சபாநாயகர் வைத்தியர் ஜகத் விக்ரமரத்னவுக்கு எதிராக எதிர்க்கட்சியினால் சமர்ப்பிக்கப்பட்ட நம்பிக்கையில்லாப் பிரேரணையை விவாதத்திற்கு எடுத்துக்கொள்ள மறுத்தமை, எதிர்க்கட்சியின் ஜனநாயக உரிமை மீதான பாரிய தாக்குதல் என எதிர்க்கட்சி குற்றஞ்சாட்டியுள்ளது. சபாநாயகருக்கு எதிராக முன்வைக்கப்பட்டுள்ள தனிப்பட்ட ஒழுக்கக்கேட்டுக் குற்றச்சாட்டுகளை அடிப்படையாகக் கொண்டு இந்த நம்பிக்கையில்லாப் பிரேரணை சமர்ப்பிக்கப்பட்டுள்ளது.&nbsp; குற்றச்சாட்டுகளுக்கு உள்ளான சபாநாயகரே தலைமை தாங்கும் பாராளுமன்ற அலுவல்கள் பற்றிய குழுக் கூட்டத்தில் அதனை விவாதத்திற்கு எடுத்துக்கொள்ள மறுத்திருப்பது நியாயமற்ற செயற்பாடு என எதிர்க்கட்சி தெரிவித்துள்ளது. பிரேரணையை நிராகரிப்பதற்காக அரசாங்கம் முன்வைத்த காரணங்கள் தர்க்கரீதியானவையோ நியாயமானவையோ அல்ல எனக் குறிப்பிட்ட எதிர்க்கட்சி, குற்றச்சாட்டுகள் நீதித்துறை நடவடிக்கைகளுக்கு உட்பட்டவை என்ற அரசாங்கத்தின் வாதத்தையும் கேள்விக்குட்படுத்தியுள்ளது. இந்த நம்பிக்கையில்லாப் பிரேரணை கடந்த 9ஆம் திகதி பாராளுமன்றத்தில் கையளிக்கப்பட்டு, கடந்த 12ஆம் திகதி ஒழுங்குப் புத்தகத்தில் உள்ளடக்கப்பட்டது.&nbsp; அதே நாளில் பிரதி சபாநாயகர் தலைமையில் நடைபெற்ற பாராளுமன்ற அலுவல்கள் பற்றிய குழுக் கூட்டத்தில், குற்றச்சாட்டுகள் நீதித்துறை நடவடிக்கைகளுடன் முரண்படுகின்றனவா என்பது குறித்து சட்டமா அதிபரிடம் ஆலோசனை பெற்று அறிக்கை சமர்ப்பிக்கப் பரிந்துரைக்கப்பட்டது. எனினும், பிரேரணை இதுவரை சட்டமா அதிபரிடம் சமர்ப்பிக்கப்படவில்லை என எதிர்க்கட்சி தெரிவித்துள்ளது. கடந்த 23ஆம் திகதி நடைபெற்ற கட்சித் தலைவர் கூட்டத்தில், குற்றச்சாட்டுகளைத் திருத்தி வழங்கினால் மாத்திரமே நடவடிக்கை எடுக்க முடியும் என சபாநாயகரும் அரசாங்கமும் தெரிவித்ததாக எதிர்க்கட்சி குற்றஞ்சாட்டியுள்ளது. அரசாங்கம் விரும்பும் வகையில் குற்றச்சாட்டுகளைத் திருத்தவோ நீக்கவோ தாம் தயாராக இல்லை என்றும் தெரிவித்துள்ளது. மேலும், இலஞ்சம் அல்லது ஊழல் பற்றிய விசாரணைகள் ஆணைக்குழு சபாநாயகருக்கு எதிராக விசாரணை நடத்தும் நிலையில், அவர் பதவியில் நீடிப்பது தார்மீக ரீதியாகப் பொருத்தமற்றது என எதிர்க்கட்சி சுட்டிக்காட்டியுள்ளது. எனவே, சபாநாயகர் பதவி விலக வேண்டும் அல்லது தமக்கு எதிராக முன்வைக்கப்பட்டுள்ள 50 குற்றச்சாட்டுகளுக்கும் அச்சமின்றி முகங்கொடுக்க வேண்டும் என எதிர்க்கட்சி வலியுறுத்தியுள்ளது. அரசாங்கத்தின் தீர்மானம் நாட்டின் ஜனநாயகத்திற்கு ஆபத்தை ஏற்படுத்தியுள்ளதாகவும், இந்த விவகாரம் குறித்து பொதுமக்கள் கவனம் செலுத்த வேண்டும் என்றும் கேட்டுக்கொண்டுள்ளது.

சபாநாயகருக்கு எதிரான பிரேரணை - விவாதத்திற்கு மறுப்பு

சபாநாயகருக்கு எதிரான பிரேரணை - விவாதத்திற்கு மறுப்பு

You may also like