்ற தயாராகிக் கொண்டிருக்கிறார்கள். அதன் காரணமாகவே தற்போது வரையில் தொழிற்சங்க நடவடிக்கையை ஆரம்பிக்காமல் இருக்கிறோம். எனவே, இந்த அரசாங்கத்துக்கும் விடயத்துக்கு பொறுப்பான அமைச்சருக்கும் இன்னும் 48 மணிநேரம் கால அவகாசம் வழங்குகிறோம். எங்களின் பிரச்சினைகளுக்கு தெளிவான பதிவும் தீர்வும் வழங்காவிட்டால் நிச்சயமாக நாளை 25 ஆம் திகதி நண்பகலிலிருந்து தொழிற்சங்க நடவடிக்கையை ஆரம்பிப்போம். இந்த தொழிற்சங்க நடவடிக்கைக்கு மின்சார சபையின் 22,000 ஊழியர்களும் பங்குபற்றுவார்கள். ஆரம்பத்தில் அடையாள பணிப்புறக்கணிப்பை மேற்கொள்ளவே எதிர்பார்த்துள்ளோம். அரசாங்கத்திடமிருந்து எங்களின் 08 கோரிக்கைகளுக்கு சாதகமான பதில் கிடைக்குமாக இருந்தால் தொழிற்சங்க நடவடிக்கைக்கு செல்ல வேண்டி ஏற்படாது. அவ்வாறு இல்லாவிட்டால் தொழிற்சங்க நடவடிக்கைக்குச் செல்ல நேரிடும்’’ என்றார்.

அரசாங்கத்துக்கு 48 மணி நேர காலக்கெடு! - மின்சார தொழிற்சங்கங்கள் எச்சரிக்கை

அரசாங்கத்துக்கு 48 மணி நேர காலக்கெடு! - மின்சார தொழிற்சங்கங்கள் எச்சரிக்கை

You may also like