சீனா இலங்கையுடன் செயற்படும்போது, இலங்கையின் இறையாண்மைக்கு மதிப்பளித்து செயற்படுவதுடன், பரஸ்பர வளர்ச்சியை எதிர்பார்த்தே செயற்படுமென்று புதிய சீனத் தூதுவர் வெய் ஹுவாசியாங் தெரிவித்துள்ளார். இலங்கைக்கான புதிய சீனத் தூதுவர் வெய் ஹுவாசியாங் மற்றும் மக்கள் விடுதலை முன்னணியின் பொதுச் செயலாளர் ரில்வின் சில்வா ஆகியோருக்கு இடையிலான சந்திப்பு நேற்று முன்தினம் (31) பெலவத்தையில் அமைந்துள்ள ஜே.வி.பியின் பிரதான அலுவலகத்தில் நேற்று (31) இடம்பெற்றது. இதன்போது, இலங்கைக்கு வந்ததிலிருந்து இலங்கை மக்களிடமிருந்து தனக்குக் கிடைத்த அன்பான வரவேற்பைப் புதிய தூதுவர் பாராட்டியதுடன், இலங்கையில் தனக்கு எவ்வித அந்நிய உணர்வும் ஏற்படவில்லை என்றும் தெரிவித்துள்ளார். தனது பதவிக்காலத்தில் இரு நாடுகளுக்குமிடையிலான உறவுகளை மேலும் வலுப்படுத்தி முன்னெடுத்துச் செல்ல எதிர்பார்ப்பதாகவும் அவர் தெரிவித்துள்ளார். இலங்கைக்கும் சீனாவுக்கும் இடையிலான நீண்டகால நட்புறவு மற்றும் இராஜதந்திர உறவுகள் அடுத்த ஆண்டில் 70 ஆண்டுகளை நிறைவு செய்வதுடன், 1952ஆம் ஆண்டு கையெழுத்திடப்பட்ட வரலாற்றுச் சிறப்புமிக்க சீன –இலங்கை இறப்பர் –அரிசி ஒப்பந்தம் 75 ஆண்டுகளை நிறைவு செய்வது குறித்தும் இங்கு கவனம் செலுத்தப்பட்டது. புதிய அரசாங்கத்தின் கீழ் நடைமுறைப்படுத்தப்படும் ஊழல் எதிர்ப்பு வேலைத்திட்டம் மற்றும் கிராமப்புற வறுமையை ஒழிப்பதை நோக்கமாகக் கொண்ட ‘பிரஜா சக்தி’ வேலைத்திட்டம் தொடர்பிலும் கலந்துரையாடப்பட்டது. வறுமையை ஒழிப்பதில் சீனா பெற்றுள்ள அனுபவங்களை இலங்கைக்கு பயனுள்ள வகையில் பயன்படுத்துவதற்கான சாத்தியக்கூறுகள் குறித்தும் இங்கு கருத்துப் பரிமாற்றம் இடம்பெற்றது. சீனா ஏனைய நாடுகளுடன் செயற்படும்போது, சம்பந்தப்பட்ட நாடுகளின் இறையாண்மைக்கு மதிப்பளிப்பதுடன், பரஸ்பர வளர்ச்சியை எதிர்பார்த்தே செயற்படுவதாக தூதுவர் சுட்டிக்காட்டியுள்ளார். மேலும், எதிர்காலத்தில் இலங்கைக்கு அதிகளவிலான முதலீடுகளை ஈர்ப்பதற்காக சீன முதலீட்டாளர்களை ஊக்குவிப்பதாகவும் அவர் தெரிவித்துள்ளார். சீன கம்யூனிஸ்ட் கட்சி வழங்கும் தலைமைத்துவத்தின் கீழ் நடைமுறைப்படுத்தப்பட்ட அபிவிருத்திப் பாதையின் காரணமாக, தம்மைப் போன்ற கடினமான கிராமப்புறப் பின்னணியைக் கொண்ட ஒருவருக்குக்கூட இராஜதந்திர அதிகாரியாக உயர்வதற்கான வாய்ப்பு கிடைத்ததாக தூதுவர் தனது தனிப்பட்ட அனுபவங்களைப் பகிர்ந்துகொண்டுள்ளனர். இரு நாடுகளுக்குமிடையிலான நட்புறவு மற்றும் இருதரப்பு உறவுகளை மேலும் வலுப்படுத்துவதற்கு இரு தரப்பினரும் இங்கு இணக்கம் தெரிவித்துள்ளனர். இந்தச் சந்தர்ப்பத்தில், சீனத் தூதரகத்தின் அரசியல் பிரிவின் ஆலோசகர் மேய் ஜிங், அரசியல் பிரிவைச் சேர்ந்த சின் லிகொங், தூதரகத்தின் மூன்றாம் செயலாளர் ஜின் என்சே உள்ளிட்ட அதிகாரிகள் குழுவினரும் மக்கள் விடுதலை முன்னணியின் சர்வதேசப் பிரிவைச் சேர்ந்த சட்டத்தரணி கல்பனா மதுபாஷினி ஆகியோர் கலந்துகொண்டிருந்தனர்.

இலங்கையின் இறையாண்மைக்கு மதிப்பளிப்போம் – புதிய சீனத் தூதுவர் உறுதி

இலங்கையின் இறையாண்மைக்கு மதிப்பளிப்போம் – புதிய சீனத் தூதுவர் உறுதி

You may also like